Marka 5 - Zanniat Bible

Jesuh In khuasia Ai Molhmi Pa Cakruai I

¹ Jesuh le a hnuahlunte tu Galilee Tili ralkhat lam Gerasa peng ah hleng tlang i.

² Jesuh tu lawng songin a suak sawng fangin ciata ai hlan khukua songai a umtu pa suak ai Jesuh hnenah kawi in tawk i. Ciapa tu khuasia ai molhmi i ai,

³ hlan lakah a umtu pa i. Aisu inkhai hen ben lomi pa i.

⁴ Vel tampui thir cikcin rori in a kut le ke hen de napui a pen cangcang fangin catruai sek de ai a ke penhnak thirri khai duk ai catruai sek de i, aisu inkhai a pom ben thaitu um lo i.

⁵ A sun le zan in hlan lak le mual lakah vak de ai au kongin amah veve lungto in dawt dun kong de i.

⁶ A hla thah in Jesuh khiah hmu i; dawp ai a hmaiah a khuk caicin ai,

⁷ “a aw naih tawp in, “Aw! Jesuh, Cungnungber Pathian ai Fapa! Nang le kai ziang seng dun ising? Pathian hming in na ngen ing, i cawh hram malaw!” tiin au dekdo i.

⁸ Hemi bangin a auhnak heh Jesuh in, “Rauhla siava, he pa songin suak tu,” a ti zo manin i.

⁹ Cen Jesuh in, “Na hming aisu isi?” tiin zawt i. Ciami pa in, “I hming tu ‘Burpui,’ i, zaimantifangin kin tampui i,” tiin sawn i.

¹⁰ Ciapa in rauhla siava pawl tu cia ram in hnawt tuh sio loin Jesuh heh ngen dekdo i.

¹¹ Cia hiang muallai ah vokrual tampui leng tlang i.

¹² Rauhla siava pawl in Jesuh khiah, “Vok hnenah kin hlat tulai amahte songah kin lutruai tu hram law,” tiin ngen tlang i.

¹³ A ngenhnak bangin fehruai ai rauhla siava pawl tu ciami pa songin suak tlang ai vok songah lut tlang i. Ciami vokrual tu thawng hnih dung i ai lianglak in dawp murhmo ai, tili songah tlok ai thi sek i.

¹⁴ Vok khaltute tu dawp tlang ai cia thula khiah khua songah le lo lakah rel tlang dekdo i. Miburpui tu cia thil canghnak sik tuhin feh tlang i.

¹⁵ Jesuh hnenah a hleng tlang fangin khuasia ‘Burpui,’ ai molhmi pa khai hmu i. Ciata ah to ai hnikpon sil in le lungfim in hmu tlang i. Ciamanin thinlau tlang ngai i.

¹⁶ Ciami thil a hmutute in khuasia pommi pa le vokrual vumah ziang thil cang i ti khiah miburpui rel tlang i.

¹⁷ Cen amahte ram in tlan tuhin Jesuh khiah ngen tlang dekdo i.

¹⁸ Jesuh tu lawng songah a lut sawng fangin khuasia ai pom awngmi pa in, “Na hnenah feh tuh ve ing,” tiin ngen i.

¹⁹ Ikhalselai Jesuh in daih lo i. “Na inn ah tlung tu sawn lai na songkhatte hnenah Bawipa ai na bawnsahhnak le na ninghiohnak thulate rel tu,” tiin ti i.

²⁰ Ciatihin ciami pa tu Dekhapolis ram song hmuahhmuah ah feh ai Jesuh ai a bawnsahhnak thula rel i. Cia thu a zatu hmuahhmuah in ngaihtam tlang ngai i.

Jairus Fanu Le Jesuh Ponpar A Daitu Nu

²¹ Jesuh tu Tili ralkhat lamah feh lehthio i. Ciata Tili kamah mi tampui Jesuh hiangah khawm tlang i.

²² Synagogue uktu pakhat Jairus kawi ai Jesuh a hmu fangin a keham ah bok ai ninghiohnak ngen i.

²³ “I fanu niu a roh ngai in ur i. Kawi tu hram lai a lu vumah na kut suan tu, cen cak tuhai nung tuh i,” tiin ngen i.

²⁴ Cen Jesuh tu Jairus hnenah feh tuhin suak i. Mi tampui in Jesuh hlun tlang manin a hiangai mite in heng murhmo i.

²⁵ Mi tampui lakah thisuak ur in kum hlaihnih a ur zomi nupang pakhat um i.

²⁶ Sibawi tampui in bawl zo napui cak cuanglo i. A naihnak tangka hmuahhmuah hmang zo napui a pha lam ilo in roh amam i.

²⁷ Cia nu in Jesuh thu za ai miburpui lakin Jesuh hnua lamin kawi i.

²⁸ “A pon dai thil lengkhaw i cak tuh i,” tiin ruat i.

²⁹ Ciamanin Jesuh ai pon par dai ai i urhnak in i cak zo i, ti ling i.

³⁰ Jesuh in a songin a huham a suak khiah ling vut ai miburpui lam her in, “Aisu in i pon dai i?” tiin zawt i.

³¹ A hnuahlunte in, “Miburpui in na nor murhmo hmu hlen isi. Zaimanin ‘Aisu in i pon dai i?” ti isi,” ti tlang i.

³² Ikhalselai Jesuh in i pon i daitu heh aisu ber ini tiin sik hnelhno i.

³³ Ciatih ai thil a canghnak heh nupang nu in a ling fangin a lau in thing biakbo kongin kawi ai Jesuh keham ah khuk caicin ai thudik khiah rel i.

³⁴ Jesuh in a hnenah, “I fanu, na sanghnak in na cakruai zo i. Dapniu in feh tu, na urhnak tu cak tuhang seh,” tiin ti i.

³⁵ Jesuh ciatihin a pong lakah Jairus inn ai hlathnak thuthantute hleng tlang ai Jairus heh, “Na fanu thi zo i. Zaimanin Sayapa tu hnaihnok hnelhno lai isi,” tiin ti tlang i.

³⁶ Jesuh in cia thu amahte relhnak heh zaikhai siar lo ai Jairus hnenah, “Zaikhai lau mah, a sang lek sang tu,” tiin ti i.

³⁷ Cen Jesuh in Peter le James le a nau John siar lo aisu khai amah hlun siang nawn lo i.

³⁸ Jairus inn hleng tlang ai kaphnak aw le hnok murhmo in a um tlang khiah Jesuh in hmu i.

³⁹ Amahte hnenah lut ai, “Zaimanin ning hnok tlang murhmo i? Zaimanin kap tlang i si? Hemi naupang nu tu thi lo i; a mitmu i,” tiin ti i.

⁴⁰ Anite in Jesuh tu hnihsan tlang menma i. Ciamanin anite veksen khiah sumpua ah suakruai sio i. Naupang nu ai nu le pa le a hnuahlunte tu ko ai naupang nu dahhnak khan songah lut tlang i.

⁴¹ Naupang nu tu a kut in awh ai, “Talitha koumi,” tiin ti i. Ciami tu, “Naupang nuniu tho tu na ti ing,” tica i.

⁴² Cia sawngpah in nupang nu tu tho ai vak ben i. (Ani tu kum hlaihnih mi i). Ciami hmu fangin ngaihsunur tlang ze i.

⁴³ Ikhalselai Jesuh in aisu khai rel tuh loin thupe ai, “Aih tuh zai maw tal pe tu ih,” tiin ti i.