Mipun Siarnak 16 - Zanniat Bible

Korah, Dathan le Abiram in Moses Ralcaihnak

¹ Levi hin Kohath songkhat Izhar ai fapa Korah tu a fimtum in Moses ralcai i. Ani tu Reuben hin Eliab ai fapate pahnih Dathan le Abiram, le Peleth ai fapa On in hlun tlang i.

² Ciahlaiah mizapui ai rilmi hmingthang Israel mite zahnih le sawmnga inkhai hlun tlang i.

³ Moses le Aaron hmaiah kawi tlang ai, “Ning luan ze i! Kin veksen in Bawipa ai ising ai Bawipa tu kin veksen hnenah um i. Zaimanin Bawipa minungte vumah cuang tumce i?” tiin zuam tlang i.

⁴ Ciami heh Moses in a za fangin laipua ah bokkhup in sawngen i.

⁵ Cen Moses in Korah le a hnuahlunte hnenah, “Thangha ah Bawipa in amah minung kin ihnak heh kin hliah tuh i; amah minung le amah ca ai a rilciahnak mite tu puleng ah kawiruai tuh i.

⁶ Thangha zingniu ah nangmah le na hnuahlunte in mai tawihnak hleng koih tu ih;

⁷ mailing lang tu ilai a vumah rimhmui ning tai hnuaah puleng ah koih tu ih. Ciafangin aisu Bawipa in ril i ti hmu tuh ising. A luan zemi tu ningmah Levi mite i si,” tiin ti i.

⁸ Ciahlaiah Moses in Korah hnenah, “Levi ai fapate, ngai tu ih!

⁹ Amah hiangah ning kawi thil tuhin le Bawipa ai Ponhlam songai ruaihtu ning cang thil tuhin le mizapui ca na ning ruaihthilhnak tuhin Pathian in Israel mizapui songin a dangniu ai ning rilhnak heh thil tenau ah ruat tlang i sim?

¹⁰ Bawipa in amah hiangah nongtu tuhin nangmah le Levi mite ning ril zo i. Tun in suangbawi tuh zuam tum lala i si!

¹¹ Aaron vumah ning phuncamhnak heh a ngaingai in tu nangmah le na hnuahlunte in Bawipa ralcai i si,” ti i.

¹² Cen Moses in Dathan le Abiram ko i. Ikhalselai anite in, “Kawi tuh lo i ing.

¹³ Hemi hampalak le ramcar ah thi tuhin Egypt ram, hnawiti le khoitizu luanghnak ram an kin suahpui heh tawk lo im? Ciahlaiah kin vumah bawi na nuam rih lai i!

¹⁴ Hnawiti le khoitizu dim hmun ramah kin hlenpui lo ai, lo le cabit vuan khai kin co tuhin kin pe lo isi, a zawl tuh lek kin tum ilo isim? Kawi tuh naisai lo i ing,” tiin ti kawm i.

¹⁵ Ciafangin Moses tu a thinraw ai Bawipa hnenah, “Hemite in hibawlhnak tu zaikhai sang sah mah. Anite kalauk lu khat bangkhai lang sah awng lo ing. I zohsuamhnak pakhat khai um lai lo i,” tiin ti i.

¹⁶ Cen Moses in Korah hnenah, “Thangha ah nangmah le na hnuahlunte minung zahnih le sawmnga tu Bawipa ai Ponhlam ah kawi tu ih. Ciata ah Aaron khai kawi tuh ve i.

¹⁷ Maitawihnak hleng koih tu sio ilai a vumah rimhmui ning tai hnuaah Bawipa mithmuh ah sel tu ih,” ti i.

¹⁸ Ciamanin maitawihnak hleng koih tlang ai mailing dah hnuaah a vumah rimhmui tai ai Ponhlam dawngkham ah Moses le Aaron kawm in ding tlang i.

¹⁹ Cen Korah in mizapui kokhawm ai Ponhlam dawngkham ah Moses le Aaron hmaihoi in ding tlang i. Cen cammalak in Bawipa ai huham heh tleuhnak in mizapui hnenah lar ai,

²⁰ Moses le Aaron hnenah Bawipa in,

²¹ “Ning tu ning khel let tu ilai hemite tu tun rori in siatsuah tuh sek ing,” ti i.

²² Ikhalselai Moses le Aaron tu laipua ah bok kawm ai, “Aw Pathian, nang tu nunhnak hmuahhmuah hampui isi. Mi pakhat a sual fangin mizapui vumah na thinraw tuh isim? tiin ti kawm i.

²³ Ciafangin Bawipa in Moses hnenah,

²⁴ “Mizapui tu Korah, Dathan, le Abiram te hlam in thawn tuhin rel tu,” tiin ti i.

²⁵ Cen Moses tu Israel hotute in hlun ai Dathan le Abiram umhnak ah feh tlang i.

²⁶ Cen mizapui hnenah, “Hemi misuaksualte hlam in tlan tu ih; amahte thilri pakhat khai dai mah ih. Ciahlahle amahte sualhnak manin amahte thawn ningmah khai ning siatsuah tuh sio i,” tiin ti i.

²⁷ Ciamanin Korah le Dathan le Abiram te hlam in mizapui tu tlan tlang sek i. Dathan le Abiram tu a nupui le a fate thawn suak ai hlam dawngkham ah ding tlang i.

²⁸ Cen Moses in mizapui hnenah, “Hemi thil bawn tuhin Bawipa in i hlat i. Kaimah daihhnak in i bawnhnak ilo i, ti khiah hemi in ling tlang tuh i si.

²⁹ Hemi minungte heh Pathian hnenin cawhhnak zaikhai tawk loin amah hlanlam in thi lekhaw Bawipa ai hlathnak i tuh lo ing.

³⁰ Ikhalselai laivum minung ai ling awng lohnak thil Bawipa in bawn ai laipua kak in amahte naihnak veksen thawn thon sio in a nungcing in mithi khua Sheol ah feh lekhaw he minungte in Bawipa a hnawl tlang manin i, ti ling tuh i si,” tiin ti i.

³¹ Ciatihin a ti ben sawng fangin Dathan le Abiram fonhnak laipua heh kak ai,

³² amah le a innsangte le Korah hnuahlunte le amahte thilri hmuahhmuah thawn thon sio i.

³³ Ciatihin a nungcing in amahte thilrite thawn mithi khua ah lut tlang i. Amahte vumai laipua heh cip leh ai pairal tlang sek i.

³⁴ Amahte kap aw le au aw tu ciata hiangai umtu Israel mite in za fangin dawp tlang ai, “Tlan tu ih, laipua in kin thon tuh ve i,” tiin au tlang murhmo i.

³⁵ Cen Bawipa in mai hlat ai rimhmui hibawlhnak seltu minungte zahnih le sawmnga tu kang sek i.

Maitawihnak Hleng

³⁶ Cen Bawipa in Moses hnenah,

³⁷ “Suangbawi Aaron ai fapa Eleazar rel tulai maitawihnak darhlengte tu a cianghlim imanin mai aai kanghnak mithi luang vutkuang umhnak an hlengte lang tulai mailingte heh hmundang ah piak tusek seh.

³⁸ Bawipa ai puleng ah selhnak a bawn fangin he hlengte tu thilri cianghlim ah cang i. Ciamanin a sual manin a thitute ai maitawihnak hleng khiah lang tulai pakan bangin pek sek in seu tu. Cen puleng khukhnak ah bawn tu. Israel mite in ralringhnak in hmang tlang tuseh,” tiin ti i.

³⁹ A tihnak bangin suangbawi Eleazar in maitawihnak hlengte lang ai pakan pek ah seu ai puleng khukhnak ah bawn i.

⁴⁰ Hemi tu Aaron hin siarlo aisu khai Bawipa ai puleng ah kawi in rimhmui tai thil tuh lo i, ti ralringruaihnak i. A bawntu um lekhaw Korah le a minungte bangin siatsuahhnak tawk tuh i. Moses hnenai Bawipa ai thupehnak bangin he a vumai bawn tuhhnak khiah Eleazar in bawn sio i.

Aaron In Mipuite Osuak I

⁴¹ A thangha fangin Israel mizapui in Moses le Aaron vumah phuncam tlang ai anite hnenah, “Ningmah in Bawipa ai minung hrekkhatte rek berh isi,” tiin ti tlang i.

⁴² Kokhawm dun ai Moses le Aaron vumah a cam tlang hnuaah Ponhlam lam a sik tlang fangin mairo in Ponhlam heh tuam ai Bawipa huham tleu lar khiah hmu tlang i.

⁴³ Ciafangin Moses le Aaron feh in Ponhlam hmaiah ding kawm ai,

⁴⁴ Bawipa in anite hnenah,

⁴⁵ “Hemi minungte hnenin hnuaah let tu ih; cammalak in siatsuah tuh sek ing,” tiin ti i. Ciafangin lai ah bok ai,

⁴⁶ Moses in Aaron hnenah, “Na maitawihnak hleng lang tulai a songah puleng ai mailing dah in mailing vumah rimhmui hlak tu. Cen mizapui hnenah rang ngai in feh tulai amahte ca mawhhlat hibawlhnak sel tu. Rang tu! Bawipa ai a thinrawhnak pan zo ai pul tlung ihang,” tiin ti i.

⁴⁷ A ti bangin Aaron in bawn ai a maitawihnak hleng koih in mizapui lakah dawp i. Pul tlung zo ai ur tlang zo, a hmu fangin rang ngai in mailing vam vumah rimhmui hlah ai mizapui ca kuan leh hibawlhnak sel i.

⁴⁸ Ciami in pul tlung lawmruai ai mithi le minung lakah Aaron ding i.

⁴⁹ Korah raltho tum manin a thitute siar loin he pul tlung manin a thitute tu thawng hlaili le za sarih i.

⁵⁰ Pul tlung a lawm fangin Aaron tu Ponhlam dawngkham hiang Moses hnenah let i.