Marka 16 - Zanniat Bible

Tholehhnak

¹ Sabbath nia a bo hnuaah Mary Magdalene, James nu Mary le Salome in Jesuh luang mat tuhin yihmui lai tlang i.

² Nipui ninghla, khua hma niu nisuak dung fangin hlan ril feh tlang i.

³ Lamlak ah vak kongin, “Hlan khamhnak lungtleppui tang aisu in kin thawn sah tuh ini?” tiin pakhat le pakhat ti dun i.

⁴ Ciami lung tu lungpek a tleppui i. Cen anite sik fangin lungtleppui tu a thawn zo in hmu tlang i.

⁵ Hlan songah lut tlang ai tlangval pakhat pon ngo sil in kiahhan lam nak ah a to khiah hmu ai thinlau tlang ngai i.

⁶ Ani in, “Ning thinlau mah ih! Thinglamteh ah amahte rekhnak Nazareth Jesuh si tlang i si, ti ning ling ing. Heta ah um nawn lo i, tho leh zo i. A dahhnak hmun heh sik tu ih.

⁷ Feh tu ilai a hnuahlunte le Peter khiah ‘Ning hmaiah Galilee ah feh tuh i. Ciata ah ning hnenah a relciahnak bangin hmu tlang tuh i si,’ tiin rel tu ih,” tiin ti i.

⁸ Ciatihin suak ai hlan in thinlau le tihik in dawp tlang i. Anite tu lau ze manin aisu hnen ahkhai zaikhai rel tlang lo i. [

MARK THUTHANGPHA A TAWPHNAK SAU Mary Magdalene Hnenah Jesuh Lar I

⁹ Nipui nia ah thihnak in Jesuh a tho hnuaah a hmasaber ah Mary Magdalene hnenah lar i; Mary Magdalene tu a songin khuasia pasarih a hnawtsuakmi nupang nu i. Nupangte tu Peter le a rualpuite hnenah feh tlang ai a linghnak thula heh a comzawng in rel tlang i.

¹⁰ Mary Magdalene tu feh ai a rualpuite rel i. Ciamite tu Jesuh thi manin mithi ngai in kap tlang hnelhno i. Cia hnuaah Jesuh amah rori in kumzangza nunohnak thu, thu nung le thu thianghlim heh nisuahhnak in nitlahnak tian a hnuahlunte hmang in than i.]

¹¹ “Jesuh nung leh zo i, hmu ing!” tiin a rel fangin sang tlang lo i.

Hnuahlunte Pahnih Hnenah Jesuh Lar I

¹² Cia hnuaah Jesuh tu hnuahlunte pahnih khuatenau lamah a feh kawm laiah phundang in anite hnenah lar i.

¹³ Let kawm ai midangte khai rel kawm i, ikhalselai anite inkhai sang tlang lo i.

Hnuahlunte Hlaikhat Hnenah Jesuh Lar I

¹⁴ Hnuataber ah Jesuh tu hnuahlunte hlaikhat rong ai tlang lakah anite hnenah lar i. Sanghnak nai lo manin le amah a nung in a hmutute sang lo ai thinlung ruh nai tlang manin hau i.

¹⁵ Cen anite hnenah, “Laivum khuahacang ah feh tu ilai mi zongzong hnenah Thuthangpha rel tu ih.

¹⁶ Aisu khai ituseh sang ai baptisma co lekhaw ohnak ngah tuh i. Ikhalselai sang hlah lekhaw hnawl i tuh i.

¹⁷ A sangtute tu ngaihsunurkul bawnthilhnak huham pe tuh i; i hming in ramhuai hnawt ben tuh i; pong thar in pong tlang tuh i;

¹⁸ rul pom inkhai ituseh, thihsi ding inkhai ituseh, zaikhai poi tuh lo i; miur vumah amahte kut suan tuhai miur heh cak tuh i,” tiin ti i.

Vancung Ah Jesuh Kai I

¹⁹ Bawipa Jesuh in amahte hnenah thu a rel ben fangin vancung ah lang ai Pathian kiahhan lamah to i.

²⁰ Cen hnuahlunte tu feh ai khuahacang ah thurel tlang i; Bawipa tu anite hnenah naper ai ngaihtamkul a bawnhnak in a thurelhnak heh a dik i, ti khiah larruai i.] [