Marka 6 - Zanniat Bible

Nazareth Mite In A Thu Sang Lo I

¹ Jesuh tu ciata in feh ai a khua ah a hnuahlunte thawn let tlang i.

² Sabbath nia ah synagogue songah thuzirh i. Ciata ah mi tampui um tlang ai a thuzirhhnak za fangin ngaihtam tlang ngai i. “Hemi hmuahhmuah a konteng in lang ini? Hemi bang fimhnak heh a konteng in ngah ini? Akontih in ngaihsunurkul heh bawn thil ini?

³ Mary ai fapa lettama, James le Joses le Judas le Simon tepawl ai upa ilo im? A farnute khai heta ah um lai ilo im?” ti tlang i. Ciatihin Jesuh heh zaikhai siar tlang lo i.

⁴ Jesuh in anite hnenah, “Prophet tu amah ai suakhmun khua le ram, a songkhat le a innsang siar lo hmundang ah cenin upathnak tawk i,” tiin ti i.

⁵ Ciata ah miur tlawmniu vumah a kut suan ai cakruai i; ciami siar lo ngaihsunurkul zaikhai bawn lo i.

⁶ Sanghnak nai tlang lo manin Jesuh tu a ngaihtam ngai i. Cen Jesuh tu a hiangai khuate ah feh ai thuzirh zianzo i.

Jesuh In Hnuahlunte Hlaihnih Hlat I

⁷ Hnuahlunte hlaihnih khiah ko ai pahnih pahnih in hlat i. Ramhuai nehthilhnak thupe ai,

⁸ “Khual ning tlawnghnak ah faikiang siar lo a dang zaikhai keng tuh lo i si; rong ituseh, dip ituseh, ning angki dip ah tangka ituseh keng tuh lo i si.

⁹ Kedawl tu dawl tu ih, ikhalselai angki a hlai in keng mah ih.

¹⁰ Tlun inn ning hontu ai inn in khua dang ah ning feh leh hlanlo cam tu hlen ih.

¹¹ Ning hlenghnak khua pakhat in, tlun inn ning hon nuam lo ai ning thu khai ngai nuam tlang hlah lekhaw, hlum tu ilai ning keborh thin tu ih. Ciami tu amahte caah ralring pehnak cang tuh i,” tiin thupe i.

¹² Ciatihin feh tlang ai mi zongzong amahte sualhnak sir tuhin thurel tlang i.

¹³ Ramhuai tampui hnawt ai mi ur tampui khai olive thau pawh ai cakruai i.

Baptisma Petu John Thihnak

¹⁴ Jesuh thula tu khuahacang ah thang manin Kumpibawi Herod inkhai cia thu za ve i. Mi hrekkhat in, “Baptisma petu John nung leh i! Ciamanin he bangtluk ngaihsunurkul bawnthilhnak huham nai i,” tiin ruat tlang i.

¹⁵ Midang in, “Elijah i,” ti tlang i. Midang in, “Khuahlanlai ai prophette bang prophet pakhat i,” ti tlang i.

¹⁶ Hemi tu Herod in a za ve fangin, “Baptisma petu John i! A lu i tanruai awnghnak inapui a nung leh i! tiin ti i.

¹⁷ John khiah pom ai thirri in khit ai thawng toh tuhin Herod amah rori in thu a pe awnghnak i. Zaimanin ciatihin bawn i, ti fangin Herod in a nau Philip ai nupui Herodias a hoi manin,

¹⁸ John in, “Na nau pa ai nupui na hoi heh a dik lo i,” tiin Herod khiah ti ṭiode manin i.

¹⁹ Ciamanin Herodias in John tu hmuhheh in ngiar ṭiode ai a rek tuh tianin nuam i; ikhalselai Herod um manin zaikhai ti ngam lo i.

²⁰ Herod in John heh kih ngai i, zaimantifangin John khiah mi pha le mi cianghlim i ti ling i. Ciamanin hup de i. John ai thurelhnak a ngai cangcang fangin a thin nuam awng lo i, ikhalselai a thurelhnak tu ngai nuam thotho i.

²¹ Hnuataber ah Herodias tu can pha ngah i. Herod tenia khim ai a tenia lawmhnak ah Herod in acuzah bawite, a ralkap uktu ralbawite le Galilee ramai upate caah rong dohnak puai bawn i.

²² Herodias ai fanu lut ai a lam fangin Herod le a sawmmi upate tu lungawi tlang ngai i. Ciamanin Kumpibawi in fenu nu hnenah, “Ziang na daih i? Na daihhnak hmuahhmuah na pe tuh ing,” tiin ti i.

²³ “Na ngenhnak hmuahhmuah na pe tuh ing; I ram ukhnak a hrek tianin na pe tuh ing,” tiin cukcam in thukham i.

²⁴ Cen fenu nu khai feh ai a nu hnenah, “Ziang ngen tuh ing?” tiin zawt i. A nu in, “Baptisma petu John ai lu ngen tu,” tiin ti i.

²⁵ Fenu nu tu rang ngai in let ai Kumpibawi khiah, “Tun in heta rori ah baptisma petu John ai lu heh darhleng in i pe silai i daih i!” tiin ngen i.

²⁶ Ciami a za fangin kumpibawi tu a lungsia roh i, ikhalselai a sawmhnak bawi upate hmaiah cukcam in thukham zo manin fenu nu ai ngenhnak khiah el thil nawn lo i.

²⁷ Ciamanin ralkap pakhat khiah cia sawngpah in hlat ai John ai lu koih tuhin thupe i. Ralkap pa tu suak ai thawnginn ah feh le John ai lu heh tan i.

²⁸ Cia hnuaah dar hleng in koih ai fenu nu pe i, fenu nu in a nu hnenah pe sin i.

²⁹ Cia thu tu John ai hnuahlunte in a za tlang fangin a luang lang ai phum tlang i.

Jesuh In Mi Thawng Nga Rongdohnak

³⁰ A hlathnakte tu tlung tlang ai Jesuh khiah tawk ai a bawnhnak hmuahhmuah le a zirhhnak hmuahhmuah rel tlang i.

³¹ A hnenai a kawitu a lettu, sukso mite a tam ze manin Jesuh le a hnuahlunte tu rong aihnak can rin nai tlang lo i. Ciamanin anite hnenah, “Feh ngasing khaw kinmah lek a pak in kin umthilhnak hmunah um tuh ising; ciatihin tlawmniu tal cawlum thil tuh ising,” tiin ti i.

³² Ciatihin amahte lek a pak in a um tlang thilhnak hmun feh tuhin lawng in feh tlang i.

³³ Ikhalselai a feh tlang heh mi tampui in hmu ai aisute i ti khiah ciasawng pah in ling tlang i. Ciamanin khua ṭen an ke in dawp tlang ai Jesuh le a hnuahlunte cawlum tuhhnak hmunah hleng hmasa berh i.

³⁴ Jesuh tu lawng songin a suak fangin miburpui hmu ai a thinlung tu anite ninghiohnak in dim i, zaimantifangin khaltu nai lo tuurual bang i. Ciamanin thu tampui cuk i.

³⁵ Zan lam khua a hnua fangin a hnuahlunte tu a hnenah kawi tlang ai, “Khua hnua zo i; heta heh hmun khing i fawn i.

³⁶ Miburpui heh hlat tulai aih tuh rong lai tuhin a hiang cingkim khua ah fehruai tu,” tiin ti i.

³⁷ Jesuh in, “Ningmah in aih tuh pe tu ih,” tiin ti i. Ciafangin anite in, “Tangka zahnih man rong lai in hemite heh rong do tu ih, ti kin daih isim?” tiin zawt i.

³⁸ Jesuh in, “Sang zaizah nai i si? Sik ta tu ih,” tiin ti i. A sik tlang fangin, “Sang hlom nga le nga pahnih um i,” tiin ti i.

³⁹ Cen Jesuh in a hnuahlunte hnenah misenpui tu ham hing vumah a bur a bur in toruai tuhin thupe i.

⁴⁰ Ciatihin misenpui tu zakhat tluan le sawm nga tluan in to tlang i.

⁴¹ Cen Jesuh in sang hlom nga le nga pahnih lang ai van lam hoi in Pathian hnenah anghnak thu rel i. Sang heh khan ai mizapui zem tuhin a hnuahlunte hnenah pe i. Nga pahnih khai mi veksen hnenah zem i.

⁴² Amahte veksen in ai tlang fangin kham tlang ngai i.

⁴³ Sang le nga a valhnak tu hnuahlunte in khul tlang ai bawm hlaihnih ngah tlang i.

⁴⁴ Rong a aitu heh pasal lek siar in mi thawng nga i.

Ti Vumah Jesuh Vak I

⁴⁵ Cia hnuaah rang ngai in Jesuh in a hnuahlunte heh lawng songah lutruai ai tili ralkhat lam Bethsaida ah a hmaiah feh cia tuhin ruai i. Cen mizapui tu tlungruai i.

⁴⁶ Vaihla hnuaah mual vumah sawngen tuhin feh i.

⁴⁷ Khua a thim fangin lawng tu tili laiteng ah hleng ai Jesuh tu amah lek mual vumah um lai i.

⁴⁸ Amahte lamah hlivua zuang manin a hnuahlunte in lawng a cawk fangin harsahnak tampui tawk tlang i, ti hmu i. Ciamanin zing lam nazi pathum le paruk karlak ah amahte hnenah ti vuman vak i. A hiang a hleng fangin khel tum teu i,

⁴⁹ ikhalselai ti vumah a vak khiah hmu tlang i. Mirauhla vuah ai thinlau in au tlang dekdo i.

⁵⁰ A hmu tlang fangin a veksen in lau roh i. Cia sawngpah ah Jesuh in, “Ning thinlau mah ih! Kaimah ing,” tiin ti i.

⁵¹ Cen khawm songah amahte hnenah lut ai hlivua tu dap sungso i. Hnuahlunte tu ngaihsunur ngai i,

⁵² zaimantifangin mi thawng nga rong a dohnak heh a sullam ling ben tlang lo i, amahte thinlung in ruat ban lo i.

Gennesaret Ah Jesuh In Miur Cakruai I

⁵³ Tili a tan tlang hnuaah Gennesaret ah hleng tlang ai cia hmunah amahte khawm com i.

⁵⁴ Khawm songin a suak tlang sawng fangin mizapui in Jesuh khiah lingthiam tlang vut i.

⁵⁵ Ciamanin cia ramah rang ngai in feh tlang ai a umhnak a linghnak hmun cang ah miurte tu laang in zawng tlang i.

⁵⁶ Cen Jesuh a fehhnak cangcang ah khuatenau ah ituseh, khuapui ahkhai ituseh, lo lai ahkhai ituseh, a miurte tu dawr ahkhai hlenpui tlang ai, “Na ponpar tal na dai tlang tuseh,” tiin ngen tlang i; cen a ponhmur a dai ngahtute tu cakhnak ngah tlang i.