Nehemiah 1 - Zanniat Bible

¹ Hacaliah ai fapa Nehemiah ai persuakhnak tluanthu tu hetihin i. Artaxerxes kumpimangbawi a cang kum kulhnak, Kislev hla ah kaimah Nehemiah tu Susa khuapui ah um ing.

² Cialai ah i unau pakhat Hannani tu a dang rualpuite thawn Judah ram an hleng tlang i; cen Babylon ram saltanghnak in Jerusalem ah a lettute ai thula zawt ing.

³ Ciatihin i zawt fangin, saltanghnak in suak tlang ai a khua le ramah a hlengtute tu harsahnak tampui tawk tlang ai a hiangai a ummi a dang miphunte in zohsuam tlang ngai i, tiin i rel i. Ciahlaiah Jerusalem kulhhnak vingpui tu min sio ai, mai in a tai hnuaah kotkate khai bawn lai lo i, tiin i rel i.

⁴ Ciami thula i za fangin to in kap ing. Ni tampui song lungsia in um ai zaikhai ai loin rong ul ing. Pathian hnenah sawngen ai,

⁵ “Aw Bawipa, Van ai Pathian, nang tu na thawmlian ai na kihzah ngaingai ing. Nang tu rinsantlak isi ai na ittu le na thupehnak a hluntute vumah na thutiam heh khimruai ṭio isi.

⁶ Aw i Bawipa, na mit in i sik tulai Israel mite na cengfate ca sun le zan in saw i ngenhnak heh na bil in i ngai sah tu hram law. Na vumah Israel mite kin sual tlang ngaingai zo ai ciami kin sualhnak heh phuang ihang ing. Kin pupate sual awng ai kaimah khai i sual ve i.

⁷ Pha lo ze le mawi lo ze in na hmaiah nung tlang i ing. Na thupehnak bawn lo i ing, na cengfa Moses hnenai na pehnak dante heh hlun lo i ing.

⁸ Ikhalselai Moses hnenah, ‘Ning Israel mite sangtlak hlah le i sikhaw ram dang le miphun dang lakah ning piakruai tuh sek ing.

⁹ Ikhalselai i hnenah let in i thupehnak hlun le i sikhaw, vanhang hniaah piak sio na pui i si khaw, kaimah i biahnak tuhin i ril zohnak hmunah ning letruai leh tuh ing,’ tiin na tihnak tu hih tu law.

Jerusalem Hrangah Sawngen I

¹⁰ “Aw Bawipa, hemi minungte tu na cengfate i, nangmah ai minungte i. Na ban thahat le na kut thawmlianpui in na huphnak i.

¹¹ Kai i sawngenhnak le na hming upat nuamtu na cengfa dangte ai sawngenhnak tu kin ngai sah tu hram law. Tunnia ah hlawh i tliangruai tu hram lai Kumpibawi tu i vumah ninghiohnak nairuai tu hram law,” ti ing. Cialai ah kaimah heh kumpibawi cabitti petu ing.