SAAM LABU 10 - Zanniat Bible

Dikcanghnak Hrang Sawngen

¹ Aw Bawipa, zaimanin a hlapui ah um ngio isi? Zaimanin kin harsa can ah relh ngio isi?

² Mihrokhrawl pawl puarthau ai, Mifarahte cawh ai reem i. Amahte tohhnak thang ah awk tuseh.

³ Mihrokhrawl in a ruathnak phalo khiah tluangkhawngpui ai. Miduhham in Bawipa tu cukcam ai hnawl i.

⁴ Mihrokhrawl in Bawipa tu zaikhai siar tlang lo i, “Pathian in i hmu tuh lo ngawn i,” tiin puarthau in ti i. A ruathnak hmuahhmuah ah, “Pathian um lo i,” ti i.

⁵ Mihrokhrawl in a thil bawnhnak hmuahhmuah ah hlawhtling i; Pathian ai thukhanhnak tu A lingbanhnak ilo i. A ralte khai hnihsan menma i.

⁶ A thinlung niu in, “I tlasam tuh awng lo i; Zaikom inkhai vansanghnak tawk tuh lo ing,” ti i.

⁷ A ka tu cukcamhnak, thudonrelhnak le midikcangte hringhnak lekin dim i; Midang huadan le ponsia pong tuhin a lai rang ngai i.

⁸ Khuahacang ah a thupruk in relh i; Ciata ah mi a bawhhnak in Misual lo khai rek i. Bawmtu nai loin mibawngsiate heh a thupniu in cul ziar i.

⁹ Chintit bangin a thupdunhnak hmun an mi bawh i; A rek tumhnakte bawh i; A thang in awk ai thiar teu i.

¹⁰ Zaikhai ti ben lo pawl rek tuar tlang i; Thahatte in bawh tlang i, zoi i, nuai dekdo i.

¹¹ Mipha loin, “Pathian in Minung tu zaikhai siar lo i. A mit caw zo ai i hmu tuh awng lo i,” ti i.

¹² Aw Bawipa, tho tulai Mihrokhrawl pawl heh cawh tu; Aw Pathian, harsahnak a tuartute khai hai malaw.

¹³ Akontih in mipha loin, Pathian zohsuam ai, “Pathian in i cawh tuh lo i,” ti thil ini?

¹⁴ Ikhalselai nang in hmu isi; Amahte tuarhnak le lungsiahnak hmu ai, Anite bawm tuhin tirh na ting awng lo i. Zaikhai ti ben lotu in na hnenah a nunhnak pe i; Nu le pa nai lote bawmtu heh nangmah isi.

¹⁵ Misual le hrokhrawl mite ai hathnak thazang ekruai tusek law. Amahte sualhnak manin cawh tulai, phatlohnak a bo tian si tu.

¹⁶ Bawipa tu kumzangza le kumzangza in kumpibawi i. Ciamanin Pathian ling lotute tu A ram songin pairal tuh i.

¹⁷ Aw Bawipa, thinlung nem mite ai daihhnak tu ling isi; Cen amahte thinlung hatruai ai a sawngenhnak ngai isi.

¹⁸ Minung in thinlauhnak suakruai tuh nawn lohnak in, Ngakṭah farahte le nauneh mite ai auhnak tu ngai sah tulai, Amahte ṭan in thukhan tu hram law.