Rom Pawlpi Hemih Paul Laikuat 9 - Zanniat Bible

Pathian Le A Minungte

¹ I relhnak heh thudik i; Khrih naihnak ing ai thudonrel lo ing. A hnawm le a pha thiathiamhnak, Rauhla Thianghlim ai ukhnak i thinlung in thudon i rel lohnak heh fiang ngai in i rel i.

² Lung i sia ze i, i phunpui i thi le i sa caah,

³ i thin urhnak tu bo ti nai awng lo i. Anite manin kaimah sawn heh Khrih hnenin khekhnak le Pathian ai cukcamhnak hniaah a umtu inglai i nuam sawn i!

⁴ Anite tu Israel mite i; Pathian ai fate ah cangruai ai a songlawihnak heh amahte hnenah larruai i; amahte thawn thukhamhnak khai bawn ai anite hnenah dan pe i; anite in a dikmi biahnak nai tlang ai Pathian ai thutiamhnak a cotute i.

⁵ Anite tu kin pupa Hebrew mi hmingthang ngaingai songin a suaktute i; cen minung ihnak lamah ruat lesingkhaw Khrih khai amahte phunpui i. Zaizongza a uk siotu Pathian heh kumzangza thangphat in um tuseh, Amen.

⁶ Israel mite veksen in Pathian minung i sek lo i; ikhalselai Pathian ai thukhamhnak tu a khim lo i ti nuamhnak ilo i.

⁷ Abraham ai tesinfate khai amahte veksen in Pathian ai fa i sek hang lo i. Pathian in Abraham hnenah, “I thukhamhnak tefate tu Isaac song suak mite i tuh i” tiin ti i.

⁸ Hemi ai a sullam tu: minung dan bangin tetu tefate heh Pathian fate i tihnak ilo i; Pathian ai thukhamhnak thawmin a tetu fate lek khiah tefa taktak in siar tuh mite i, tihnak i.

⁹ Zaimantifangin Pathian ai thukhamhnak tu hetihin um i: “A camcu khim fangin kawi lehsal tuhai Sarah in fapa nai tuh i,” ti i.

¹⁰ Hemi lek zolo in, Rebecca ai fapate pahnih in pa nai kawm ai ani tu kin tetu kin pu Isaac i.

^11-12 Ikhalselai rilmi fapa pakhat in Pathian ai tumtekhnak a khimruai thil tuhin Pathian in Rebecca hnenah, “A u in a nau ruaih tuh i,” tiin ti i. Pathian in he thu heh anite te hlan in rel cia zo i; a pha ituseh, a hnawm ituseh, zaikhai a bawn kawm hlanah a rel awnghnak i. Ciamanin Pathian in mi a ril fangin a thil bawnhnak thawmin ilo ai Amah in a ko sawn manin i.

¹³ Lai Thianghlim inkhai, “Jacob tu it ngai ing, ikhalselai Esau heh hua ing,” ti i.

¹⁴ Ciatih ilekhaw Pathian tu a dikcang lo i, ti tuh ising maw? Ti hrimhrim hlah.

¹⁵ Zaimantifangin Moses hnenah, “Ninghio i hiamhnak vumah ninghio tuh ing; ngaihharhnak nai i hiamhnak vumah ngaihhar tuh ing” ti i.

¹⁶ Ciamanin zaizongza ah minung ai daihhnak le bawnhnak manin ilo in Pathian ai ninghiohnak a um manin a cang siohnak i.

¹⁷ Egypt kumpibawi thu ahkhai Lai Thianghlim in, “Nang tu kumpibawi ah na bawn ai lailung hmuahhmuah ah i hathnak huham larruai ai i hming na thangruaihnak tuhin na ril ing,” ti i.

¹⁸ Ciamanin Pathian in a daihmi poh khiah ninghio ai a daihmi poh khiah lungruhruai i.

Pathian Thinrawhnak Le Ninghiohnak

¹⁹ Ikhalselai ningmah lakai pakhatkhat in i hnenah, “Hetih i ngaingai lekhaw, akontih in Pathian in mi mawhhluk thil tuh i? Pathian ai daihhnak le tumhnak tu aisu in el thil tuh i?” tiin i zawt tuh isi.

²⁰ Ikhalselai, i rual, ciatihin Pathian a sawn ngamtu aisu isi? Bel in a bawntu hnenah, “Zaimanin hetihin i bawn isi? tiin zawt awng awm?

²¹ Thungai tifangin bel bawntu in suntlung heh a daihdaih in bawnthilhnak nai i, a daih lekhaw suntlung hlomkhat in bel pahnih bawn thil i; pakhat tu can songlawi can ah hmang tuhin, a dang pakhat tu nisiar hmang tuh menma in, bawn i.

²² Ciabang thotho in Pathian ai thil bawndan khai ciatih i. A thinrawhnak larruai tuhin le aisusu inkhai a huham hmu tuh daih i. Ikhalselai a thinrawhnak a tuartu tuh le hnawmcanhnak a tawktu tuh mite vumah a thin sau ze ai mi or ben thai ngai lawnsi i.

²³ Cen a semkhimmi a songlawihnak khai larruai nuam ai a cotu tuhin tekciami kin imanin a ninghiohnak dongtu kin vumah a songlawihnak burh i.

²⁴ Zaimantifangin kin tu amah ai komi a minung ising; Judah mi songin lek komi ian ilo in Gentile mi song inkhai a ko mite ising.

²⁵ Hosea laibu songah Pathian in, “I minung ilo mite khiah ‘I minung’ tiin ko tuh ing. I daih lomi miphun khai ‘I ithnak mite’ tiin ko tuh ing,”

²⁶ “Ning heh i minung ilo i si” ti ai a tihnak hmunah khiah, ‘A nungmi Pathian ai fate’ tiin anite tu ko tuh i,” ti i.

²⁷ Cen Isaiah in Israel thu ah, “Israel mite tu tifingriat kamai siatnawi zah in tam khalselai mi tlawmniu ian nunohnak co tuh i;

²⁸ zaimantifangin a rai hlanah he lailung vum thu heh Pathian in khan tuh i,” tiin ti i.

²⁹ A hlan deuh ah Isaiah thotho in, “Cungnungber Bawipa ai tefate hrekkhat zuah loin um selai Sodom bang ah kin cang tuh zo ai Gomorrah bang kin cang tuh zo i,” tiin a ti awnghnak bang i.

Israel Caah Paul Ai Sawngenhnak

³⁰ Ciatih imanin, hetihin rel ing: Pathian thawn rualremhnak bawn a tum awng lotu Gentile mite tu amahte sanghnak thawmin Pathian thawn rem dun zo i.

³¹ Ikhalselai Pathian ai minungte, Pathian thawn rualrem nuam in dan a si hnelhnotute in ciami remhnak heh tawk tlang lo i.

³² Zaimanin ciatihin cang ini? Sanghnak rinsan loin amahte bawnhnak rinsan sawn manin i. Ciatihin, “Bahhnak lungto,” vumah bah tlang i.

³³ Ciami lungto thu ah Lai Thianghlim in: “Sik tu ih, Zion ah lungto pakhat dah ing; Ciami manin mi tampui bah ai sawn tlang tuh i; Ciami lungpui in mi tluruai tuh i. Ikhalselai ciami a sangtute heh, mualpho tuh awng lo i,” tiin ti i.