Obadiah 1 - Zanniat Bible

Bawipa In Edom Cawh Tuh I

¹ Edom ram thula ah Bawipa Pathian in Obadiah hnenah a relhnak thular tu, Bawipa ai miphunte lakah a tlangautu hlat ai a tlangau kin zahnak tu “Ralring tu ih, Kin veksen tho in Edom tawng tuh ising,” ti i.

² Edom hnenah Bawipa in, “Sik tucuk, miphun lakah phun nauta ber ah ning bawn tuh ing; Zohsuam nautathnak tuar tuh i si.

³ Na hngalhnak in na zawl ngah zo i. Lungkhukua songah um ai, hmun sang ngai ah na um manin na thinlung in, ‘Aisu in i duk bentu um ni?” tiin ti isi.

⁴ Muvanlai bangin vansangpui ah zuang in arsi lakah na bu sa khal sikhaw, Na duk tuh thotho ing,” tiin Bawipa in ti i.

⁵ “Zan ah ruko kawi selai, A rokhnak tam tuh napui A langhnak tu a daihhnak ian i tuh i, Cabit rutute kawi selai, A valhnak nai loin um tuh im?

⁶ Ikhalselai Esau thilri a rokdan heh ruat tu ih; A thupniu in a dahhnak sumsaw rin phorh sah sek i!

⁷ A hlanai ning ṭantute in ning zawl tlang i, Na ram songin na hnawt i. Nangmah thawn rem niu in umtute in na neh zo i. Nangmah rongdai na kimpuitu na rualpuite in thang na toh i; ‘Fimhnak a naihnak tu akonah i?” na ti i.

⁸ “Cia nia ahcen Edom mifimte tu kaimah in siatsuah tuhai, Esau Mual ah fimhnak khawi tuh lo ing.

⁹ Teman ralkapte thinlau tuhai Edom ralkap hmuahhmuah rek tuar tuh i.

Edom Cawhhnak Thuhampui

¹⁰ “Na unau Jacob ai tesinfa hnenah thilsual na bawn manin, Nangmah heh zakthi in um tuh ṭiode ai Kumzangza in na pairal tuh i.

¹¹ Ralte in amahte kotka khai a bal sek nia ah khiah, Zaikhai nam loin ding awng menma isi. Jerusalem ai hlawnthil lang ai camciafung duk in zemduntu ramdang mi tlukin misiava isi.

¹² Na unau ai bawngsia nia ah nangmah lala porh dun hnelhno mah; Judah hnawmcan nia a tawk fangin na lungawi mah. Aican in a um nia ah hni cuaico mah.

¹³ I minungte harsahnak a tuar nia ah a kotka songah lut mah. Hnophnak a tawk nia ah thinriam in um mah. A tlu nia ah a thilri long mah.

¹⁴ A tlan tumtute rek tuhin lamkhek in bawh mah. Vansanglam in a um nia ah A luattu hrekkhat amahte ral kut songah pe mah.

Pathian In Thukhan Tuh I

¹⁵ “A rai hlanah kaimah Bawipa in, Miphun hmuahhmuah vumah thu i khan nia hleng tuh i. Aw Edom, midang vumah na bawn bangin na vumah bawn tuh ve i. Na thil tidan tu na lu vumah tlung tuh i.

¹⁶ I minungte in i mual cianghlim vumah a khami cawhhnak khuat ding zo i. Ikhalselai a hiangai umtu Miphun hmuahhmuah in, Ciahnak tahin a kha sawn khuat ding tuh i. A veksen in ding tuhai pairal tuh sek i.

Israel Ai Nehhnak

¹⁷ “Ikhalselai Zion Mual ah mi hrekkhat luat tuh i. Ciami mual tu cianghlim tuh i. Jacob ai minungte in, Amahte covo amahte ai ram khiah co leh tuh i.

¹⁸ Jacob innsang tu mai ah cang tuhai, Joseph innsang tu mailiau ah cang tuh i; Esau innsang tu fanghi i tuhai ko tuhai kang tuh sio i. Esau innsang tu luattu pakhat khai um tuh lo i. Bawipa in rel zo ing.

¹⁹ “Cen Negeb ai a umtute in Esau Mual khur tuh i, Shephelah phairawn ai a umtute in Filistin ram khur tuh i. Israel mite in Epharaim le Samaria ram khur tuh i. Benjamin hin in Gilead ram co tuh i.

²⁰ Israel Sak lam um saltang mite let leh tuhai, Sak lam ah Zarephath tian Phoenisia ram khur tuh i. Jerusalem saltang mite Sardis ai a umtute in Judah hlang lamai umhnak Negeb khuapuite khur tuh i.

²¹ Nehtu Jerusalem mite in Zion Mual ah kai tuhai, Esau Mual uktu cang tuh i. Cen Bawipa tu kumpibawi i tuh i.