SAAM LABU 108 - Zanniat Bible

Bawmhnak Hrang Sawngen

¹ Aw Pathian, i thinlung veksen in na rinsan ing. La in thang na phat tuh ing; Aw i rauhla, thangphat tu!

² I congcing le titilute tho tuhang ih! Ni phawr tuh ihang ing!

³ Aw Bawipa, miphun tampui lakah thang na phat tuh ing. Minung tampui lakah na thang na phat tuh ing.

⁴ A kho ngai na ithnak vancung hleng i; Rintlak na ihnak in van tong i.

⁵ Aw Pathian, na thawmlianhnak heh, Van ah larruai tu; Na songlawihnak huham heh, Laivum pumpuhluk ah larruai tu.

⁶ Na hathnak in i o tu law; Na ithnak na minungte luathnak tuhin, I sawngenhnak i ngai sah tu hram law.

⁷ A hmun thianghlim songin Pathian in, “Lungawi ngai in Shechem heh piakruai tuh ing; Sukkoth phairawn heh i miphunte hnenah zem tuh ing.

⁸ Gilead tu kaimah ai i; Manasseh khai kaimah ai i. Epharaim tu i lukhuk i; Judah tu i bawi faikiang i.

⁹ Ikhalselai Moab tu i kutsomhnak hleng ah hmang tuhai, Edom ram tu i kedawl lonhnak ah hmang tuh ing, Kaimah ai i ti linghnak tuhin. Filistin i neh manin au tuh ing,” ti i.

¹⁰ Aw Pathian, ving kulhhnak khuapui ah aisu in i fehpui tuh i? Edom ah aisu in i hoi tuh i?

¹¹ Aw Pathian, i zangtak ngaingai zo isim? Kin ralkapte hnenah tel tuh ve lo isim?

¹² Kin ralte kin tawng bawm tu hram; Zaimantifangin minung ai bawmhnak tu man nai lo i.

¹³ Kin hnenah Pathian ṭang lekhaw neh tuh ising; Kin ralte neh tuh ising!