Mipun Siarnak 8 - Zanniat Bible

Maivarhnak Dah I

¹ Bawipa in Moses hnenah,

² “Aaron hnenah rel tulai maivarhnak khuam ah maikhuatte pasarih a var fangin hmai lam tleu tuhin var tuseh,” tiin ti i.

³ A tihnak bangin Aaron in maivarhnak khuam ai maikhuatte heh a hmai lam tleu thai in var i.

⁴ Cia maivarhnak khuam heh, Bawipa in Moses hnenah a pianzia hmuhciahnak bangin a par in a tawham tian pumsuhnak sui in bawnhnak i.

Levi mite Cianghlimruaihnak le Pumaphnak

⁵ Bawipa in Moses hnenah,

⁶ “Levi mite tu Israel mizapui lakin a tumce in dah tulai hetihin cianghlimruai tu:

⁷ Amahte cianghlimhnak tuhin ti phiah tulai a pumpui in hmul met hnuaah amahte hnikpon sawp tuseh. Ciatihin cianghlim tuh i.

⁸ Levi mite in kawlpawcang niu lu khat le rong hibawlhnak hrang a kulhnak olive siti thawn roihhnak sangvut koih tuseh; cen nang in sualhlat hibawlhnak hrang a dang kawlpawcang lu khat koih tu.

⁹ Cen Israel mizapui tu pumkhawmruai tulai Levi mite heh i umhnak Ponhlam hmaiah kawi tlang tuseh.

¹⁰ Cen Israel mizapui in Levi mite lu vumah amahte kut suan tuhai Aaron in i hnenah ap tuseh.

¹¹ Anite tu Israel misenpui lakin a dangniu in a hlaice ai ap mite i ai na i ruaih tuh i.

¹² Cia hnuaah Levi mite in kawlpawcangte lu hnih ai lu vumah amahte kut suan tlang tuseh. Levi mite cianghlimhnak tuhin kawlpawcang lu khat sualhlat hibawlhnak sel tu selai a dang lu khat heh maitai hibawlhnak ah sel tuseh.

¹³ Levi mite tu a dangniu in le a hlaice in i hnenah i pe tulai, amahte hotu ah Aaron le a fapate dah tu.

¹⁴ Ciatihin Levi mite tu Israel mizapui hnenin a tumce in dah tulai i minung cang tuh i.

¹⁵ Levi mite ciatihin na cianghlimruai hnua le na ap hnuaah Ponhlam song napertu tuhin tlak tuh i.

¹⁶ Israel miphun ai fapa upa ber hmuahhmuah ca i ham zohnak i ai kaimah bul ai i.

¹⁷ Egypt ramai Egypt mite fapa upa ber hmuahhmuah i thiruai fangin Israel mite ai fapa upa ber hmuahhmuah le amahte sumhnam fa upa ber hmuahhmuah heh kaimah ai tuhin i cianghlimruaihnak i.

¹⁸ Israel mite fapa upa ber hmuahhmuah aiawh in Levi mite tu kaimah langhnak i.

¹⁹ Ponhlam ai naper tuhin le Hmun Thianghlim ah Israel mite a kawi fangin thihhnak tawk pang tuh loin kilkhawltu ah anite tu Aaron le a fapate hnenah pe zo ing. Ciahlaiah anite tu Israel mite lakin a hlaice in i hnenah ap tuhin i rilhnak mite i,” tiin ti i.

²⁰ Ciamanin Bawipa in Moses hnenai thupeciahnak bangin Moses le Aaron le Israel mite hmuahhmuah in Levi mite heh Pathian hnenah ap tlang i.

²¹ Levi mite tu amahte lala cianghlim dun ai amahte hnikpon sawp tlang ai Aaron in Bawipa hnenah lehsawng tumce ah amah lala pe i. Amahte ca sualhlat cianghlimhnak khai bawn sah i.

²² Ciatihin Levi mite tu Aaron le a fapate ho in Ponhlam songai napertu tuhin a tlak mi ah cang tlang i. Bawipa in Moses hnenah Levi mite vumah bawn tuh thu a pehnak bangin mizapui in bawn tlang sio i.

²³ Bawipa in Moses hnenah,

²⁴ “Levi mite tu i umhnak Ponhlam ah kum kul hluannga khim fangin permer pan tuhai,

²⁵ kum sawmnga khim fangin com tuseh.

²⁶ Cia hnuaah Ponhlam songah permer nuam tlang lai lekhaw a rualpuite bawmtu ian i tuh ihang. Amah hlanlam permer tuh nawn lo i. Ciatihin Levi mite ai naṭuan heh tawlrel sah tu,” tiin ti i.