SAAM LABU 132 - Zanniat Bible

Hmun Thianghlim Thangphathnak

¹ Aw Bawipa, David tu hih tu ṭiode lai, A tuarhnak hmuahhmuah khai hai hram malaw.

² Aw Bawipa, Jacob ai Pathian, Cungnungber Bawi, na hnenah thu i khamhnak le cukcam ai thu i tiamhnak hih tu ṭio law.

³ “Inn ah tlung tuh lo ai, Khuahluan ahkhai kai tuh lo ing;

⁴ Cawlum tuh lo ai mit khai mu tuh lo ing;

⁵ Israel ai Pathian Cungnungber caah hmun i hmu hlanlo le, Bawipa caah umhnak inn i sa hlanah,” a ti awnghnak khiah!

⁶ Thutiam Kuang thu heh Bethlehem in za ai, Jearim ai lo songah hmu zo i ing.

⁷ “Bawipa inn ah feh ngasing khaw, A kumpibawi tohkham hmaiah ut in bia ngasing,” ti tlang i ing.

⁸ Aw Bawipa, na huham larruaitu na Thutiam Kuang thawn, Na cawlumhnak hmunah kawi tuhang lai, kumzangza in um tu.

⁹ Na suangbawite tu dikcanghnak thawn thuam dun tu selai, Rintlak na minungte tu lungawi in au tlang tuseh.

¹⁰ Na cengfa David hnenah thukham zo isi; Aw Bawipa, na rilhnak kumpibawi tu hnawl malaw.

¹¹ David hnenah cukcam in thukham zo ai, Lang leh tuh lo isi: “Na fapate songin pakhat tu, Kumpibawi ah bawn tuh ing; Na tumrul in kumpibawi cang tuh i.

¹² Na fapate in i thukhamte hlun tlang ai, I thupehnakte ngai tlang lekhaw, A fapate khai na lehhnua ah a zomzet in kumpibawi cang tlang tuh i,” na ti awnghnak khiah!

¹³ Bawipa in Zion ril zo i; A umhnak tuhin daih i.

¹⁴ “Heta ah kumzangza in um tuh ing; I umhnak hrangah i daih i.

¹⁵ Zion ai kulhnak hmuahhmuah heh, A semkhim in pe tuh ing; A mifarahte cawm tuh ing.

¹⁶ A suangbawite tu Amahte bawnhnak cangcang ah hmuifu pe tuhai, A minungte tu lungawi in au tlang tuhai la sa tlang tuh i.

¹⁷ David ai tesinfa pakhat tu, Kumpibawi cangruai tuhai, I rilhnak kumpibawi ai ukhnak tu, heta ah khoruai tuh ing.

¹⁸ A ralte tu zakthihnak in tuam tuh i; Ikhalselai a ukhnak tu kau tuh amam ai, khangso tuh betbo i,” ti i.