Luka 4 - Zanniat Bible

Jesuh Sualsawmhnak

¹ Jesuh tu Rauhla Thianghlim thawn dim ai Jordan in let ai Rauhla in ramkhing ah hoi i.

² Ciata ah Satan in ni sawmli song sual sawm i. Cia song hmuahhmuah ah zaikhai ai lo manin a tawphnak ah a rikam i.

³ Satan in Jesuh tu, “Pathian Fapa ilesikhaw, he lungto heh sang cangruai tu,” tiin ti i.

⁴ Jesuh in, “Lai Thianghlim in ‘Minung nunhnak tu rong lekin ilo i,’ ti i,” tiin sawn i.

⁵ Cen Satan in fehpui ai mitkhep lakah laivum ram hmuahhmuah hmuh i.

⁶ “Hemi lailung vumai thunaihnak le lianhnak hmuahhmuah heh nangmah na pe tuh ing. Kaimah ai liang i ai i daihmi hnenah pe thil ing.

⁷ I hmaiah ut in i bia lesikhaw a veksen in nangmah ai tuh sio i,” tiin ti i.

⁸ Jesuh in, “Lai Thianghlim in ‘Bawipa na Pathian bia tulai amah lek ruaih tuh isi,’ ti i,” tiin ti i.

⁹ Cen Satan in Jesuh tu fehpui ai Jerusalem Biakinn a sang ber vumah dah ai, “Pathian Fapa ilesikhaw heta in dawp tu.

¹⁰ Zaimantifangin Lai Thianghlim in, ‘Nangmah na kilkhawltu tuhin Pathian in a vancungmite ruai tuh i,’ ti i.

¹¹ Ciahlaiah Lai Thianghlim songah, ‘Amahte kut in na cawi tuhai na ke lungto vumah na sawh ngah tuh lo i,” tiin ti i.

¹² Ikhalselai Jesuh in, “Lai Thianghlim in, ‘Bawipa na Pathian heh cu mah,’ ti i,” tiin sawn i.

¹³ Satan in Jesuh tu a phunphun in sualforh ben hnuaah cammalak song fehsan i.

Jesuh In Galilee Ah Naṭuan Pan I

¹⁴ Jesuh tu Galilee ah let ai Rauhla Thianghlim huham tu a hnenah um i. Cia ram hmuahhmuah ah a hmingthang sio i.

¹⁵ Synagogue ah thu zirh ai mi zongzong in thangphat tlang i.

Nazareth Mite In A Thu Pom Lo I

¹⁶ Jesuh tu a tualleng hmun awng Nazareth khua ah feh ai amah ai dan bangin Sabbath nia ah synagogue ah feh i. Lai Thianghlim siar tuhin ding ai,

¹⁷ Prophet Isaiah nganhnak laihnahzual khiah pe i. Cia laihnahzual heh pharh ai:

¹⁸ “Bawipa ai Rauhla tu i vumah um i, Zaimantifangin mifarah hnenah thuthangpha rel tuhin thaupawh in i ril zo i. Sal tangtute hnenah luathnak thu rel tuhin le Mitcawte in khua hmu thil leh tuhin i hlat i. Reemhnak tuar mite luatruai tuhin le,

¹⁹ Bawipa in a minungte a ohnak tuh can hleng zo i, ti than tuhin i hlat i, ti ai nganhnak hmun khiah siar i.

²⁰ Jesuh in a siarhnak laihnahzual heh zual leh ai a kiltute kut ah pe ai to i. Pumkhawmtute hmuahhmuah in Jesuh tu mitkhep loin sik tlang i.

²¹ Cen anite in, “I siarhnak ning za bangin Lai Thianghlim songah nganhnak heh tunnia ah khim i,” tiin ti i.

²² Hmual nai roh ai a ponghnak khiah za fangin amahte thinlung ah lut ze ai ngaihtam tlang roh i. “Hemi pa heh Joseph ai fapa ilo im?” ti tlang i.

²³ Jesuh in anite hnenah, “Santehhnak ai ‘Sibawi pa, nangmah veve cakruai hlah sim!’ tihnak khiah kin pong san tuh i, ti fiang ngai in ling ing. Ciahlaiah ‘Kapernuam khua ai na bawnhnak thilte khai na khua ah bawn tu ve,’ tiin iti tuh i si.

²⁴ Fiang ngai in ning rel ing: Prophet tu amah khua ah songlawi awng lo i.

²⁵ “I relhnak ngai tu ih: Elijah san ah kum thum le a hrek song ruahsi loin ram pumpuhluk ah rian a tlung laiah Israel ram songah hmaitong tam roh i.

²⁶ Ikhalselai ciami hmaitongte hnenah Elijah hlat lo i; Sidon ram Zarephath khua ai hmaitong nu hnen ian ah hlat i.

²⁷ Cen prophet Elisha san laiah khiah Israel ram songah a umtu mi tampui tu phar ur in ur tlang i; ikhalselai midang aisu khai cakhnak ngah tlang lo i; Syria mi Naaman lek cak i,” tiin ti i.

²⁸ Ciami heh Synagogue ah pumkhawmtute in za fangin thinraw tlang ngai i.

²⁹ Amahte veksen in suak ai Jesuh heh a khua in duk ai a suahpui hnuaah a khua ai tlang vum tian fehpui ai liang lakin tul tum tlang i.

³⁰ Ikhalselai Jesuh tu mirual lakin suak teu i.

Ramhuai Ai Molhmi

³¹ Cen Jesuh tu Galilee peng Capernaum khua ah feh ai Sabbath nia ah thuzirh i.

³² A thu zirhdan hmu fangin hmualnai ngai in zirh manin mangbang tlang ngai i.

³³ Ciami Synagogue ah ramhuai ai molhmi, ramhuai rauhla naitu, pakhat um i. Ciapa tu cawm ngai in au ai,

³⁴ “Nazareth Jesuh, akontih in i bawn tum isi? Kinmah siatsuah tuhin kawi isim? Aisu isi ti na ling ing: Pathian ai tirhfung mi thianghlim isi,” tiin ti i.

³⁵ Jesuh in, “Dapniu in um tu! Hemi pa songin suak tu,” tiin thupe i. Ramhuai in mizapui hmaiah ciami pa heh tluruai ai a vumah zaikhai siatsuahhnak bawn loin suak i.

³⁶ Ciafangin mizapui tu ngaihsunur tlang ze lawmlam ai pakhat le pakhat, “Hemi pa ai ponkam tu zaibang ponkam i pa! Thunai ngai le huhamnai ngai in ramhuaite khai thupe ai suakruai i,” tiin ti dun i.

³⁷ Cen Jesuh ai thula heh cia ram song khuahacang ah thang i.

Mi tampui Cakruai I

³⁸ Jesuh tu Synagogue in suak ai Simon inn ah feh i. Simon ai pi tu khuasik hlawng ur in ur ai cia thu heh Jesuh rel tlang i.

³⁹ Cen Jesuh tu a khuahluan hiangah ding ai a khuasik hlawng ur cak tuhin thupe i. Camkhatniu in cak i; tho ai anite heh tuamhlawm i.

⁴⁰ Ni tla hnuaah urhnak a phunphun a tuartute tu a rualpuite in Jesuh hnenah koih tlang i. A urtute ai lu vumah a kut suan ai amahte urhnak in cakruai sio i.

⁴¹ Mi tampui songin khuasiate in, “Nang tu Pathian Fapa isi!” tiin au kongin suak tlang i. Ikhalselai Jesuh in khuasiate tu pong tuh loin thupe i, zaimantifangin Messiah i ti khiah ling tlang i.

Jesuh In Synagogue Ah Thurel I

⁴² Khuavar fangin Jesuh tu khua songin suak ai ramkhing ah feh i. Mite in si dekdo ai a hmu tlang fangin, “Kin fehsan hram malaw,” tiin kham tlang i.

⁴³ Ikhalselai anite hnenah, “Pathian Ukhnak Thuthangpha heh khua dangdang ahkhai a rel i kul hrimhrim i, zaimantifangin ciami bawn tuhin Pathian in i hlat i,” tiin ti i.

⁴⁴ Ciatihin Judea ram songai Synagogue ah thurel zianzo i.