Rom Pawlpi Hemih Paul Laikuat 10 - Zanniat Bible

¹ U le naute, i phunpuite heh nunohnak ngah hram selai ti khiah i thinlung a veksen in i daihhnak i. Amahte caah zaitlukin sawngen de ing!

² Pathian ca ahcen ṭang tlang ngai i, ti khiah a lingpuitu ing, ikhalselai amahte ṭandan heh a dik lo i.

³ Pathian in amah le minung lakah kontih bangin rualremhnak lampui bawn i ti khiah ling tlang lo i, amahte hlanlam in a lampui sel fawm tlang i, ciamanin Pathian in minung thawn rualrem tuhai a bawnhnak lampui songah lut nuam tlang lo i.

⁴ Khrih in dan tu boruai zo ai aisusu khai sanghnak a naitu hmuahhmuah Pathian thawn rualremhnak ngah i.

Mi Zongzong Ca Nunohnak

⁵ Moses in Pathian thawn remhnak tu dan hlunhnak thawmin i, tiin ngan ai, “Aisusu khai dan ai thupehnak a hluntu heh nung tuh i,” ti i.

⁶ Ikhalselai Lai Thianghlim in sanghnak thawmin Pathian le minung lakah remhnak um i, tihnak thu ah hetihin ti i: “Aisu vancung ah kai tuh i? tiin mah veve zawt dun mah ih,” (Ciami tu Khrih khiah van in zuktolhpui tuh,” ti ca i).

⁷ Lai hniaah aisu zuktolh tuh i? ti inkhai zawt mah ih,” (Ciami tu Khrih khiah thihhnak in hon suahpui tuh,” tica i).

⁸ A relhnak taktak tu, “Pathian ai phuanghnak thu tu na hiangah um i, na kahmur ah um ai na thinlung songah khai um i,” ti i. Ciami tu kin phuanghnak sanghnak ai thu i.

⁹ Jesuh tu Bawipa i tiin na hmurka in phuang ai Pathian in thihhnak in thoruai leh i, tiin na thinlung in sang le sikhaw nunohnak ngah tuh isi.

¹⁰ Zaimantifangin kin sanghnak thawmin Pathian thawn remhnak co ising; kin phuanghnak thawmin nunohnak ngah ising.

¹¹ Lai Thianghlim in, “Amah a sangtu hmuahhmuah mualpho tuh lo i,” tiin ti i.

¹² Hetihin ‘A sangtu hmuahhmuah’ a tifangin aisusu khai tel sek i, zaimantifangin Judah mi le Gentile mi karlak ah hlaihdanhnak um nawn lo i. Pathian tu mi zongzong ai Bawi i ai A hming a kotu hmuahhmuah hnenah siang ngai in hmuifu pe i.

¹³ Lai Thianghlim in, “Aisu khai Bawipa ai hming a kotu hmuahhmuah nunohnak ngah tuh i,” a tihnak khim i.

¹⁴ Amahte sang lomi tu akontih in a hming ko thil tuh i? A Thula za lo fangin tu akontih in sang thil tuh i? A thu phuang lo fangin tu akontih in za thil tuh i?

¹⁵ Palai hlathnak mite um lo fangin tu akontih in thu phuang thil tuh i? Lai Thianghlim in, “Thuthangpha a phuangtute ai ke tu zaitlukin mawi i!” ti i.

¹⁶ Ikhalselai mi zongzong in Thuthangpha heh cosang lo i. Isaiah amah inkhai, “Bawipa, aisu in kin thuthang phuanghnak heh sang i?” ti awng i.

¹⁷ Ciamanin sanghnak tu thuthang zahnak in hleng ai thuthang tu Khrih kin phuanghnak in hleng i.

¹⁸ Ikhalselai thuzawt i hiamhnak um i, “Thuthang phuanghnak heh amahte in za awng lo ngaingai i maw? tihnak i. Anite in za hlen i, zaimantifangin lai thianghlim in, “A aw thawm tu laivum khuahacang ah thang i; A ponkam tu laipua tonghnak tian hleng i,” a ti heh a hman i.

¹⁹ Pakhat zawt i hiam lai i, “Israel mite in tang ling lo i awm?” Moses amah rori khiah he thuzawthnak sawntu hmasaber i ai, hetihin sawn i. “I minungte iksikhnak nairuaitu tuhin, ‘Miphun ai siar tlak lo, tihnak pawl hmang tuh ing. I minungte thinrawruaitu tuhin mivoi phun pawl hmang tuh ing,” ti i.

²⁰ He tahin ralpha amam in Isaiah in, ‘I si lotute lehlam in i tawk tlang i, I thu a zawt lotute hnenah lar ing,” ti i.

²¹ Ikhalselai Israel mite thu ah: “Thu a ngai lotu le engsantu Israel hnenah sunnivui i kut san ing,” ti i.