Malakhi 1 - Zanniat Bible

¹ Israel mite rel tuhin Bawipa in a hnia lamai thu heh Malachi hnenah hlengruai i.

Bawipa In Israel It I

² Bawipa in a minungte hnenah, “Ning tu ning it ngio ing,” ti i. Ikhalselai anite in, “Na kin ithnak tu zaibang in larruai isi?” tiin ti tlang i. Ciafangin Bawipa in, “Esau le Jacob tu unau i, ikhalselai Jacob le a tesinfate tu kaimah in it ai,

³ Esau le a tesinfate tu hua ing. Esau ai tlang vum ram tu kaimah in hnawmcan sek ing ai a laipua tu hampalak mehleng caah hlup ing,” ti i.

⁴ Esau ai tesinfa Edom mite in, “Kin khuapuite tu siatsuah zo sek napui din leh tuh ising,” ti lekhaw Cungnungber Bawipa in, “A nuam lekhaw din tu ngawn seh; kaimah in bal leh tuh sek pah ing. Mi in ‘Ram sualral,’ tiin le ‘Bawipa’ thinrawhnak kumzangza in a tawktu miphun,’ tiin ko tuh i,” tiin ti i.

⁵ Ciami heh amah Israel mite mit rori in hmu tuhai, Bawipa tu Israel ram song ian ah ilo in a pua ahkhai a thawmlian i,” ti tuh i.

Bawipa In Suangbawite Hau I

⁶ Cungnungber Bawipa in suangbawite hnenah, “Fapa in a pa tu upat i, cengfa in a bawipa tu upat i. Kai tu ning pa ing, zaimanin i upat lo i si? Kai tu ning bawipa ing, zaimanin i kihzah lo i si. Ning in zoh i suam ai, ‘Akontih in zoh na suam i ing?’ tiin i zawt cop lai i si.

⁷ I puleng vumah rong cianghlimlo ning dahhnak in zoh i suam i si. Cen ningmah in, ‘Akontih in na upat lo i ing?” tiin i zawt i si. Ning rel ing: i puleng nautat ai zaikhai ning siar lohnak in i upat lohnak lar i.

⁸ A mit a cawmi, ihlahle a urmi, ihlahle a kebai mi sumhnamte hibawlhnak ah i hnenah ning sel fangin pha hlen ngawn i, zaikhai poi lo i, tiin ruat i sim? Ciabang sumhnamte khiah ram uktu hnenah pe tucuk ih! Ning vumah a lungawi ni im? Ning vumah mithmai pha nai tuh i tiin ruat i sim?” ti i.

⁹ Suangbawite, kin vumah phathnak bawn tu, tiin Bawipa khiah ngen tucuk ih. Ning sawngenhnak ngai tuh hrimhrim lo ai ciami tu ningmah mawh manin i tuh i.

¹⁰ Cungnungber Bawipa in, “Biakinn songah lut in i puleng vumah zaikhai hnempui lo mai ning var tuh loin ningmah lakah pakhatkhat in Biakinn dawngkham heh kham tuhin daih i. Ning vumah anghnak nai lo ing; kaimah hnenai ning koihhnak hibawlhnakte tu ning sang tuh lo ing.

¹¹ Laivum miphun hmuahhmuah, nisuahhnak in nitlakhnak tian kai tu i upat i. Khuahacang ah i hming upathnak tuhin rimhmui tai tlang ai a cotlakmi hibawlhnakte i sel i. Amahte veksen in i upat i!

¹² Ikhalselai ning incen i upat lo i si; kin puleng tu a ningrimmi puleng i, ti ai ning nautathnak rong a vumah dah in i hming thangsiat i si.

¹³ ‘Hebang heh i rim kham ze zo i,’ tiin ning hnar i phit i si. I hnenah pe tuhin ruhnak sumhnam koih i si, ihlahle a kengbaimi le a urmi koih tlang i si. Ciamite tu kaimah in ning sang tuh tiin ruat i sim?

¹⁴ Pe tuhin ning thukhamhnak sumhnam pha bik khiah a tuurual lakah um hlen napui i hnenah santlai lo sumhnam hibawlhnak ah i seltu heh a vumah cukcamhnak um tuseh! Zaimantifangin kaimah heh a thawmlian mi kumpibawi ing ai miphun hmuahhmuah in i kihzah i,” tiin Cungnungber Bawipa in ti i.