Rom Pawlpi Hemih Paul Laikuat 3 - Zanniat Bible

¹ Ciatih ilekhaw Judah mite heh Gentile mite vumah cuangcehnak um aw im? Anite zarhtan heh zaital man nai aw im?

² A phunphun in cuangcehnak um i. Hmasaber ah Pathian in a thu heh Judah mite kilruai i.

³ Ikhalselai Judah mi hrekkhat rintlak lo fangin tang, ziang cang tuh ini? Pathian khai amahte vumah rin tlak lo tuh ve im?

⁴ I hrimhrim hlah! minung aisusu khai thudonreltu ciang ikhalselai Pathian tu a dikmi le rinsantlak tuh hlen i. Lai Thianghlim in, “Na pong fangin, Na ponghnak tu a dik i ti larruai tuhai, anite in na thukhan fangin, thu neh tuh isi,” ti i.

⁵ Ikhalselai kin thil bawn dikcang lohnak in Pathian ai thil dikcang a bawnhnak fiang ngai in larruai lekhaw, zaiber rel tuh nawn ising? Pathian in kin cawh fangin a khelh i, ti tuh ising maw? (Minung dan in rel ing).

⁶ Ti naisai hlah! Pathian tu a dikcang i; dikcang hlah selai akontih in lailungpui thukhan thil tuh i?

⁷ Ikhalselai i dikcang lohnak in Pathian songlawihnak sawn ah na ruaih ai a dikcanghnak khiah larfiangruai sawn lekhaw akontih in i tuh i? Zaimanin kaimah sawn misual tiin mawhhluk co thotho ini ing?

⁸ Zaimanin, “A pha lar tuhin a pha lo bawn tuh ising,” tiin ti lo ising? I peungai i; mi hrekkhat in ciatih bang rori in rel isi tiin i hluk tlang ai zoh i suam tlang i. Ciabang mite tu mawhphurh tlak i ai mawhphur tlang tuh i.

Midikcang Aisu Khai Um Lo I

⁹ Ciatih ilekhaw, kin tu Judah mi i ing ai Gentile mite tahin hnempuihnak um cuanglo im? Um lamlam hlah! Fiang ngai in i larruai zo bangin Judah mi ituseh, Gentile mi ituseh, kin veksen sualhnak ai huham hniaah um tlang sek ising.

¹⁰ Lai Thianghlim in: “A dikcangmi aisu khai um lo i,

¹¹ A fimmi pakhat khai um lo i, Pathian biatu khai um lo i.

¹² Amahte veksen in Pathian hnenin pial tlang sek i. Lampeng hlun tlang zo sek i. Aisu khai thil dikcang a bawntu um lo i, Pakhat bang khai um lo i.

¹³ Amahte ponkam heh thihpui tlak mi zawlhnak lekin dim i; Amahte lai in a kihkul thudon relhnak suak i; Amahte kahmur in thihsi, rulru bang suak i.

¹⁴ Amahte ponkam tu mi cukcamhnak lek in dim i.

¹⁵ Mi tuahmawh tuh le mi rek tuhin zualrang tlang ngai i.

¹⁶ Amahte feh hmun cangcang ah hnawmcanhnak le cimpilhnak in hlun de i.

¹⁷ Daphnak lampui khiah ling awng lo i.

¹⁸ Pathian kihzahhnak khai zir awng lo i” tihnak bangin i.

¹⁹ Tun in tu dan songai thupehnak hmuahhmuah heh dan hnia ai a umtute caah i, ti ling ising. Ciami heh aisu inkhai el thil lohnak tuhin le laivum pumpuhluk heh Pathian ai thukhanhnak hniaah hlenpui tuh i tihnak i.

²⁰ Zaimantifangin aisu bang inkhai dan hlun in Pathian hmaiah thiamcohnak ngah thil tuh lo i. Dan ai naperhnak tu minungte sualhnak lingruaihnak i.

Pathian In Remhnak Bawn I

²¹ Tun tu Pathian in Amah le minung lakah rualremhnak lampui larruai zo i. Ciami remhnak lampui thu ah Moses dan le prophette tu lingpuitute inapui dan thawn zaikhai seng dun lo i.

²² Jesuh Khrih sanghnak thawmin Pathian in minung thawn remhnak bawn i. Khrih a sangtu hmuahhmuah caah ciatihin Pathian in bawn i, ciamanin dangdunhnak zaikhai um lo i:

²³ Kin veksen in misual ising ai Pathian songlawihnak co ban lo ising.

²⁴ Ikhalselai tun tu kin luatruaitu Jesuh Khrih ai tlanhnak thawmin Pathian in a ninghiohnak lehsawng kin pe ai amah thawn rualremhnak kin bawn sah zo i.

²⁵ Pathian in Jesuh Khrih ai thisan thawmin misual ngaithiamhnak tu a tumtekhnak i ai, ciami ngaithiamhnak heh amah sanghnak thawmin ngah tlang tuh i. Pathian in hebang thil a bawn khiah amah ai dikcanghnak larruai tuhin i. Hlanlai ah Pathian tu a thin sau ai minung ai sualhnak heh poi cel loin umsan awng i.

²⁶ Ikhalselai tunin tu Amah ai dikcanghnak larfiang tuhin minung ai sualhnak heh umsan menma nawn lo i; ciatihin a dikcanghnak larruai ai Jesuh a sangtu hmuahhmuah heh Amah thawn rualremhnak coruai i.

²⁷ Ciatih ilekhaw kin porh dun tuh zaital um awm? Um hrimhrim hlah! Zaimanin i? Dan kin hlun manin maw? I lo i! Kin sanghnak manin i.

²⁸ Zaimantifangin dan ai thupehnak hlun manin ilo in sanghnak thawm ian in minung heh Pathian thawn rualremhnak um i, ti khiah kin thu tawphnak i.

²⁹ Ihlahle, Pathian tu Judah mite ai Pathian ian i awm? Gentile mite ai Pathian khai i ve lo i awm? I, Gentile mite ai Pathian khai i.

³⁰ Pathian tu pakhat i ai Judah mite tu amahte sanghnak thawmin Pathian thawn remdunhnak um tuhai Gentile mite khai amahte sanghnak manin amah thawn remruai tuh i.

³¹ Ciatih ilekhaw he sanghnak dan lon ising, tihnak im? I hrimhrim lo i! Dan khoruai sawn ising.