Rom Pawlpi Hemih Paul Laikuat 11 - Zanniat Bible

Israel Vumai Pathian Ninghiohnak

¹ Ciatih ilekhaw Pathian in a minungte hnawl tata tuh i awm? Hnawl hrimhrim hlah! kaimah khai Israel mi, Abraham ai tesinfa, Benjamin hin songtel ing.

² Pathian in a hampan ai a ril awnghnak a minungte heh hnawl lo i. Lai Thianghlim songai nganhnak ah, Israel mite hmuhheh manin Elijah in Pathian hnenai a relhnak ling lo i sim? Elijah in,

³ “Bawipa, na prophette rek ai na pulengte khai bal sek i, kaimah pakhat ian i tang ai kaimah rin i rek tum tlang i!” a tihnak khiah.

⁴ Ciafangin Pathian in akontih in sawn cang ta? “Kaimah bul caah Baal khuavang a bia lai lotu minung thawng sarih nai lai ing,” ti i.

⁵ Ciabang thotho in tunah khai i, a ninghiohnak manin Pathian ai a ril awnghnak minungte songin a tangsun um lai i.

⁶ Hetih ai a rilciahnak tu a naperhnak man ilo ai a ninghiohnak manin i. Zaimantifangin Pathian ai a ril mite tu a naperhnak manin ril ilekhaw a ninghiohnak tihnak tu ninghiohnak taktak i tuh lo i.

⁷ Cen akontih i cangta? Israel mite in amahte sihnak tawk tlang lo i. A tawktute tu Pathian rilhnak mi tlawmniu lek i. Midangte tu thinlung ruh tlang ngio i.

⁸ Lai Thianghlim in, “Pathian in amahte thinlung mit vairuai i, Tunnia tian ah hmu thil tlang lo ai ling thil tlang lo i,” a tihnak bangin cang ngaingai i.

⁹ Cen David in: “Amahte puai songah pomhnak le thang ai awkhnak cang tuseh; Tlu in bah tlang tu selai cawh tuar tlang tuseh.

¹⁰ Khua hmu thil tuh loin mit cawruai tu selai, amahte harsahnak thilrit hniaah el kun tlang tuseh,” tiin ti i.

¹¹ Ciatih ilekhaw Judah mite bah fangin hnawm lan ta tuh i awm? Hnawm lan hlah! Amahte bah manin nunohnak tu Gentile mite hnenah hleng i. Ciami tu Gentile mite vumah Judah mite in iksikhnak nai tuseh, ti daihhnak i.

¹² Judah mite ai sualhnak in laivum ah hmuifuhnak tampui hlengruai i, amahte rauhla lamah farahhnak in Gentile mite hnenah hmuifu tampui pe i. Cen Judah mite ciazah ti ai thiahhnak mipum semkhim ngai ai tel tlang ve fangin zaitlukin hmuifu tam tuh amam ini?

Gentile Mite Nunohnak

¹³ Tunah Gentile mi ning hnenah thu ning rel ing: Gentile mite hnenah nalang i i songah i naperhnak ah mithmai phahnak nai tuh ing.

¹⁴ I phunpuite iksikhnak nairuai in mi hrekkhat tal nunohnak ngahruai thil pang ni ing maw tihnak i.

¹⁵ Zaimantifangin Judah mite hnawlhnak tuar fangin laivum mite tu Pathian ai ral in rualpui ah cang tlang zo i. Ani Judah mite cosang ve fangin ziang cang nitur? Mithi caah nunhnak i tuh i!

¹⁶ A hmasaber sang lemkhat heh Pathian hnenah sel fangin a cianghlim lekhaw sangzawl khat pahin amah naihnak i ai a cianghlim i. Thinghamte Pathian hnenah pe fangin a cianghlim bangin a kakte khai cianghlim ve i.

¹⁷ Amahte cinghnak olive kung ai a kakte hrekkhat heh tan ai hampalak ai pohnak olive kung a kak thawn ciami olive kung ah peh i. Ning, Gentile mite heh cia hampalak ai pohnak olive kung bang i si, cen Judah mite ai rauhla lam nunhnak le thazang kawmpui tlang i si.

¹⁸ Ciamanin olive kak tanhnak bang mite khiah zohsuam tuh lo i si. Akontih in hngal thil tuh i si? A kak ian i si ai a ham khiah ning in cawm lo i si; a ham in ning cawm sawn i.

¹⁹ Ningte incen, “Kinmah ca umhnak lawngruai tuhin a kakte sattan i ing,” tiin ti tuh i si.

²⁰ Ciami tu a dik i. Ani Judah mite in sang lo manin tanhnak i; ningte tu ning sang manin he hmun co ngah tlang i si. Ciami manin puarthau in hngal pang mah ih! a lau in lau tu sawn ih.

²¹ A ham thawn peh dun ai a kak ngaingai Judah mite rin zuah lo fangin tu, ning tang ning zuah tuhin ruat dun i sim?

²² Hemi zawn ahhen Pathian tu ninghio ngaihharhnak nai roh napui a thu kho ngai thotho i ti hmu ing. A bah a sawn mite hnenah a thu kho ngai i, ikhalselai ning hnen ahcen ninghiohnak nai i. Ciami a ninghiohnak songah um ṭio le i sikhaw ning ninghio tuh ṭio i; ikhalselai um hlah le i sikhaw ning ekruai tuh sek i.

²³ Cen Judah mite in sang loin amahte umhnak dinhmun khiah zam lekhaw a hlanai amahte um awnghnak ah dah leh tuh i, zaimantifangin Pathian tu peh lehsal thilhnak thu nai i.

²⁴ Ning, Gentile mite tu hampalak ai pohnak olive kung ai a kak bang i si ai ning tu tan sek in, dan ilo napui, cinghnak olive kung thawn a pehdunhnak menma i si. Judah mite tu cinghnak olive kung imanin tanciahnak a kak ita inkhai a kung hlun ah peh leh tuh heh Pathian caah bai tuh deuh ngaingai i.

Zapui Hnenah Pathian Ninghiohnak

²⁵ U le naute, a dikmi thuthup um ai ciami tu ning ling tuhin i daihhnak i. Ciami ling le i sikhaw mifim ah ruat dun tuh lo i si. Zaimantifangin, Israel mite thinlung ruhhnak heh kumzangza in i tuh lo i; Pathian hnenah Gentile mite a hleng tuh zah a hleng hlan song lek i tuh i.

²⁶ Cen Israel mite hmuahhmuah nun o mi a cang tuhhnak tu hetihin i tuh i. Lai Thianghlim in, “Zion in otu hleng tuhai Jacob ai tesinfate ai phatlohnak hmuahhmuah lon tuh sek i.

²⁷ Amahte sualhnak i lang sah fangin, amahte thawn he thukhamhnak bawn tuh ing,” a ti bangin i tuh i.

²⁸ Thuthangpha hnawl manin Judah mite tu Pathian ai ral ah cang tlang i; Ciami tu ningmah Gentile mite caah i. Ikhalselai amahte pupate manin anite tu Pathian ai rilmi rualpuite i.

²⁹ Zaimantifangin a rilmi le a hmuifumi thu ah Pathian ai thinlung thleng awng lo i.

³⁰ Ning, Gentile mite, a liam sa can songah Pathian thu hlun awng lotute i si; ikhalselai tuh ahcen Judah mite in Pathian thu ngai lo manin ningte in Pathian ai ninghiohnak ngah tlang i si.

³¹ Ciabang thotho in Pathian ninghiohnak ning ngahhnak khiah anite inkhai ngah tuh vehnak in Judah mite tu Pathian thu ngai loin um tlang i.

³² Zaimantifangin, mi zongzong hnenah ninghiohnak a naithilhnak tuhin Pathian in aisusu khai thungai lohnak songah thawngtla bangin tangruai sio i.

Pathian Tu Thangphat Tlak I

³³ Pathian ai ninghiohnak tu a lian ze i! A fimhnak le a linghnak heh a thuk ze lawmlam i! A thu relcathnak pawl heh aisu in relfiang ben tuh i? A vakhnak lampui heh aisu in zong thil tuh i?

³⁴ Lai Thianghlim in: “Bawipa ai thinlung tu aisu in ling i? Ruathnak a pethaitu aisu um ni?

³⁵ Amah in i rul leh tuseh tiin aisu in thil pe awng ini? ti ai a tihnak bangin i.

³⁶ Zaimantifangin zaizongza amah in semsuah i, Amah manin um ai amah caah i sio i. Pathian hnenah songlawihnak tu kumzangza in um tuseh! Amen.