Luka 23 - Zanniat Bible

Jesuh Tu Pilat Hmaiah Suahpui I

¹ Amahte veksen in suak tlang ai Jesuh tu Pilat hmaiah fehpui i.

² Ciata ah sual hluk tlang ai, “Hemi pa in misenpui hoisual manin pom i ing; Rome kumpibawi hnenah ngunkhuai pe tuh lo i si, tiin rel ai, ‘Messiah ing, Kumpibawi ing,’ ti i,” tiin ti tlang i.

³ Pilat in, “Judah kumpibawi isim?” tiin zawt i. Jesuh in, “Nangmah in rel zo isi!” tiin ti i.

⁴ Cen Pilat in suangbawi upate le misenpui hnenah, “Hemi pa heh a sualhnak hmu lo ing,” ti i.

⁵ Ikhalselai amahte ṭang amam ai, “A thuzirhhnak manin Judea peng pumpuhluk ah hnaihnokhnak in dim i. Galilee in pan ai heta hleng zo ihang,” tiin ti tlang i.

Herod Hnenah Jesuh Fehpui I

⁶ Pilat in ciami a za fangin, “Hemi pa tu Galilee mi heh im?” tiin zawt i.

⁷ Pilat in Jesuh tu Herod ai ukhnak ram songmi i, ti a ling fangin Herod hnenah Jesuh kuat i. Cialaitak ah Herod tu Jerusalem khua songah um ve ngelcel i.

⁸ Herod in Jesuh hmu fangin a ang ngai i, zaimantifangin a thu za ṭiode ai a hmu nuamhnak raipui zo ihang. Jesuh ai bawnhnak ngaihsunurkul khiah hmu ve selai a nuamhnak i.

⁹ Ciamanin Herod in Jesuh heh thu tampui zawt i, ikhalselai Jesuh in kamkhat khai sawn lo i.

¹⁰ Suangbawi upate le Danthiam mite tu hmai lamah suak tlang ai Jesuh tu a roh ngai in sual si i.

¹¹ Herod le a ralkapte in Jesuh tu hnihsarelhnak ah hmang ai zohsuam tlang i. Cen pon mawi ngai silruai ai Pilat hnenah kuat tlang leh i.

¹² Cia nia rori ah Herod le Pilat tu rualpui pha ah cang kawm i; ciahlan ahcen hua dun ngai awng i.

Jesuh Rek Tuhin Relcat Tlang I

¹³ Pilat in suangbawi upate, hotute le misenpui kokhawm ai,

¹⁴ a hnenah, “Hemi pa heh i hnenah koih tlang ai misenpui hoisual i, tiin ti tlang i si. Ikhalselai heta ning mithmuh ah thuzawt napui ning mawhhlukhnak hmuahhmuah ah zai sualhnak khai hmu lo ing.

¹⁵ Herod inkhai a sualhnak hmu lo manin i hnenah a kuatlehhnak i. Thihhnak tlak in a bawnhnak zaikhai um lo i.

¹⁶ Ciamanin vit tuhai hlat tuh ing,” tiin ti i.

¹⁷ (Kansuak Puai bawn cang fangin amahte caah Pilat in thawngto pakhat hlat de i).

¹⁸ Pilat ai ponghnak za tlang fangin misenpui tu au tlang dekdo i, “Amah rek tu! Barabbas kin hlat sah tu!” tiin au tlang i.

¹⁹ (Barabbas tu khuapui songah buaihnak a suahpuitu le mirek manin thawng ah a tohhnak i).

²⁰ Pilat in Jesuh heh luatruai a nuam manin misenpui hnenah thu rel lehthio i.

²¹ Ikhalselai anite in, “Thinglamteh ah rek tu! Thinglamteh ah rek tu! tiin au tlang thotho i.

²² Pilat in vel thumhnak tian rel lehthio ai, “Ziang sualhnak bawn heh i? Thihhnak tlak ai sual a bawnhnak hmu rengreng lo ing. Vit tuhai hlat tuh ing,” tiin ti i.

²³ Ikhalselai amahte aw naih tawp in au tlang ai Jesuh tu rek tuhhnak hrimhrim i tiin au tlang manin hnuavai fangin amahte auhnak in neh i.

²⁴ Ciamanin amahte auhnak bangin Pilat in Jesuh heh rek tuhin relcat i.

²⁵ Mipui in suak tuseh tiin daihsahhnak mipa, thubuai manin le mirek manin thawng ah tohmi pa tu Pilat in suah i; misenpui daihhnak bangin Jesuh tu amahte nuamnuam in bawn tuhin a kut ah pe i.

Jesuh Thinglamteh Ah Khen I

²⁶ Ralkapte in Jesuh tu fehpui ai cialak fangin Cyrene khuami Simon, khuatenau lamin khuapui ah a kawitu pa tawk i. Ciapa heh pom ai thinglamteh phurruai ai Jesuh khel lamin hlunruai i.

²⁷ Mi tampui in Jesuh tu hlun tlang ai cia lakah a kang cum in a kaptu hnelhno nupang hrekkhat um i.

²⁸ Cen Jesuh in khel her ai anite hnenah, “Aw Jerusalem nupangte, kaimah ca kap mah ih; ningmah ca le ning fate caah kap tu sawn ih.

²⁹ Zaimantifangin, ‘Nauniu a nai awng lomi, fa a pai awng lomi le vel khat khai nau hnawi a tul awng lomi nupangte tu bawngpha roh i!’ ti can hleng tuh i.

³⁰ Cia can ah mi tampui in tlang sangpui hnenah ‘Kin net tu,’ tiin le mual hnenah ‘Kin khuk tu,’ tiin ti can i tuh i.

³¹ Zaimantifangin thing a hing laiah rin hebang thil bawn lekhaw thing a ro amam fangin tu zaibang ni ngai maw?” tiin ti i.

³² Jesuh thawn hmunkhat ah rek tuhin misualte pahnih khai fehpui ve i.

³³ “Luruh,” tihnak hmun a hleng fangin cia hmunah Jesuh tu thinglamteh vumah tar ai misualte pahnih khai a kiahhan lamah pakhat, a kekeh lamah pakhat tar ve i.

³⁴ Jesuh in, “I Pa, amahte sualhnak ngaithiam tu. Ziang bawn i ing ti ling tlang lo i,” tiin ti i. Cen amah a rektute tu camciafung duk in a hnikpon heh zem tlang i.

³⁵ Mipui in cuan ai a sik tlang lakah Judah mi uktute in nautathnak thawn, “Midang hmuah o ngah de i; Pathian ai rilmi Messiah ngaingai lekhaw amah veve khai o dun tuseh,” tiin hnihsan in pong tlang i.

³⁶ Ralkapte inkhai hnihsan tlang ve ai amah hnenah kawi ai a man bai pawl cabitti thur pe tlang ai,

³⁷ Judah kumpibawi ilesikhaw nangmah veve o dun hlah sim!” tiin ti tlang i.

³⁸ A lu vumah, “Hemi pa heh Judah kumpibawi i,” ti ai nganhnak lai tar i.

³⁹ Thinglamteh vumai a khenhnak misual pa pakhat in nautathnak ponkam thawn, “Nangmah heh Messiah ilo sim? Nangmah veve o dun tulai kin khai kin o ve hlah sim!” tiin ti i.

⁴⁰ Ikhalselai misual pakhat pa in, “Pathian na lau lo im? Kin vumai thukhan bawnhnak heh a bangvek ṭen i.

⁴¹ Ikhalselai kin pahnih vumai a thukhanhnak tu a dikmi i, zaimantifangin kin thil bawnhnak manin kin tuar tlak tuar kawm ising. Ikhalselai he pa tu sualhnak zaikhai bawn lo i,” tiin hau i.

⁴² Cen Jesuh hnenah, “Aw Jesuh, Kumpibawi in na hleng fangin i hai hram ma law,” tiin ti i.

⁴³ Jesuh in ciami pa hnenah, “Thu na kham ing: Tunnia ah kaimah thawn Paradis ah um kawm tuh ising,” tiin ti i.

Jesuh Thihnak

⁴⁴ Sun nazi hlaihnih dung fangin cia ram pumpuhluk ah zan lam nazi pathum tian khuathimpui tlung i.

⁴⁵ Cen Biakinn ai zarhnak khandan pon khiah a tumpet in zik ai hmunhnih in khan i.

⁴⁶ Jesuh tu cawm ngai in au ai, “I pa, i rauhla na kut songah na ap ing,” tiin ti i. Ciatihin a pong ben fangin a haihawh bo i.

⁴⁷ Ciami heh ralbawi pa in a hmu fangin Pathian thangphat ai, “Hemi pa heh sualhnak nai lo mipha i!” tiin ti i.

⁴⁸ Ciami thil hmuahhmuah sik tuhin a kawitu misenpui in cia thil canghnak hmu tlang fangin lungsia in sohnar cum tlang ai thinhnawm in inn ah tlung tlang i.

⁴⁹ Pumpak in Jesuh a lingtu hmuahhmuah le Galilee in a hluntu nupangte in a hla thah in ding ai cuan tlang i.

Jesuh Phumhnak

^50-51 Judea ram Arimathea tihnak khua ah Joseph tihnak mi pakhat um i. Ani tu mipha le upat hmaizah tlak mi i ai Pathian Ukhnak hleng cing tuh i, tiin a iangtu i. Ani tu Council songtel pakhat ve inapui Council thurelhnak le thil bawnhnak heh lungkhim lo i.

⁵² Ciapa in Pilat hnenah feh ai Jesuh luang ngen i.

⁵³ Cen Jesuh luang heh thinglamteh vuman hla ai pon nemniu in a tuam hnuaah aisu inkhai hmang lai lo, lung kherhnak hlan thar songah phum i.

⁵⁴ Cia nia tu ni nga nia i ai Sabbath nia pan dawn ihang.

⁵⁵ Galilee in Jesuh a hlun awngtu nupangte tu Joseph hlun tlang ai hlan ah feh tlang ve i. A hlan le a songai Jesuh luang zaitin vui i ti khai hmu tlang sio i.

⁵⁶ Cen inn tlung tlang ai Jesuh luang mat tuhin rimhmui le yihmuite bawn cia i. Sabbath nia tu amahte Dan ai ruaihnak bangin cawlum tlang i.