Marka 15 - Zanniat Bible

Pilat Hnenah Jesuh Fehpui I

¹ Zingniu in Suangbawi upate tu a dang upate, Danthiam mite, thukhantu Council upate thawn rang ngai in taikhawm ai thuruat tlang i. Jesuh tu thir cikcin thawn fehpui ai Pilat kut ah pe tlang i.

² Pilat in, “Judah kumpibawi i aw sim?” tiin zawt i. Jesuh in, “Nangmah in ti i si!” tiin sawn i.

³ Suangbawi upate in Jesuh tu sual a phunphun puh tlang i.

⁴ Ciamanin Pilat in, “Anite thu heh sawn tuh lo isim? Anite sualpuhhnak hmuahhmuah heh ngai tucuk,” tiin ti lala i.

⁵ Jesuh tu pong nuam thotho lo ai Pilat tu a ngaihtam ngai i.

Jesuh Rek Tuhin Relcat Tlang I

⁶ Kansuak Puai poh ah kum siar in Pilat in thawngto mite lakah mizapui ai ngenhnak khiah hlat de i.

⁷ Cialai ah Barabbas tihnak, raltho laiah mi a rek awngtu pa tu a dang ralthotute thawn thawng ah toh tlang i.

⁸ Mizapui suak ai kum siar a bawn kel de bangin thawngto suah tuh Pilat hnenah zawt tlang i.

⁹ Pilat in, “Judah kumpibawi heh ning hlat sah inglai ning daih awm?” tiin zawt i.

¹⁰ Pilat in a hnenah amahte pehnak Jesuh tu Suangbawi upate in Jesuh a iksik manin i, ti khiah ling hiar hlen i.

¹¹ Ikhalselai Pilat in Barabbas sawn hlatruai tuhin suangbawi upate in mizapui heh forh cia i.

¹² Pilat in zawt lala ai, “Ciatih ilekhaw Judah kumpibawi ning tihnak pa tu akontih in bawn tuh ning daih i?” tiin ti i.

¹³ Anite in, “Thinglamteh vumah rek tu!” tiin au tlang i.

¹⁴ “Ziang sualhnak bawn i?” tiin Pilat in zawt lala i. Anite in, “Thinglamteh vumah rek tu!” tiin roh amam in au tlang i.

¹⁵ Pilat in mizapui lungkhimhnak bawn a nuam manin anite caah Barabbas hlat i. Cen Jesuh tu vitruai ai thinglamteh vumah rek tuhin amahte kut ah pe i.

Ralkapte In Jesuh Zohsuamhnak

¹⁶ Ralkapte in Jesuh tu Mangki bawipa ai tualvan ah lutpui ai mizapui dangte khai ko tlang i.

¹⁷ Jesuh tu pon san silruai i; hling in lukhuk bawn ai a lu ah khuruai i.

¹⁸ Cen salam pe tlang ai, “Judah kumpibawi a nun sau tuseh!” tiin au tlang i.

¹⁹ A lu ah fungkek in vit tlang i, cil thuih i, khuk caicin ai a hmaiah tun le tunin lu ut tlang i.

²⁰ Ciatihin zohsuam ben fangin pon san a silruaihnak hawk ai amah ai hnikpon khiah silruai leh i. Cen thinglamteh vumah khen tuhin fehpui tlang i.

Jesuh Rekhnak

²¹ Lam lakah Simon tihnak pa tawk i. Ani tu khuatenau in khuapui ah a kawitu i ai ralkapte in Jesuh ai thinglamteh khiah khengkhebel in phurruai i. Simon tu Cyrene khuami i ai Alexander le Rufus ai pa i.

²² Jesuh tu Golgotha tihnak hmunah hlenpui i, Golgotha tihnak tu “Luruh hmun,” tica i.

²³ Ciata ah cabitti, mura tihnak si thawn roih ai pe tlang i, ikhalselai Jesuh in ding nuam lo i.

²⁴ Cia hnuaah thinglamteh ah khen ai camciafung duk in a hnikpon zem tlang i.

²⁵ Ciatihin a khen heh zing lam nazi pakua i.

²⁶ Amahte sualpuh laitarhnak tu, “Judah Kumpibawi,” ti i.

²⁷ Amah thawn hmunkhat ah rukote pahnih, a kiahhan lamah pakhat, a kekeh lamah pakhat rek kawm ve i.

²⁸ Lai Thianghlim in ani tu misual lakah telh cih i, tihnak khimhnak tuhin i.

²⁹ Suk le so a vaktute inkhai cim tuseh tiin imm tlang ai lu nem in zohsuam tlang i. “Nang tu Biakinn bal in ni thum songah a sa leh tumtu pa ilo sim?

³⁰ Tun thinglamteh vuman tolh tulai nangmah le nangmah o tucuk!” tiin ti tlang i.

³¹ Ciabang thotho in suangbawite le Danthiam mite in Jesuh tu hnihsan tlang ai, “Midang tu o napui amah veve tu o ben lo i.

³² Israel kumpibawi, Messiah tu thinglamteh vuman tun rori ah a tolh khiah hmu singlai sang tuh napui ising,” tiin pakhat le pakhat ti dun i. Cen amah thawn thinglamteh vumah khenmi pahnih te inkhai zohsuam kawm ve i.

Jesuh Thi I

³³ Sun laitak ah cia ram pumpuhluk ah nazi pathum song khuathimpui tlung i.

³⁴ Zan lam nazi pathum ah Jesuh tu, “Eloi, Eloi, lema sabachthani!” tiin cawm roh in au ruangro i. A sullam tu, “I Pathian, i Pathian, zaimanin i hlum isi?” tica i.

³⁵ Ciata ai a umtu hrekkhat in za ai, “Ngai tu ih, Elijah ko ina e!” tiin ti tlang i.

³⁶ Mi pakhat dawp vurvo ai ponher khiah cabitti songah ciah ai fung ah pencih hnuaah Jesuh ka ah mat i; “Iang rih tu ih! Thinglamteh vuman hla tuhin Elijah kawi maw kawi lo sik tuh ising,” tiin ti tlang i.

³⁷ Jesuh tu a rohpui in au ai a nunhnak bo i.

³⁸ Cia sawng fangin Biakinn ponzar khiah a vum lamin a hnia lam tian a tumpet in zik i.

³⁹ Thinglamteh hmaicang ai a dingtu ralbawi pa in Jesuh thi a hmu fangin, “Hemi pa tu Pathian Fapa ngaingai i!” tiin ti i.

⁴⁰ Ciata ai nupangte hrekkhat in lam hla thah in cuan tlang i. Anite tu Mary Magdalene, James nauta sawn le Joses ai nu Mary, le Salome i.

⁴¹ Jesuh tu Galilee ramah a um laiah a hlun awngtute le a bawm awngtute i. Jesuh thawn Jerusalem ah a hlengtu a dang nupangte tampui khai um tlang i.

Jesuh Vui I

⁴² Zan lam i hang, sabbath nia hleng hlan Paicia Nia i.

⁴³ Cen Arimathea khuami Joseph hleng i. Ani tu thukhantu Council upate lakah upatmi songtel i ai Pathian Ukhnak hleng tuh khiah a umlamtu i. Joseph tu ralpha ngai in Pilat hnenah lut ai Jesuh luang khiah ngen i.

⁴⁴ Pilat in Jesuh thi zo i, ti a ling fangin a ngaihsunur i. Ralbawipa ko ai, “Jesuh a thihnak rai aw hang im?” tiin zawt i.

⁴⁵ Jesuh thi zo i, ti ralbawipa hnenin a za fangin Pilat in Jesuh luang heh Joseph langruai i.

⁴⁶ Joseph in pon nemniu lai ai Jesuh luang heh thinglamteh vuman hla ai pon in a tuam hnuaah lungraihnak hlan ah phum i. Cen lungtleppui in hlankua heh sin i.

⁴⁷ Mary Magdalene le Joses nu Mary in a hiang in sik kawm ve ai Jesuh luang a dahhnak heh hmu kawm i.