Matthai 11 - Zanniat Bible

Baptisma Petu John Ai Hlathnakte

¹ Jesuh in a hnuahlunte hlaihnih hnenah thu a rel ben fangin cia hmunin suak ai a hiangai khua songah thuzirh tuh le thuphuang tuhin feh i.

² Thawng songin baptisma petu John in Khrih ai bawnhnak thula a ling sio fangin amah hluntute hrekkhat hlat ai,

³ “Kawi tuh i ti ai amahte tihnak mi tu nangmah ihang sim? ihlahle midang iang tuhlai i ing maw?” tiin Jesuh khiah zawt tlang i.

⁴ Ciafangin Jesuh in, “Feh ta tu ilai ning hmuhnak le ning linghnak heh John hnenah rel tu ih;

⁵ Mitcawte in khua hmu i, kebai mite in lamvak thil i. Mipharte khai thiang i. Na ngongte in khua za i. Mithite thoruai leh ai mifarahte hnenah Thuthangpha phuang i.

⁶ Kaimah ai thula ahhen thinlung aicanhnak a nai lotu heh mihmuifu i,” tiin ti i.

⁷ John ai hnuahlunte a feh leh hnuaah Jesuh in misenpui hnenah John ai thu khiah rel i. “John hnenai nelrawn ah ning feh fangin ziang hmu tuhin ruat i si? Hlivua in a hmut manin a hlin hnelhno phaikung maw?

⁸ Ziang sik tuhin feh tlang i si? Hnikpon mawi ngaingai a siltu pa sik tuhin maw? Ciabang hnikpon a siltu heh kumpibawi inn ah a umtute i.

⁹ I rel tucuk ih, ziang hmu tuhin feh tlang i si? Prophet sik tuhin maw? I, prophet hmu tlang i si. Ikhalselai ning hmuhnak mi tu prophet tahin lian sawn i.

¹⁰ Zaimantifangin John thula heh Lai Thianghlim in, ‘Pathian in nangmah caah lampui seltu tuhin na hmaiah i nalang hlat tuh ing, ti i,’ tiin ngan i.

¹¹ Fiang ngai in ning rel ing. Nupang ai tehnak baptisma petu John tlukin a lianmi aisu khai um awng lo i. Ikhalselai vancung ukhnak ai mi nauta ber rin John tahin lian sawn lai i.

¹² John thurel can ai panin tun tian vancung Ukhnak tu tawnghnak a roh ngai tawk ai mitlatsia pawl in khengkhebel in lang tum tlang i.

¹³ Hlanlai ai panin John san tian Prophette le Moses Dante in he vancung Ukhnak thu heh rel tlang zo i.

¹⁴ Amahte thurelhnak sang ning nuam lekhaw John heh kawi tuh i tiin a rel cia mi Elijah khiah amah ihang.

¹⁵ Ciamanin ngaihnak bil a naitu hmuahhmuah in za tuseh.

¹⁶ “Tun san minungte tu ziang thawn santeh tuh ing? Anite tu thil zuarhnak hmunai a totu naupangte thawn bang dun i. Naupang bur khat in a dang naupang burkhat hnenah,

¹⁷ “Mopuai khuang le dar ning tum sah napui lam ning nuam lo i! Mithi phumhnak la sa napui kap ning nuam cuanglo i,’ ti tlang i.

¹⁸ John a kawi fangin rong ul ai cabitti khai ding loin a um fangin mi zongzong in ‘A songah khuasia lut i,’ ti tlang i.

¹⁹ Cen Minung Fapa kawi in a ai le a ding hmu fangin mi zongzong in, ‘Hemi pa heh sik tucuk ih! Mi rongak le rongham zu ding pa heh; siahkhawltu le misualte ai rualpui i,” ti tlang i. Ikhalselai Pathian ai fimhnak tu a dik i tiheh a naperhnak in larruai i,” tiin ti i.

A Sang Lo Khuate

²⁰ Jesuh in ngaihsunurkul thil tamber a bawnhnak khua mite in sualhnak sir tlang cuanglo manin hau i.

²¹ “Aw, Khorazin khua, bawng na sia ze i! Aw Bethsaida khua, hmai lam na pit i! Ning songai ngaihsunurkul i bawnhnak tepawl tu Tyre le Sidon khua ah bawn awng ita selai cia khuasong mite in amahte sualsirhnak larruai tuhin vaidip hnikpon sil in vutkuang phulhdunhnak raipui tuh zo i.

²² Fiang ngai in ning rel ing: Thukhanhnak nia ah Pathian in ningmah tahin Tyre le Sidon khua mite vumah ninghiohnak tam sawn nai tuh i.

²³ Cen nang Capernaum khua! Van tian ai dohnak i na pui si khaw mithi khua ah hlahnak tuar tuh isi! Na songai bawnhnak ngaihsunurkul tepawl heh Sodom khua ah bawn awng ita selai hnawm loin tunnia tian kho tuhlai i.

²⁴ Fiang ngai in ning rel ing. Thukhanhnak nia ah nangmah tahin Sodom khua vumah Pathian ai ninghiohnak tam sawn nai tuh i,” tiin ti i.

I Hnenah Cawlum Tu Ih

²⁵ Cialai ah Jesuh in, “Aw i Pa, lai le van ai Bawi! mifim le mithiam hnenin na thup ngiohnak heh tunin zaikhai a thiam lomi hnenah na larruai manin thang na phat ing.

²⁶ I, i pa, hebang cang tuhin heh na daihhnak i.

²⁷ “I Pa in i kut songah zaizongza i pe zo i. Pa siarlo aisu inkhai a Fapa ling lo i; Cen Fapa le Fapa in ling tu ve seh tiin a ril mite siar lo, aisu inkhai Pa ling tlang lo i.

²⁸ “Thilrit a phurtu le rimsu a tuartute, i hnenah kawi tu ih, cawlumhnak ning pe tuh ing.

²⁹ I hak heh phur tu ih. Kai tu nunnem le thinniam mi ing. Kaimah hnenin zir tu ilai cawlumhnak ngah tuh i si.

³⁰ Zaimantifangin I hak tu a phur hiam ai, I thil khai a zangniu i,” tiin ti i.