Matthai 13 - Zanniat Bible

Hlaici Pawitu Santehhnak

¹ Cia nia thotho ah Jesuh tu inn in suak ai tili kamah vak ai a to hnuaah thuzirh i.

² A hiangai a kawitu misenpui a tam ze manin khawm songah lut ai to i. Mipui tu tili kamah ding tlang i.

³ Santehhnak hmang in thu tampui zirh i: “Vaikhat ah mi pakhat tu hlaici vorh tuhin feh i.

⁴ Hlaici tu lo songah a vorh fangin a hrekkhat tu lampui vumah fu ai ciamite heh vaniu in ai sek i.

⁵ A hrekkhat tu laipua tlawmhnak lung lakah fu ai laipua a sah lo manin hlaici tu po zual i.

⁶ Ikhalselai ni a sa fangin a po sawngniu pawl tu thi leh sek i; a ham in laipua thukpui ah a hnuk hla hmun um lo manin ro leh vut i.

⁷ Hlaici hrekkhat tu hlingbur lakah fu ai po ve napui le hlingbur in det meng manin khang thil lo i.

⁸ Ikhalselai cimu hrekkhat tu laipua phahnak ah fu ai a let zakhat, a let sawmruk, a let sawmthum in rong suah i,” tiin rel i.

⁹ Jesuh in, “Ngaihnak bil a naitu hmuahhmuah in za tu ih,” tiin ti i.

Santehhnak Ai Tumtekhnak

¹⁰ Cen a hnuahlunte a hnenah kawi tlang ai, “Mipui hnenah thu na rel fangin zaimanin santehhnak hmang de isi?” tiin zawt tlang i.

¹¹ Jesuh in anite hnenah, “Vancung Ukhnak thuthuk lingthilhnak heh ning hnenah pe zo ihang. Ikhalselai misenpui hnenah tu pe lo i.

¹² Zaimantifangin a naitu hnenah a hlaifuan in a nai tianin pe bet tuhai a nai lotu hnenin a naihsun niu khai lang sah tuh lai i.

¹³ Zaimanin amahte hnenah i pong fangin santehhnak hmang ing ti fangin anite in sik napui hmu lo i, ngai napui za lo i, cen ling khai ling thil lo i.

¹⁴ Ciamanin prophet Isaiah ai relciahnak khiah amahte vumah khim i. Prophet Isaiah in: ‘Hemi minungte tu ngai tlang tuh thliahthlo napui ling thil tuh lo i. Sik tlang tuh hnelhno napui hmu thil tuh lo i.

¹⁵ Zaimantifangin amahte thinlung a pit ze i, amahte thuzahnak bil pit ai amahte mit khai thak lo i. Ciatih bangin i ta awng hlah selai amahte mit in hmu tuhai, amahte thinlung inkhai lingthiam tlang tuh i. Ciatihin kaimah lamah her tuhai cakruai leh tuh ing, tiin Pathian in ti i,’ tiin rel i.

¹⁶ “Ikhalselai ning tu zaitlukin bawng ning pha i! Ning mit in khua hmu ai ning bil inkhai khua za tlang i si.

¹⁷ Fiang ngai in ning rel ing: ning hmuhnak le ning zahnak heh prophet tampui le Pathian ai minung tampui in hmu le za nuam ngai napui hmu thil lo ai za thil tlang lo i.

Jesuh In Relfiang I

¹⁸ “Ciamanin he hlaici pawi santehhnak ai a sullam heh ngai tu ilai ling tu ih.

¹⁹ Lampui lai ai a fuhnak hlaici tu vancung Ukhnak thu za napui a sullam a ling thil lotute i. Amahte thinlung songah vorhhnak heh Mihrokhrawl pa in lang sah leh lio i.

²⁰ Lungto lakai a fuhnak hlaici tu vancung Ukhnak thu a za sawng fangin lungawi ngai in a pomtute i.

²¹ Lungawi ngai in pom napui amahte songah a thukpui tian phum lo ai a raipui rai lo i. Amahte pomhnak thu manin harsahnak le cawhhnak a hleng fangin let vut i.

²² Hlingbur lakai a fuhnak hlaicite tu vancung Ukhnak thu za napui laivum nunhnak thula ah donhar in a umtute i. Sum le saw daihhnak in cia thu heh tuam meng ai a thai nai thil lo i.

²³ Lai pha ai a fuhnak hlaicite tu vancung Ukhnak thu amahte bil in za ai a sullam khai a ling thiamtute i. Anite in thai nai tlang ai a let zakhat, a let sawmruk, a let sawmthum tian thai i,” tiin rel i.

Hampa Santehhnak

²⁴ Jesuh in santehhnak a dang pakhat rel lala ai, “Vancung Ukhnak tu hebang i. Mi pakhat in a lo songah hlaici pha pawi i.

²⁵ Zan khat ah mi zongzong a mitmu laitak ah a ralpa kawi ai hlaici lakah hampa ci vorh sah ta ai tlan teu i.

²⁶ Rong po tu khang ai a vui fangin hampate khai lar ve i.

²⁷ Cen a hnenumte a hnenah kawi ai, ‘Bawipa, na lo songai na pawihnak tu hlaici pha ita lo im? A konteng in hampa hleng ini?’ tiin zawt tlang i.

²⁸ Ani in, “Hemi a bawntu heh kin ralpa i,” tiin sawn i. Anite in, ‘Hampa tu phai tuh i ing maw?’ tiin zawt tlang lala i.

²⁹ Ciafangin ani in, “Phai mah ih, zaimantifangin hampa ning phai fangin rong kung khai phai ngah pang tuh i si.

³⁰ Rong khawm a cu hlanlo rong kung le hampa tu khang tlang tu ngawn seh. Cen rong khawmtute heh a hmasaber ah hampa phai tu ilai ning tel hnuaah mai in tai tu ih; cia hnuaah rong khawm tu ilai i rong been songah thun tu ih,’ ti tuh ing,” tiin rel i.

Pakap Ci Santehhnak

³¹ Jesuh in santehhnak a dang pakhat rel lala i, “Vancung Ukhnak tu hebang i. Mi pakhat in pakap ci lang ai a lo songah pawi i.

³² Hlaici hmuahhmuah lakah a cik ber hlaici i. Ikhalselai po ai a khang fangin tu rong kung lakah a lianber i. Thingkung bangtluk i ai vaniute khai kawi le a kak lakah bu sa tlang i,” tiin ti i.

Col Santehhnak

³³ Jesuh in santehhnak pakhat anite hnenah rel lehthio i. “Vancung Ukhnak tu nupang pakhat in col tlawmniu lang ai sangvut relkhat songah phulh thawn bang i. Ciami col tlawmniu in sang bawm khat khiah a veksen in thoruai sio i,” tiin ti i.

Santehhnak A Hmangdan

³⁴ Jesuh in hebang thute khiah misenpui hnenah a rel fangin santehhnak hmang de i. Santehhnak hmang loin anite hnenah zaikhai rel awng lo i.

³⁵ Hetih bangin a relhnak tu prophet ai relhnak a khimruai tuhin i. Prophet relhnak tu: “Aite hnenah i pong fangin santehhnak hmang tuh ing; Laivum ham panin ling awng lohnak thil heh anite hnenah phuang tuh ing,” ti i.

Jesuh In Hampa Thu Fiangruai I

³⁶ Jesuh in misenpui tu fehsan ai inn songah tlum i. Ciafangin a hnuahlunte a hnenah kawi tlang ai, “Lo songah hampa santehhnak a sullam kin rel tu,” tiin ti tlang i.

³⁷ Jesuh in, “Hlaici pha a pawitu heh Mi Fapa i.

³⁸ Lo tu he laivumpui i; hlaici pha tu vancung Ukhnak a cotu minungte i ai hampa tu Mipha lo pa ai minungte i.

³⁹ Hampa ci a vorhtu kin ral tu Satan i. Rongkhawm can tu san bo can i ai rongkhawmtute tu vancungmite i.

⁴⁰ Hampa tu khawm ai mai in tai sek i; ciatih bangin san bohnak can ah cang tuh ve i.

⁴¹ Minung Fapa in a Ukhnak songin mi a sualruaitu le thil sual a bawntute sumpua ah suah tuh sek in a vancungmite hlat tuh i.

⁴² Ciamite tu maipui songah hla tuhai ciata ah kap kongin kamriat tlang tuh i.

⁴³ Cen Pathian in a minungte tu a Pa Pathian ai Ukhnak songah ni bangin tleu tuh i. Ngaihnak bil a naitute in za tu ih,” tiin ti i.

Thuphnak Hlawnthil Santehhnak

⁴⁴ “Vancung Ukhnak tu lo songah thuphnak hlawnthil bang i. Ciami hlawnthil tu mi pakhatkhat in a hmu fangin phatak niu in khuk le lungawi aipuang in a inn ai a naihnak hmuahhmuah khiah zuar ai cia lo heh lai i,” tiin Jesuh in rel i.

Lung Mankhung Santehhnak

⁴⁵ “Vancung Ukhnak tu hebang i. Sumpaitu pakhat in keplung mankhung si i.

⁴⁶ A man a khung ngai keplung a hmu fangin a naihnak dang hmuahhmuah heh zuar ai ciami lung khiah lai i,” tiin rel i.

Sur In Santehhnak

⁴⁷ “Vancung Ukhnak tu tili songah vorhhnak sur bang i. Nga pomtu hrekkhat in amahte sur tu tifingriat songah vorh ai nga a phuncang awk i.

⁴⁸ A sur a dim fangin ti kamah duk tlang ai amahte toh hmunin nga heh ril tlang i; nga pha pawl tu amahte bawm songah thun ai nga pha lote tu lon sek i.

⁴⁹ Ciatih bangin san bohnak can ah cang tuh i; vancungmite feh tlang tuhai mipha pawl lakin hrokhrawl mite tu khan tuhai,

⁵⁰ maipui songah lon tuh i. Ciata ah kap in rung tlang tuhai kamriat tlang tuh i,” tiin ti i.

Thudik Thar Le Hlun

⁵¹ Mipui tu Jesuh in, “Hemi thu hmuahhmuah heh ling thil aw i sim?” tiin zawt i. Anite in, “Ling i ing,” tiin sawn tlang i.

⁵² Ciafangin Jesuh in, “Ciatih ilekhaw vancung Ukhnak thu a zir zomi dan zirhtu zongzong khai a thilri dahhnak inn songin thil hlun le thil thar a suahtu, inn naitu pa bang i,” tiin rel i.

Nazareth Ah Jesuh Hnawl I

⁵³ Jesuh in he santehhnakte a rel ben fangin ciata in suak ai,

⁵⁴ a khua ah tlung i. Synagogue ah thu zirh ai a thu a zatute tu ngaihsunur ngai i. “Hemi bangtluk fimhnak heh akonan lang ini?” tiin zawt dun murhmo i. “Hemi bangtluk ngaihsunurkul heh akontih in bawn thil ini?

⁵⁵ Lettama ai fapa ita lo im? Mary tu a nu ita lo im? A naute tu James, Joseph, Simon le Judas ita lo im?

⁵⁶ A farnute khai heta ah um sio ilo im? Akonan hebang heh lang ini?” tiin ti tlang i.

⁵⁷ Ciatihin Jesuh tu hnawl tlang i. Jesuh in anite hnenah, “Prophet tu amah ai tehnak khua le innsang siarlo hmundang ah upathnak tawk i,” tiin ti i.

⁵⁸ Sanghnak nai tlang lo manin ciata ah ngaihsunurkul tampui bawn lo i.