Mipun Siarnak 5 - Zanniat Bible

Minung Cianghlimlo

¹ Bawipa in Moses hnenah,

² “Israel mite in amahte lakah phar ur a tuarmi le thihnai a suakmi le mithi luang a dai manin a cianghlimlo minung hmuahhmuah heh amahte riahbuk in hnawt tusek seh.

³ Amahte hnenah i umhnak a cam hmun heh ningrimtiar lohnak ah a cianghlimlomi hmuahhmuah nupang ituseh, pasal ituseh, hnawt tusek seh,” tiin thupe i.

⁴ Bawipa ai thupeciahnak bangin Israel mite in hlun tlang ai mi cianghlimlo hmuahhmuah heh amahte riahbuk in hnawt sek i.

Bawnsual Manin Kuanlehhnak

⁵ Bawipa in Moses hnenah,

⁶ a hnia lamai dante tu Israel mite ca pe i. Pasal ituseh, nupang ituseh, midang vumah bawnsual in Bawipa hmaiah rintlak hlah lekhaw,

⁷ a sualhnak phuang tu selai a tisual man heh ciami pa hnenah khimniu in kuan leh hlaiah zatek ah kul belh tuseh.

⁸ Ikhalselai a tuahmawh mi heh thi ai a kuanhnak ngahtu tuh unau suahpui aisu khai nai hlah lekhaw suangbawi in hmang tuhin Bawipa hnenah sel tuseh. Hemi selhnak tu sualhlat hibawlhnak hrang tuucang a selhnak hlaiah a belhhnak i.

⁹ Cen Israel mite in Bawipa hnenah a tumce in hibawl a selhnak hmuahhmuah heh a ngahtu suangbawi ai tuh i.

¹⁰ Suangbawite in a hnenai pehnak lehsawng co tuseh.

Nupui Vumai Umhlahhnak

¹¹ Bawipa in Moses hnenah,

¹² a hnia lamai dante tu Israel mite ca pe i. Pasal naimi nupang in pasal dang thawn sual kawm ai mi ningdulkul ah cang i.

¹³ Ikhalselai a sualhnak heh phuang loin thup ngio i; a sual laitak pom loin a hmutu le um fawn lo napui a pasal in rinlohnak nai ai a nupui vumah umhlah ngio i.

¹⁴ Ciahlahle a nupui tu sualhnak zaikhai nai lo napui a pasal in sang lo i. A nupui a ha ze manin a sang lohnak menma i.

¹⁵ Zaizai inkhai hebang thu um lekhaw a pasal in a nupui heh suangbawi hnenah fehpui tuseh. Rong hibawlhnak hrang ai a kulhnak barley sangvut cuai hrek keng tu selai hibawlhnak sel tuseh. Ikhalselai olive siti le frankincense rimhmui burh maseh. Zaimantifangin hemi tu umhlahtu a pasal in thudik ling nuam manin hibawl a selhnak i.

¹⁶ Suangbawi in ciami nupang nu heh puleng hmaiah suahpui tu selai Bawipa hmaiah dingruai tuseh.

¹⁷ Cen suangbawi in lai bel pakhat lang tu selai a songah tidap ciangfai a cateng in thun tuseh; cen Bawipa umhnak Ponhlam songai laivut lang tu selai, ti khiah tikha cang thai in ti songah phulh tuseh.

¹⁸ Cia hnuaah suangbawi in nupang nu ai samtom hawk tu selai nupang nu kut songah hibawlhnak sangvut dah tuseh. Amah suangbawi in cukcamhnak hlengruaitu tidap heh a bel in koih tuseh.

¹⁹ Cen suangbawi in nupang nu heh, “Pasal dang thawn sual hlahle sikhaw cukcamhnak a hlentu hemi tidap in na siatsuah maseh.

²⁰ Ikhalselai pasal nai puipa in pasal dang thawn sual rori le i sikhaw,

²¹ Bawipa in na hming heh na miphun lakah midang cukcamhnak in hmang tuseh. Bawipa in na rilpum phawruai tu selai na zahmawh khai roruai tuseh.

²² Hemi tidap khiah na pum songah lut in na rilpum heh phawruai tu selai na zahmawh khai roruai tuseh,” tiin cukcamhnak bawnruai tuseh. Ciafangin nupang nu in, “I tu hram seh, Amen,” tiin sawn tuseh.

²³ Cen ciami cukcamhnak heh suangbawi in ngan tu selai a nganhnak bel songai siatti songah tleuh tuseh.

²⁴ Ti heh nupang nu pum songah urhnak roh ngai suakruai tuhin a dingruai hlanah,

²⁵ suangbawi in a nupang nu kut songai um rong hibawlhnak sangvut lang tuhai Bawipa hnenah a hlir hnuaah puleng vumah dah tuseh.

²⁶ Cen hibawlhnak ai selhnak i, ti larruaihnak ah sangvut kuthuam khat in lang tu selai puleng vumah mai in tai tuseh. Cen hnuataber ah cukcamhnak siatti heh nupang nu dingruai tuseh.

²⁷ Pasal dang thawn sual ngaingai lekhaw ciatihin a pum urruai tuhai a rilpum khang tuh amam ai a zahmawh ro tuh deuhdeuh i. A hming heh a miphun lakah cukcam mi i tuh i.

²⁸ Ikhalselai sual hlah lekhaw siatsuahhnak tawk tuh lo ai fa khai nai thil tuh i.

²⁹ Hemi dan tu pasal pakhat in a thunaihnak hnia ai a ummi a nupui umhlah ai pasal dang thawn sual kawm manin rin lohnak a nai fangin hlun tuhhnak dan i.

³⁰ Cen a nupui umhlah menma ai rin lohnak a nai manin khai ituseh hlun tuhhnak dan i. Ciatihin nupang nu heh puleng hmaiah dingruai tuhai suangbawi in ciami hibawlhnak bawn tuseh.

³¹ A pasal heh mawh phur tuh lo ai; ikhalselai a nupui cenin sual lekhaw sualman tuar tuseh.