Rom Pawlpi Hemih Paul Laikuat 13 - Zanniat Bible

Acuzah Hnenah Kin Ṭuanvo

¹ Ram uktu bawite ai thu ngai tu ih; zaimantifangin Pathian ai lungkhimhnak loin aisu khai thunaitu um thil lo i; cen tunai thunaitute heh Pathian ai dahhnak i.

² Aisu khai thunaitu tawngtute in Pathian ai dahhnak tawng i. Ciatih bangin a tawngtu heh amah lala vumah thukhanhnak hlengruai tuh i.

³ Uktu bawite heh thil pha a bawntute in kih tuhhnak ilo i; phatlohnak a bawntute ian in kih tuhhnak i. Thunaitu bawite heh kih loin um silai na nuam aw im? Na nuam lekhaw thilpha bawn tulai mithmai pha ngah tuh isi;

⁴ zaimantifangin nangmah ai phathnak bawntu tuhin Pathian ai cengfa i. Ikhalselai a pha lo bawn lesikhaw thunaitu khiah kih tu; zaimantifangin mi cawhthilhnak nai taktak i. Ani tu Pathian ai cengfa imanin thilpha lo a bawntute vumah Pathian ai cawhhnak a suakruaitu i.

⁵ Ciamanin Pathian cawhhnak lek ah ilo in a hnawm le a pha thiathiamhnak manin khai thunaitu bawite ai thu ngai tu ih.

⁶ Ciami manin ngunkhuai pe i si; thunaitu bawite in a ṭuanvo bawnsuak fangin Pathian caah bawn i.

⁷ Ciamanin ning pe tuhhnak khiah pe tu ih, pumpak ngahhnak songai pe tuhhnak ngunkhuai ituseh, thilri hrangah pe tuhhnak ngunkhuai ituseh pe tu ih. Hmaizah tlak mi heh hmaizah tu ih; upat tlak mi heh upat tu ih.

Pakhat Le Pakhat Vumai Kin Ṭuanvo

⁸ Aisu hnen ahkhai laiba nai mah ih. Ning bahnak tu pakhat le pakhat itdunhnak ian ituseh. Ithnak a naitu heh dan hluntu i.

⁹ Thukham pehnak, “Nu le pa kangkawm sualhnak bawn mah; mirek mah; ruko mah; midang naihnak thil ot mah,” tihnak le a dang thukham hmuahhmuah heh, “Nangmah le nangmah na it dun bangin na innhnen khai it tu,” tihnak thukham songah khim sio i.

¹⁰ Mi pakhatkhat it lesikhaw amah caah phatlohnak bawn tuh awng lo isi. Ciamanin dan khimniu in hlun ben tihnak tu itdunhnak i.

¹¹ Hemi tu bawn ning kul hrimhrim i, zaimantifangin ning mitmuhnak in phawk ning cu zo i, ti ling i si. Nun o mi kin cang thil tuh can tu hmasa kin sang sawng lai tahin tunah nong amam ihang.

¹² Zan bo dawn hang ai sun hleng dawn ihang. Khuathim songai bawnhnak tepawl tu com tuhang ilai khuatleu songah raltawng tuhin ralthuam lang ngasing.

¹³ Sun khuavar ai a ummi kin i bangin kin nun ziaza mawiruai nga hang sing; au murhmo in zuri cawiṭawm in um nawn hlah hang sing; tawng dun le iksik dun in um hlah hang sing; nu pa sual bawn le mitsih mawi loin um nawn hlah hang sing.

¹⁴ Kin Bawipa Jesuh Khrih heh ralthuam bangin sil tu ih; tisa daihnak le hiamhnakte khiah com tuhang ih.