Marka 11 - Zanniat Bible

Songlawi In Jerusalem Ah Lut I

¹ Jerusalem khua nong betbo hang ai Bethphage le Bethany khua hiang Olive mual hleng tlang i. Jesuh in a hnuahlunte pahnih hmaiah hlat ai,

² anite hnenah, “Ning hmai ai a umhnak khua ah feh tu ih. Ning hleng fangin aisu inkhai to awng lai lohnak laak dawnniu henhnak hmu tih i si. A ri hawk tu ilai fehpui tu ih.

³ Mi pakhatkhat in, ‘Zaimanin a ri hawk i si?’ ning ti lekhaw, ‘Bawipa in kul i, ning khirh leh cing tuh ngawn i,’ ti tu ih,” tiin ti i.

⁴ Ciatihin feh ai khua song lampui ah, inn pakhat dawngkham ah laak dawnniu pakhat a henhnak khiah hmu tlang i. A ri hawk fangin,

⁵ ciateng ai a dingtu mi pakhat in, “Zaimanin laak dawnniu tu a ri hawk i si?” tiin ti i.

⁶ Anite in Jesuh ai a relciahnak bangin rel ai fehruai vut i.

⁷ Jesuh hnenah laak khiah fehpui ai a vumah amahte pon dan sah hnuaah Jesuh in to i.

⁸ Mi tampui in a vakhnak tuh lampui ah pon phah tlang i; mi hrekkhat in hnuhsawl hliak ai phah tlang ve i.

⁹ A hmaiah a fehtute in ituseh, hnua lamai a hluntute in ituseh: “Hosanna! Bawipa hming ai a hlengtu heh Pathian in hmuifu pe tuseh!

¹⁰ Kin pu David Kumpibawi ukhnak a hleng tuhhnak tu Pathian in hmuifu pe tuseh! Hosanna! A sang ber van ah Pathian khiah thangphat in um tuseh,” tiin au tlang dekdo i.

¹¹ Jesuh tu Jerusalem ah lut ai Biakinn songah feh ai zaizongza khimniu in sik liang i. Ikhalselai can a hnua zo manin a hnuahlunte hlaihnih thawn Bethany khua ah feh tlang i.

Jesuh In Thaikung Cam I

¹² A thangha Bethany khua in anite tlung fangin Jesuh a rikam i.

¹³ Lamhla thah ah nim hliang in thaikung kungkhat hmu ai a thai si tuhin kawi i. Ikhalselai thaikung hiang a hleng fangin a hnah lek hmu i; zaimantifangin a thai cu lo teng i.

¹⁴ Jesuh in, “Aisu inkhai na thai na ai nawn mahang seh,” tiin thaikung khiah ti i. A hnuahlunte in ciami a ponghnak heh za tlang i.

Jesuh Biakinn Ah Feh I

¹⁵ Jerusalem a hleng fangin Jesuh tu Biakinn ah feh ai thil a laitu le a zuartute khiah hnawt sek i. Paisa thlengtute ai cabuai le laileng zuartute ai tohkhamte khai bungbaleh sek i.

¹⁶ Cen Biakinn tualvan in thil phur ai a vaktute khai kham sek i.

¹⁷ Mizapui tu hetihin rel i: “Lai Thianghlim songah Pathian in ‘I inn tu miphun hmuahhmuah caah sawngenhnak inn ti i tuh i,’ a tihnak um i. Ikhalselai ning in ruko relhhnak khukua ah cangruai i si,” tiin ti i.

¹⁸ Suangbawi upate le Danthiam mite in cia thu a za fangin Jesuh rek thilhnak lampui si tlang i. Anite in Jesuh tu kih tlang ngai i, zaimantifangin Jesuh thuzirhhnak in mizapui ai thinkhing ze manin i.

¹⁹ Zan lam a khim fangin Jesuh le a hnuahlunte tu khuapui songin suak tlang i.

Thaikung Thi I

²⁰ A thangha zingniu in lam lakah anite vak laiah thaikung heh hmu tlang i. A pardir in a ham tian ro sek i.

²¹ Peter in hih leh vut ai Jesuh hnenah, “Sik tu, sayapa! Na cukcamhnak thaikung thi zo i!” tiin ti i.

²² Jesuh in anite hnenah, “Pathian rinsan tu ih!

²³ Fiang ngai in ning rel ing: aisu khai ituseh a thinlung songah sangsamhnak nai loin a relhnak bangin cang tuh tengteng i tiin sangkho lekhaw, ‘Hemi tlang heh thawn tulai tipuithuanthum songah tlok tu,’ ti lekhaw a tihnak bangin cang tuh i.

²⁴ Ciamanin hetihin ning rel ing: ningmah in sawngen ai thil pakhatkhat ning ngen fangin ngah zo ing tiin sang tu ilai ning ngenhnak hmuahhmuah ngah tuh i si.

²⁵ Cen sawngen tuhin ning ding fangin mi pakhatkhat vumai daih lohnak ning naihnak khiah ngaithiam tu ih; ciafangin vancung ai a ummi ning Pa in ning sualhnak khai ning ngaithiam thun tuh ve i,” tiin ti i.

²⁶ Midang sualhnak ngaithiam hlahle i sikhaw vancung ai a ummi ning Pa in ning sualhnak ning ngaithiam thun tuh ve lo i. tiin ti i.

Jesuh Thunaihnak Zawt Tlang I

²⁷ Jesuh le a hnuahlunte tu Jerusalem khua ah hleng tlang leh i. Jesuh tu Biakinn songah a vak laiah suangbawi upa, Danthiam mite le a dang upate kawi tlang ai,

²⁸ Jesuh tu, “Zaibang thunaihnak in hebang thil heh bawn isi? Aisu in he thunaihnak na pe i?” tiin zawt tlang i.

²⁹ Ciafangin Jesuh in, “Thu pakhat ning zawt tuhai i sawn ben le i sikhaw zaibang thunaihnak in hebang thil bawn ing, ti ning rel tuh ing.

³⁰ I rel tucuk ih: John ai baptisma a pethilhnak thu heh aisu hnenin ngah i? Pathian hnenin maw, minung hnenin i?” tiin ti i.

³¹ Amahte veve el dun tlang ai, “Akontih in ti tuh ising? ‘Pathian hnenin,’ ti lesingkhaw ‘Ciatih ilekhaw zaimanin John tu sang lo i si?’ tiin kin ti tuh i.

³² Ikhalselai, “Minung hnenin,’ ti lesingkhaw mizapui lau kul fawn i, zaimantifangin mizapui in John tu prophet i ti khiah ling sio fawn i,” ti tlang i.

³³ Ciamanin Jesuh hnenah, “Ling lo i ing,” tiin sawn tlang i. Jesuh in anite hnenah, “Kai khai zaibang thunaihnak in hebang thil bawn ing, ti ning rel tuh ve lo ing,” tiin ti i.