Mipun Siarnak 1 - Zanniat Bible

Hmasaber Mipum Siarhnak

¹ Israel mite Egypt ram an a suak hnua kum hnihhnak a hla hnihhnak ai ni hmasaber nia ah, Sinai Nelrawn ai ummi Pathian umhnak Ponhlam songah Bawipa in Moses hnenah thurel i. A thurelhnak tu hetihin i:

² “Nangmah le Aaron in Israel mite tu amahte hin ṭen le amahte innsang ṭen in mipum siar tu ih. Kum kul le a vum lam pasal,

³ ralkap lut thai mi zongzong khiah a hmingkhum tu ih.

⁴ Ning bawmtu tuhin hinkhat in amahte miuk ṭen sawm tu ih.

⁵ Ciami miuk ṭen heh a hnia lamai bangin i: Reuben hin in Shedeur ai fapa Elizur,

⁶ Simon hin in Zurishaddai ai fapa Shelumiel,

⁷ Judah hin in Amminadab ai fapa Nashon,

⁸ Issakhar hin in Zuar ai fapa Nathanael,

⁹ Zebulun hin in Helon ai fapa Eliab,

¹⁰ Joseph ai fapate: Epharaim hin in Ammihud ai fapa Elishama; Manasseh hin in Padahzur ai fapa Gamaliel,

¹¹ Benjamin hin in Gideon ai fapa Abidan,

¹² Dan hin in Ammishaddai ai fapa Ahiezer,

¹³ Asher hin in Ochran ai fapa Pariel,

¹⁴ Gad hin in Duel ai fapa Eliasaph,

¹⁵ Naphtali hin in Enan ai fapa Ahira,

¹⁶ A vumai miukte tu amahte hin ṭen ah hotu i ai mipum siar napertu tuhin rilhnak i,” tiin ti i.

¹⁷ Hemi miukte hlaihnih heh Moses le Aaron in sawm ai;

¹⁸ Hlahnihhnak ni hmasaber nia ah Israel mite tu amahte veksen in kokhawm sio i. Israel mite veksen in amahte hin ṭen le innsang ṭen in mipum hmingkhum ai Bawipa thupeciahnak bangin,

¹⁹ kum kul le a vum lam pasal hmuahhmuah siar ai hmingkhum sio i. Sinai nelrawn ah Moses in Israel mite mipum hmingkhum i.

²⁰ Ralkap a per thai pasal kum kul le a vum lam tepawl tu amahte hming rori in, Jacob ai fapa upa ber Reuben hin ai panin amahte hin le innsang fekfek ṭen in, laibu ah khum i. Mipum hmingkhumhnak tu a hnia lamai bangin i:

²¹ Reuben hin in thawng sawmli le thawng ruk le za nga,

^22-23 Simeon hin in thawng sawmnga thawng kua le za thum,

^24-25 Gad hin in thawng sawm li thawng nga le za ruk sawm nga,

^26-27 Judah hin thawng sawmsarih thawng li le za ruk,

^28-29 Issakhar hin in thawng sawm nga thawng li le za li,

^30-31 Zebulun hin in thawng sawm nga thawng sarih le za li,

^32-33 Epharaim hin in thawng sawm li le za nga,

^34-35 Manasseh hin in thawng sawmthum thawng hnih le zahnih,

^36-37 Benjamin hin in thawng sawmthum thawng nga le za li,

^38-39 Dan hin in thawng sawmruk thawng hnih le za sarih,

^40-41 Asher hin in thawng sawmli thawng khat le za nga,

^42-43 Naphtali hin in thawng sawmnga thawng thum le za li,

^44-46 A veksen kom fangin ting ruk thawng thum za nga le sawmnga i.

⁴⁷ Ikhalselai Levi hinte tu mipum siarhnak ah tel lo i.

⁴⁸ Zaimantifangin Bawipa in Moses hnenah,

⁴⁹ “Israel mite ralkap per thil tuhin mipum ning siar fangin Levi mite tu telh mah ih,” tiin ti i.

⁵⁰ Ciahlaiah Bawipa in Moses hnenah, “Levi mite tu i Ponhlam le a songai hmanghnak thilrite kilkhawltu ah dah tu. Ponhlam le a thilrite tu anite in phur tuhai phatak niu in sik tuseh; amahte riahbuk khai Ponhlam ai cingkim ah sa tlang tuseh.

⁵¹ Ning riahbuk ning thawn fangin Levi mite in Ponhlam bal tuhai cam hmun a thar in ning khuar fangin ciata ah amahte in saleh tuseh. Midang aisu khai Ponhlam hiangah kawi lekhaw rekhnak tuar tuseh.

⁵² Israel mite tu a bur a bur in amahte riahbuk sa tlang tu selai aisusu khai amahte hin ṭen ai thantar hnia ṭen ah sa tuseh.

⁵³ Ikhalselai Ponhlam hiangah aisu khai kawi tuh loin le i thinrawhnak heh Israel mite vumah a hleng lohnak tuhin Levi mite in amahte Ponhlam cingkim ah riahbuk sa tlang tuhai kilkhawl tuseh,” tiin ti i.

⁵⁴ Bawipa in Moses hnenah a thupeciahnak bangin Israel mite inkhai bawn i.