Marka 7 - Zanniat Bible

Pupate Ai Thuzirhhnak

¹ Jerusalem an a kawitu Farasite hrekkhat le Danthiam mite hrekkhat tu Jesuh hnenah leng tlang i.

² A hnuahlunte hrekkhat tu kut som loin rong a ai tlang heh hmu i; rong ai hlanah ning kut som tuh i si, tihnak bangin amahte kut som lo i, tihnak i.

³ Zaimantifangin Farasi mi ituseh, a dang Judah mite ituseh, amahte veksen in a pupate ai zirhhnak hlun tlang i; amahte dan bangin kut som loin rong ai lo i;

⁴ cen dawr ai a laihnak thil khai a dan bangin som hlah lekhaw ai tlang lo i. Cen a pupate ai thuzirhnak khuat somdan, bel somdan, dar hleng somdan le khuahluan somdan tibang pawl khai hlun tlang i.

⁵ Ciamanin Farasite le Danthiam mite in Jesuh khiah, “Zaimanin na hnuahlunte in kin pupate ai kin zirh awnghnak dan bangin nung loin kut som lopui in rong ai tlang i?” tiin zawt tlang i.

⁶ Jesuh in, “Prophet Isaiah in ningmah ai thula a rel awng fangin a dik ze lawmlam i! Ningmah mi phalaktla pawl, ning thu tu hetihin ngan i: Pathian in “Hemi minungte in a ponkam ian in i upat tlang i; A thinlung tu i hnenin a hla ze i.

⁷ Kaimah i bia heh a lovang i, Zaimantifangin minung ai bawn fawmhnak dan heh Pathian ai pehnak dan bangin zirh tlang i,’ ti i.

⁸ Ningmah in Pathian ai thupehnak tu hlum tlang ai minung zirhhnak sawn hlun tlang i si!” tiin ti i.

⁹ Cen Jesuh in a peh in, “Ning thuzirhhnak khoruai ai Pathian pehnak dan hnawl heh thiam tlang ngai i si!

¹⁰ Zaimantifangin Moses ai thupehnak songah ‘Ning nu le pa upat tu ih,’ ti le ‘A nu ituseh a pa ituseh, a cukcamtu heh rekhnak tuar tuh i,’ tiin um i.

¹¹ Ikhalselai ning incen ‘Mi pakhat in a nu le pa heh: ningmah bawmhnak hrangah i tihnak thilri heh Korban i, ti lekhaw, (korban tihnak tu Pathian ai i tica i)

¹² ciami pa tu a nu le a pa bawmhnak in luat i,’ tiin ti tlang i si.

¹³ Ciatihin mi ning zirhhnak in Pathian ai ponkam tu phiat sek i. Cen ciabang ai ning bawnhnak dangdang khai tampui um i,” tiin ti i.

Minung Ningrimruaitu Thil

¹⁴ Cen Jesuh in mizapui heh ko leh ai anite hnenah, “Ning veksen in i thurelhnak ngai tu ilai ling tu ih!

¹⁵ Minung heh pualam in songlam ah a luthnak thil in ningrimruai lo i. A songlam in a suakhnak in ningrimruai i,” tiin ti i.

¹⁷ Jesuh in mizapui khiah fehsan ai inn songah a lut fangin a hnuahlunte tu ciami a ponghnak sullam zawt tuhin kawi tlang i.

¹⁸ Jesuh in, “Midangte tahin ning fim cuanglo i! Ling tlang lo ngaingai i sim? A pualam in minung songah a luthnak in mi ningrimruai thil lo i, a

¹⁹ zaimantifangin cia thil tu a thinlung songah feh loin a hupui songah feh ai ciatihin zin ek ah suak leh i,” tiin ti i. (Hetihin Jesuh ai a rel fangin zaibang rong khai heh ai thiang sio i, tiin a ti nuamhnak i).

²⁰ Cen Jesuh in, “Mi a ningrimruai tu ngaingai heh a songlam in suakhnak i.

²¹ Zaimantifangin phatlohnak a bawnruaitu ruathnak pha lo pawl tu minung songlam in sualhnak tepawl i: nupa sualhnak, ruko, mirek,

²² Kangkawm sualhnak, pamhap, thil sual phuncang bawn, mi zawl, a mawi lo ze ai thil sual bawn, iksikhnak, mi relsia, puarthau le voi thu ai thil bawnhnak,

²³ hemi thil sual tepawl heh minung thinlung songai a sualhnak tepawl i ai hemite in minung ningrimruai i,” tiin ti i.

Nupang Nu Ai Sanghnak

²⁴ Cen Jesuh tu feh ai Tyre khua hiangah hleng i, Inn pakhat songah lut ai ciata ah um i, ti aisu khai lingruai nuam lo i; ikhalselai thup dun thil cuanglo i.

²⁵ A fanu ramhuai ai pommi nupang pakhat in Jesuh um i, ti ling ai cia sawngpah in Jesuh keham ah bok ai bia i.

²⁶ Ciami nupang nu tu Gentile nu i ai Syria ram Phoenisia peng in a suaktu i. Ramhuai khiah a fanu songin suak tuhin ngen i.

²⁷ Ikhalselai Jesuh in, “Rong heh fate pe hmasa tuh ising. Fate ai rong uico pe heh dik lo i,” tiin ti i.

²⁸ Cia nu in, “I, Bawipa! Ikhalselai fate ai valhnak rong theh heh cabuai hniaah uicote in ai bang ve de! tiin ti i.

²⁹ Ciafangin Jesuh in, “Ciatihin nangmah in i sawn ben manin inn ah tlung ta tulai na fanu songin ramhuai suak zo i ti hmu tuh i si,” tiin ti i.

³⁰ Inn ah tlung ai a fanu tu khuahluan vumah a it khiah hmu i. Ramhuai tu a songin suak ngaingai zo i.

Naa Ngong, Pongthiam Lo Cakruai I

³¹ Cen Tyre peng in Jesuh tu suak le Sidon ram lut kong in feh ai Dekhapolis ram laiteng feh sio ai Galilee Tili hleng i.

³² Mi hrekkhat in a hnenah nangong pongthiam lo pa pakhat koih tlang ai a vumah Jesuh in a kut suan tuhin ngen tlang i.

³³ Ciamanin Jesuh in ciami pa heh mizapui hnenin hmun dangdang ah hoi ai a kutzung in a bil pahnih khiah tok i; cil thuih ai a lai dai sah i.

³⁴ Cen van lam hoi in Jesuh tu haihawh suah hluanghlo ai ciami pa hnenah, “Effatha,” tiin ti i. A sullam tu “Hong tuhang,” tihnak i.

³⁵ Cia sawngpah in ciami pa tu a bil hong i, a lai mer ai a ciang ngai in pong thil i.

³⁶ Cia thu tu aisu hnen ahkhai rel tuh loin Jesuh in mizapui heh dawn i. Ikhalselai tam deuh a dawn fangin tam amam in rel tlang i.

³⁷ Cen cia thu a zatu hmuahhmuah in ngaihsunur tlang ngai ai, “A bawnhnak hmuah in a pha ze lawmlam i! Naa ngongmi in khua za ai pongthiam loin pong thil i,” tiin thangphat tlang dekdo i.