Matthai 3 - Zanniat Bible

Baptisma Petu John Ai Thurelhnak

¹ Ciami tikcucan dungso ah baptisma petu John tu Judea peng ramkhing ah hleng ai thurel i.

² “Vancung ukhnak nong zo i. Ning sual sir tu ih,” tiin ti i.

³ Prophet Isaiah in, “Mi pakhat tu hampalak ah au ai, ‘Bawipa caah lampui sel tu ih, A fehhnak lampui cangruai tu ih,’ ti i,” ti ai a tihnak, a rel nuamhnak tu John i.

⁴ John ai hnikpon tu kalauk hmul ai takhnak i, a elpen tu savun ai bawnhnak i ai a rong tu khokhuak le hampalak khoitizu i.

⁵ Jerusalem an ituseh, Judea ram khuahacang an le Jordan runpui hiang dungso an ituseh, a hnenah mi kawi tlang i.

⁶ Amahte sualhnak phuang tlang ai Jordan runpui ah baptisma pe i.

⁷ John in Farasi le Sadusite a hnenah baptisma lang tuhin a kawi tlang hmu fangin, “Aw rul hin hrokhrawl pawl, a hleng tuhhnak Pathian ai cawhhnak songin ning luat thil tuh i, tiin aisu in ning rel i?

⁸ Ning sual sirhnak khiah ning nuncan in larruai tu ih.

⁹ “Abraham tu ci kin sentu kin pu i,’ tiin ti ai cawhhnak in kin luat tuh i, tiin ruat mah ih. Thutak ning rel ing: Pathian tu he lungtote rin Abraham ai tesinfa ah bawn thil i.

¹⁰ Thingkung hamah haihpui dah cialep in um zo i. Thai pha a thai lotu thingkungte vawng tuh sek ai mai songah lon tuh sek i.

¹¹ Ning sualhnak sir tlang i si ti larhnak tuhin kaimah in ti thawn baptisma ning pe ing, ikhalselai i hnua ai a hlengtu tuh pa tu Rauhla Thianghlim le mai thawn baptisma ning pe tuh i. Ani tu kaimah tahin lian deuh i; kai tu a kedawl awhtu tuhin rin i tlak lo i.

¹² A kut songah fang khaphnak ṭangṭa awh i. Fang mu tu benpui songah khum tuhai fanghite tu a hmit awng kel lo mai songah lon tuh i,” tiin ti

Jesuh In Baptisma Langhnak

¹³ Cia can ah Jesuh tu Galilee in Jordan Runpui ah John ai baptisma pehnak lang tuhin kawi i.

¹⁴ Ikhalselai John in a hnenah, “Kaimah sawn heh na hnenah baptisma lang tuhhnak ing, zaimanin nangmah sawn lehlam i hnenah kawi isi?” tiin zawt i.

¹⁵ Ikhalselai Jesuh in, “Tun tu hetihin i tu ngawn seh, Zaimantifangin Pathian in bawn tuhin i ruaihnak tu hetihin khimruai tuh sio i,” tiin ti i. A tihnak bangin John inkhai a lung khim i.

¹⁶ Jesuh tu baptisma a lang ngah sawng fangin ti songin suak i. Ciafangin van hong ai Pathian ai rauhla tu khuro bangin zuktolh ai a vumah a khop khiah hmu i.

¹⁷ Cen van in aw pakhat in, “Hemi pa tu i ithnak i Fapa i, a vumah lung i khim ngai i,” tiin ti i.