Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Nehemiah 2 - Zanniat Bible


Nehemiah Jerusalem Ah Feh I

1 Artaxerxes in kumpimangbawi a cang kum kulhnak, Nisan hla ah, vaikhat tu kumpimangbawi rong ai laitak ah cabitti pe ing. Hemi hlan ahcen mithmai sia in um i hmu awng lo i.

2 Ciamanin, “Zaimanin lung na sia i? Na cak lo ihlahle na thinhar isi!” tiin iti i. Ciafangin thin i lau ze ai,

3 “Aw kumpimangbawi, na nunkhua sau tu hram seh. Kin pupate lu phumhnak khuapui hnawm sio le a kotkate mai in tai sio ai a um lai can ah akontih in lungsia loin um thil tuh ing?” tiin ti ing.

4 Kumpimangbawi in, “Ziang bawn na nuam i?” tiin i zawt i. Ciafangin van ai Pathian hnenah saw i ngen hnuaah,

5 a hnenah, “Aw kumpimangbawi, i vumah na lungawi ai i ngenhnak i pe tuh ilesikhaw Judah ram, kin pupate lu phumhnak khuapui ah i hlat tu hram law; ciami khuapui tungding leh i nuam i,” tiin ti ing.

6 Kumpimangbawi nu tu a hiangah to ai kumpimangbawi in, “Zaicam na rai tuh i? Zaifangin let tuh isi?” tiin i zawt i. I rai tuh zah heh rel ai i hlat tuhin a lungkhim i.

7 Cen kumpimangbawi hnenah, “Bawipa, lung na khim lekhaw Judah ram tian i fehthilhnak tuhin Euphrates Nitlak lamai peng ai ram uktu Mangki bawite hnenah lai i ngat tu hram law. Judah ram i hleng hlanlo anite in tluang ngai in i feh siang tuh i.

8 Cen acuzah ai tupui thing hmuahhmuah kiltu Asaph hnenin Biakinn kulhhnak kotka hrang, khuapui kulhhnak vingpui hrang le i umhnak inn hrangah thing i pe thil tuhin lai i ngat tu hram law,” tiin ngen ing. Mi ninghiohnak naitu Pathian kut tu i hnenah a um manin, i ngenhnak hmuahhmuah heh kumpimangbawi in i pe sio i.

9 Kumpimangbawi in kaimah hlatu tuhin ralbawite hrekkhat le ralkapte ruai ai Euphrates Nitlak lamah feh ing. I hleng fangin Mangki bawite hnenah kumpimangbawi laikuathnak pe ing.

10 Ikhalselai Beth Horon khuami Sanballat le Ammon mi bawi pakhat Tobiah in, Israel mite phathnak bawn tuhin mi pakhat kawi i, ti a ling fangin thinnuam loin um kawm i.

11 Cen Jerusalem khuapui ah i hleng fangin ni thum song cawlum ing.

12 Jerusalem hrang naper tuhin Pathian in i thinlung songah i relhnak tu aisu khai rel lo ing. Cen zan fangin tho ai i rualpuite tlawmniu thawn feh ing. Zaikhai keng lo i ing; i tohnak siphuh pakhat lek keng i ing.

13 Nitlak lamai phairawn kotka in suak tlang ai hlang lamah zu zianzo ai Rulhreng Cirhti lan ai Hnawmborh kotka kin hleng fangin in zan lai i. Kin vak kongin khuapui kulhhnak vingpui a hnawmhnak le mai ai taihnak kotkate heh sik zianzo i ing.

14 Cen hong leh zianzo ai Cirhti kotka le Kumpibawi tili hleng i ing. I tohnak siphuh in ciami lung le thing lakah lampui hmu thil lo i.

15 Ciamanin Kidron phairawn songah zu zianzo ai siphuh vuman vingpui heh sik kong betbo ing. Kin suakhnak hmun hleng leh ai Phairawn Kotka in khuapui songah lut leh ing.

16 Bawite pakhat bang inkhai konteng feh ai ziang bawn ing, ti i ling lo i. Judah mite, suangbawite, a hotute, bawite le naperhnak ai a teltu tuh pawl pakhat hnen ahkhai zaikhai pong lai lo ing.

17 Tun fang ian in anite hnenah hetihin rel ing: “Jerusalem khua tu hnawm zo sek ai kotkate khai mai in tai zo sek manin zaitluk vansanghnak songah um tlang ising, ti khiah hmu tlang i si. Khuapui kulhhnak vingpui tu din leh ngasing khaw kin thangsiahnak heh boruai tuh ising,” tiin ti ing.

18 Cen Pathian i hnenah a umdan le a bawmhnakte rel ai kumpibawi ai ponghnak hmuahhmuah khai rel sio ing. Ciafangin, “Tho in tungding leh ngasing,” ti tlang i. Pai tlang ai naper pan tlang vut i.

19 Ikhalselai Sanballat, Tobiah le Arabia mi Geshem tihnak in i thil bawnhnak a za tlang fangin hnih i san ai, “Ziang bawn i ing, tiin ruat tlang i si?” Kumpibawi ralcai tuh i ing ti tlang i sim?” ti tianin zoh i suam i.

20 Cen kai in, “Van ai Pathian in hlawhtlinghnak i pe tuh i. Kin tu a cengfa i ing ai a hnawmhnak saleh tuh heh bawn tuh i ing. Ikhalselai ning tu Jerusalem ah covo nai tlang lo i si; thu nai lo ai hap tuh zaikhai nai tlang lo i si,” tiin ti ing.

Zanniat Bible © Bible Society of Myanmar, 2018.

Bible Society of Myanmar
ကြှနျုပျတို့နောကျလိုကျပါ:



ကြော်ငြာတွေ