Mikah 3 - Zanniat Bible

Micah In Israel Hotute Mawhhluk I

¹ Israel uktute khai ngai tu ih! Dikcanglairelhnak a daihtu tuh inapui i si ai,

² Phathnak a huatu le hnophnak a daihtu ṭio i si. I minungte tu a nungcing in amahte vun hawk sah ai amahte ruh in a tik kheuh sah i si.

³ I minungte sa ai sek i si. Amahte vun hawk sah ai a ruh ek sah hnuaah bel in suang tuhin sat ai tan sek i si.

⁴ Bawipa hnenah ning au dekdo can hleng leh tuh i. Ikhalselai ning sawn tuh lo i. Thil siava ning bawn manin ningmah lam sik loin hmundang ah ning hoisan tuh i.

⁵ Tangka petu hnenah daphnak um tuh i tiin thukham ai tangka pe lotu hnenah tu ral tlung tuh i tiin a hringtu prophette in i minungte zawl sio i. Hebang prophette hnenah Bawipa in,

⁶ “Aw prophette, ning can a bo dawn ihang. Ni in ning liam san cing tuh i. Zan in ning khuk tuh i. Larhnak hmu tuh nawn lo ai hmai lam thu phuangthilhnak zaikhai nai tuh nawn lo i si,” tiin ti i.

⁷ Hmai lam thu a reltute tu amahte relhnak a khim lo manin mualpho in um tuh i. Pathian in a thu sawn lo manin amahte veksen in zakthi in um tuh i.

⁸ Ikhalselai kai tu Israel mite sualhnak ziang i ti rel tuhin Bawipa in a rauhla le huham thawn i dimruai ai dikcang niu in thukhanthilhnak le ralphahnak i pe i.

⁹ Aw Israel uktute, dikcanglairelhnak a hua ai thil pha khiah thil sual ai a cantute ningmah in i ngai tu ih!

¹⁰ Pathian ai khuapui Jerusalem tu mirekhnak le dikcanglohnak vumah sa thliahthlo i si.

¹¹ Khuapui uktu bawite in nawhthuh daih in thukhan i; suangbawite in sumhnam ngah nuam in Dan laibu zirhfiang ai prophette in tangka daih in hmai lam thu phuang i; cen amahte veksen in, “Kin hnenah Bawipa um i,” ti sio i. “Kin vumah thil poimawh zaikhai hleng tuh lo i. Bawipa tu kin hnenah um i,” ti i.

¹² Hemi bangtluk ning imanin Zion tu lo bangin vai tuh sio i. Jerusalem khua tu khuarop ah cang tuhai Biakinn umhnak mual tu tupui ah cang tuh i.