Malakhi 3 - Zanniat Bible

¹ Cungnungber Bawipa in, “Kaimah caah lampui seltu tuhin i palai hlat tuh ing. Cen ning si hnelhno mi Bawipa tu mangrinlo in a Biakinn ah kawi tuh i. Ning umlamhnak i palai tu kawi tuhai i thutiamhnak tu phuang tuh i,” tiin ti i.

² Ikhalselai a hleng nia tu aisu in tuar ben tuh i? A lar ngaingai nia ahcen aisu luat thil tuh i? Thil sawphnak satpia bang le thir a ciangruaitu mai bang i tuh i.

³ Ngun tiruai ai a ciangruaitu bangin thukhan tuhin amah khiah kawi tuh i. Thir dengtu in sui le ngun a ciangruai bangin Bawipa ai palai in suangbawite cianghlimruai tuhai ciatihin a dikmi hibawlhnak khiah Bawipa hnenah koih tlang tuh i.

⁴ Cen hlanlai ai a cang awnghnak bangin Judah mi le Jerusalem mite ai hibawlhnak tu Bawipa lungawiruaitu i leh tuh i.

⁵ Cungnungber Bawipa in, “Ning thukhan tuhin ning hnenah kawi tuhai dawithiam mite, kangkawm sualhnak a bawntute, a hman lo tetti, napertute ai nihlawh a ai sahtute, hmaitong le ngakṭah farah le ramdang mite vumai miathnak a situ le i upat lotute vumah mawhhnak pe in thukhan tuh ing,” ti i.

Sawm Ah Pakhat Pehnak

⁶ Bawipa in, “Kai tu Bawipa ing ai a thleng awng lomi ing. Ciamanin ningmah Jacob ai tesinfate tu ci ning hmit lai lo i.

⁷ Ningmah hlanai ning pupate bang thotho in ningmah khai i dan pehnak tepawl in pial ai zaikhai hlun lo i si. Kaimah lam hoi leh tu ilai ning lamah hoi leh tuh ve ing. Ikhalselai ning incen, ‘Na hnenah let tuhin ziang bawn tuh i ing?’ tiin zawt i si.

⁸ Kai inkhai ning zawt thun tuh ve ing: Mi pakhat in Pathian naihnak ru heh a dik i tiin ruat i sim? A dik lo i ti khiah zapui linghnak i, ikhalselai ning in ru thotho i si. ‘Akontih in na ru i ing?’ tiin zawt lai i si. Sawm ah pakhat le thawhhlawm ning pe lo fangin ru tlang i si.

⁹ Ning veksen vumah cukcamhnak hleng i, zaimantifangin ning miphunpui in i thil ru manin i si.

¹⁰ Biakinn ah ning sawm ah pakhat tu a khimniu in koih tu ilai rong tampui um tuh i. I cu tu ih, vancung dawngkhamte hong tuhai ning caah thil phapha a phunphun ning burh tuh ing.

¹¹ Ning lo rongte tu nunghing in siatsuah tuh lo ai ning cabit kuang vumah cabit thai a bawr ngai in thai tuh i.

¹² Ciatihin miphun hmuahhmuah in hmuifu dong, mi lungawi tiin ning ko tuh i, zaimantifangin ning ram tu ram pha le ram nuam i tuh i,” tiin ti i.

Pathian Ai Ninghio Thukhamhnak

¹³ Bawipa in, “I thula tu mawi lo zeze in rel i si. Ikhalselai ‘Na thu kin relhnak ziang um i? tiin ti i si.

¹⁴ Ning relsuakhnak rori tu ‘Pathian kin ruaih hnelhno heh a lovang i. A relhnak bangin bawn heh ziang hnempuihnak um i? Kin ruat sualhnak sir tlang ai kin lungsiahnak Cungnungber Bawipa hnenah larruai tum hnelhno heh ziang hnempuihnak um i?

¹⁵ Kin hmu ṭen bangin mipuarte lehlam hmuifu ngah tlang i! Misualte nainung ngaingai ah cang ta vumah thilsual bawn in Pathian thinsauhnak cu ai cawhkuan zaikhai tawk loin luat hlen i!’ ti i si,” tiin ti i.

¹⁶ Cen Bawipa a kihzahtute tu pakhat le pakhat pon dun ai amahte ponghnak khiah Bawipa in ngai ai za i. A mithmuh ah Bawipa a kihzahtu le a hming a upattute ai thula tu laibu songah khum i.

¹⁷ Cungnungber Bawipa in, “Anite tu kaimah minung i tuh i. Thil i bawnsuak nia ahcen i naihnak rori ah cang tuh i. A pa na ruaihtu fapa khiah a pa in a ngaihhar de bangin anite tu ninghio tuh ing.

¹⁸ Ciafangin a dikmi le a hrokhrawl mi vumah zaibang thil hleng i tifangin i ruaihtu le i ruaih lotute zaibang cang tuh i ti khiah i minungte in hmu leh tuh i,” tiin ti i.