Malakhi 2 - Zanniat Bible

¹ Cungnungber Bawipa in suangbawite hnenah, “Hemi thupehnak tu ningmah caah i.

² Ning thil bawnhnak in i hming upat tu ih. I thurelhnak ngai hlah le i sikhaw ning vumah cukcamhnak hlengruai tuh ing. Ning pumcawmhnak hrang ning ngahhnak thil vumah cukcamhnak hlengruai tuh ing. Thungai in tifangin ciami thil vumah cukcamhnak hlengruai zo ing, zaimantifangin i thupehnak zaikhai siar lo i si.

³ Ning fate cawh tuh ing; ning hmaiah hibawl ning selhnak sumhnam ek ning mat tuhai ek mual ah ning fehpui tuh sek i.

⁴ Ciatihin Levi ai tesinfa suangbawite thawn thukham i bawnhnak tu bal tuh sek loin he thu petu heh kaimah ing ti ling tlang tuh i si,” tiin Cungnungber Bawipa in ti i.

⁵ “Kaimah i upat tuhin i thutiamhnak songah nunhnak le nuncakhnak pe tuhin thukham ai i thukhamhnak bangin pe ing. Cialai ahcen i upat ai i kihzah awng i.

⁶ A pha lo zirh tlang awng lo i, a dikmi lek zirh i. Kaimah thawn khai kin rem awng i; amahte in a dikmi ian a bawn lek zolo in midang thil sual bawnhnak bawn tuh nawn loin mi tampui zirh ai bawm i.

⁷ Pathian thu dik ngai in lingthilhnak tuhin mi zirh tuh heh suangbawite ṭuanvo i. I daihhnak le i tumhnak a linghnak tuhin misenpui in been tuh i, zaimantifangin suangbawite tu Cungnungber Bawipa ai palaite i.

⁸ “Ikhalselai tun tu ningmah suangbawite lehlam lampui dik in pial zo i si. Ning thuzirhhnak manin mi tampui in thil sual bawn tlang i. Ningmah thawn i bawnhnak thukham heh ningmah in bal tlang zo i si.

⁹ Ciatihin i thu ning ngai lo manin, thu bawn tuhai Israel mite in zoh ning suam thun tuhai mual ning phoruai tuh i; i minungte thu ning zirh fangin hlaihdan nai in zirh i si,” ti i.

Mipui Rinsantlak Lo I

¹⁰ Kin veksen in pa pakhat ai fa ilo ising maw? Pathian pakhat in kin veksen kin semsuah ilo im? Ciatih ilekhaw pakhat le pakhat karlak ah thukham kin bawnhnak tu bal cingcing ai Pathian in kin pupate thawn thutiam a bawn awnghnak tu nautat ising?

¹¹ Judah mite in Pathian hnenai thukham a bawn awnghnak bal ai he ram le Jerusalem khua songah tihikkul thilsual bawn i. Bawipa ai daihhnak Biakinn khiah ningrimtiar zo i. Ramdang khuavang a biatu nupangte khiah nupui tuhin hoi i.

¹² Hebang a bawntute tu Bawipa in Israel miphun songin lon tusek selai, kin miphun in Cungnungber Bawipa hnenah hibawl kin selhnak ah zaikom inkhai tel ve nawn mahang seh.

¹³ Thil dang pakhat ning bawnlaihnak tu, hemi i. Bawipa hnenai ning hibawlhnak ning sang nawn lo manin ning lungsia in kap le rung ai puleng heh ning mithli in niat i si.

¹⁴ Zaimanin kin sang lo ini? tiin zawt tlang i si. Zaimanin ning sang lo i tifangin ning dawn lai ning hoihnak ning nupui thawn thukham ning bawnhnak ning bal khiah ling i. Ning nupui tu ning rualpui pha ber i: rinsantlak pasal i tuh ing tiin Pathian hmaiah thukhamhnak bawn i si, ikhalselai ciami thukhamhnak rori heh bal i si.

¹⁵ Ning nupui thawn taksa khat le thinlung khat ah Pathian in ning bawn ilo im? Hetihin a bawn fangin a tumtekhnak ziang ini? A tumtekhnak tu fate nai ai Pathian minung ngaingai ai a cang tuhhnak i. Ciamanin aisu khai ituseh, a nupui hnenah thukhamhnak a bawn bangin khimruai tuseh; aisu inkhai a thukhamhnak tu bal maseh.

¹⁶ Bawipa Israel ai Pathian in, “Nupui ma heh i hua i. Ciabangtluk thilsual ningmah lakah pakhatkhat in ning nupui vumah ning bawn fangin i hua i. Rintlak pasal cang tuhin na nupui hnenah thukham na bawnhnak khiah bal tuh loin ralring tu,” tiin ti i.

Thukhanhnak Nia Nong I

¹⁷ Ning ponkam in Bawipa tu a rimkham zo i. Ikhalselai ning in, “Akontih in Bawipa khiah rimkhamruai i ing?” tiin zawt i si. Ning in, “Cungnungber Bawipa in thil sual a bawntute tu mi pha i tiin ruat i; thungai in tifangin a daih ngai hlen i,” ti tlang i si. Ihlahle “A hman ngai ai ruathnak Pathian tu akonah um ini?” tiin zawt tlang i si. Ciabang ning ponghnak in Pathian tu a rimkham ze zo i.