SAAM LABU 44 - Zanniat Bible

Humhimhnak Hrang Sawngen

¹ Aw Bawipa, kin bil in za zo i ing, Kin pupate in kin rel zo i; Hlanlai ai thil ngaihsunurkul na bawnhnak tepawl khiah!

² Nangmah in Pathian ling lote hnawt ai, Na minungte he ram khurtu tuhin na bawnhnak khiah! A dang miphunte tu cawh napui, Na minungte tu nainung in na bawnhnak tepawl khiah!

³ Na miphunte in he ram heh amahte ralvang in nehhnak ilo i; Amahte hathnak in neh khai ilo i. Na kiahhan lam ban thahat le huham, amahte hnenah na um ngiohnak le, Na ithnak amahte hnenah na larruaihnak in neh tlang i.

⁴ Nang tu i kumpibawi le i Pathian isi. Na minung hnenah ral nehhnak pe isi.

⁵ Na huham in kin ralte neh i ing; Na hming in kin tawngtute laipua lakah foncih i ing.

⁶ I li heh rinsan lo ing. I ralvang khai heh i othaitu ilo i.

⁷ Kin ralte kut in kin hup zo ai, Kin huatute neh isi.

⁸ Nang tu thang na phat tuhai, Kumzangza in na aan tuh i ing.

⁹ Ikhalselai aw Pathian, Nangmah in kin hnawl ai kin ralte in kin neh zo i. Kin ralkapburte hnenah feh nawn lo isi.

¹⁰ Kin ralte hmai in kin tlanruai zo isi, Kin ralte in kin thilrite kin sut zo sek i.

¹¹ Tuu bangin ro tuh sio in kin siang zo isi; Ram dangdang ah kin piakruai zo sio isi.

¹² Na minungte zuar ai A man na ngenhnak tu zaikhai rel tlak loniu i. Na zuarhnak man hnempuihnak ngah fawn lo isi.

¹³ Kin vumai thil na bawnhnak heh Kin hiangai mite in kin hmu fangin, Zoh kin suam ai hnih kin san tlang i.

¹⁴ Miphun tampui lakah nautat phun ah kin cang i; Nautat zohsuamhnak thawn amahte lu kin nem zel menma i.

¹⁵ Kin daih lo tu le kin ralte zohsuamhnak le relsiahnak i za manin,

¹⁶ Zakthihnak in pon bangin i khuk ai, Mualpho in um ṭio ing.

¹⁷ Nang tu na hai lo ai Nangmah thawn kin thukhamhnak khai bal lo napui, He bang thil heh kin vumah hleng i.

¹⁸ Kin thinlung heh zuangzam awng lo i; Kin ke khai na lampui in pial awng lo i.

¹⁹ Ikhalselai aisu khai bawmtu nai loin ramsa lakah kin zam ai, Thihhnak khuathim songah kin lon isi.

²⁰ Kin Pathian bia com tlang ai Ramdang khuavang hnenah sawngen ita bang selai,

²¹ Nangmah in kin ling tuh zo sio isi; Zaimantifangin nang tu minung ai Thupruk ruathnak khai a lingsiotu isi.

²² Ikhalselai nangmah manin Sunnivui rek tuar thliahthlo in um tlang i ing; Ro tuhhnak tuu tlukin ruatmi i ing.

²³ Aw Bawipa, phawk tuhang law! Zaimanin mitmu ngio isi? Tho tuhang law! A kumzangza cenin kin hlum hram malaw.

²⁴ Zaimanin kin hnenin relh ngio isi? Kin harsahnak le kin tuarhnak heh Kin hai sah malaw.

²⁵ Lailak ah foncih mi i ing; Ral in kin neh ai laivut lakah kin sawn i.

²⁶ Tho tulai kin bawm tu. A kho ngai na ithnak manin kin o tu hram law.