Luka 22 - Zanniat Bible

Jesuh Engsan Tum Tlang I

¹ Kansuak Puai tihnak, col tello sang puai hleng dawn ihang.

² Suangbawi upate le Danthiam mite tu misenpui lau manin Jesuh a thupniu in rek thil tuh lampui si tlang hnelhno i.

Judas In Jesuh Zuar Tum I

³ Cen hnuahlunte hlaihnih songai a teltu Iskariot tihnak Judas songah Satan lut i.

⁴ Ciamanin Judas tu feh taito ai Jesuh a zuar thil tuh thu suangbawi upate le Biakinn kiltute hnenah rel i.

⁵ Anite tu ang tlang ngai ai tangka pe tuhin lungkhim tlang i.

⁶ Judas khai lungkhim ve ai misenpui lingruai loniu in amahte kut songah Jesuh pe thil tuh can remcang iang i.

Jesuh Tu Kansuak Puai Hmang Tum I

⁷ Col tello Sang Puai bawn nia hleng ai Kansuak Puai caah tuuniute rohnak can khim i.

⁸ Jesuh in Peter le John hlat ai, “Feh tu ilai Kansuak Puai rong kin aihnak tuh tawlrel kawm ta tu ih,” tiin ti i.

⁹ Anite in, “A konteng ah bawn tuhin kin daih sah isi?” tiin zawt kawm i.

¹⁰ Ani in, “Khuapui songah ning lut fangin tibel in ti a cawitu pa tawk tuh i si. Ciapa heh a luthnak inn tian hlun tu ih;

¹¹ cen cia inn naitu hnenah ‘Kaimah le i hnuahlunte Kansuak Puai zanfak kin aihnak tuh akhan akonah um i, tiin kin Sayapa in na ti i,’ tiin ti tu ih.

¹² Vumta akhan ah tohkham le cabuaite a khimliang in dahhnak akhan kaupui ning hmuh tuhai ciata ah zaizongza tawlrel tu ih,” tiin ti i.

¹³ Anite khai feh ai a relhnak bang rori in zaizongza heh hmu kawm ai ciata ah Kansuak zanfak ai pai kawm i.

Bawipa Ai Zanfak Ai Tlang I

¹⁴ A can khim fangin Jesuh tu cabuai ah a hnuahlunte hnenah to i.

¹⁵ Anite hnenah, “Hemi kansuak zanfak ai heh harsahnak i tuar hlanah ningmah thawn ai tlang tuhin i hiam ngai i.

¹⁶ Zaimantifangin fiang ngai in ning rel ing: Pathian Ukhnak songah he kansuak zanfak ai ai a sullam taktak khimruai hlanlo ai tuh nawn lo ing,” tiin ti i.

¹⁷ Cen Jesuh in khuat lang ai Pathian hnenah anghnak thu a rel hnuaah, “Hemi heh lang tu ilai zem dun tu ih.

¹⁸ Fiang ngai in ning rel ing: Pathian Ukhnak a hleng lai hlanlo he cabitti heh ding tuh nawn lo ing,” tiin ti i.

¹⁹ Cen sang hlomkhat lang ai Pathian hnenah anghnak thu a rel hnuaah khan ai a hnuahlunte hnenah pe i. “Hemi tu ning caah i pehnak i taksa i. Kaimah i hih ngiohnak tuhin bawn tu de ih,” tiin ti i.

²⁰ Ciabang thotho in zanfak ai ben fangin khuat heh amahte hnenah pe ai, “Hemi khuat heh ningmah caah a luanghnak i thisan thawn nemhngethnak Pathian ai thukham thar i.

²¹ “Ikhalselai sik tu ih! I zuartu pa tu tun hemi cabuai ah kaimah thawn um kawm i ing.

²² Pathian lairel cia bangin Mi Fapa tu thi tuh i, ikhalselai Mi Fapa a zuartu pa ca ahcen a hmai lam a pit ze i!” tiin ti i.

²³ Ciafangin ciabang thil heh aisu ber in bawn tuh ini, tiin amahte veve zawt dun tlang i.

Aisu Lianber I

²⁴ Hnuahlunte lakah aisu lianber in ruat tuh ising, tiin thu eldunhnak um i.

²⁵ Jesuh in anite hnenah, “Laivum kumpibawite in misenpui khiah bawi roh in huham thawn uk tlang ai ciami uktu bawite in ‘Mipui ai Rualpui,’ tiin ti dun i.

²⁶ Ikhalselai ning tu ciabang i mah ih; ningmah lakai upa ber heh nauta ber bangin um tuhai hotuber heh hnenum bangin um tuh i.

²⁷ Aisu lian deuh ini: To in rong a aitu maw, rong a petu sawn? A totu heh lian sawn ilo im? Ikhalselai kai cenin ning lakah ning naruaihtu bangin um ing.

²⁸ “Harhnak i tuar song hmuahhmuah ah i umpuitu heh ningmah i si.

²⁹ I pa in ukthilhnak thu i pe bangin kai inkhai ukthilhnak ning pe tuh ve ing.

³⁰ I Ukhnak songai i cabuai ah ning tu ai le ding tlang tuhai Israel phun hlaihnih uktu tuhin bawi tohkham vumah to tlang tuh i si,” ti i.

Peter In Pheh Tuh Thu Relcia I

³¹ Jesuh in, Simon, Simon, ngai tucuk! Lovai pa in fang khiah fang pha le a hi a hlaihdan de bangin Satan in ningmah lakah hlaihdan tuhin le ning veksen in ning cu tuhin thu ngah zo i.

³² Ikhalselai Simon, na sanghnak na hlawhsam tuh loin nangmah caah sawngen ing. Cen i hnen lam na hoi leh fangin na unaute khiah thazang pe tuh isi,” tiin ti i.

³³ Peter in, “Bawipa, nangmah thawn thawngto tuhin le thi tuhin man lep ing,” tiin ti i.

³⁴ Jesuh in, “Peter, fiang ngai in na rel ing: Tun zan ah ling hrimhrim lo ing, tiin vel thum tian i pheh hlanlo ar khuang tuh lo i,” tiin ti i.

Tangka Bawm, Dip Le Ralvang

³⁵ Cen Jesuh in a hnuahlunte khiah, “Tangka bawm, dip le kedawl keng loin kaimah in ning hlat laiah khiah zaital hlawhsamhnak nai aw i sim?” tiin zawt i. Anite in, “Hlawhsamhnak zaikhai nai lo i ing,” tiin ti i.

³⁶ Jesuh in, “Ikhalselai tun ṭum tu tangka bawm a naitu in tangka bawm keng tu ih, dip a naitu in dip keng tu ih. Ralvang a nai lotu in a korfual zuar in ralvang pakhat lai tuseh.

³⁷ Zaimantifangin fiang ngai in ning rel ing: Lai Thianghlim in ‘Ani tu misual lakah tuar ve i,’ tiin kaimah ai thu nganhnak khiah khim tuh i; zaimantifangin kaimah ai thu nganhnak hmuahhmuah a khim betbo ihang,” tiin ti i.

³⁸ A hnuahlunte in, “Bawipa, sik tu! Heta ah ralvangte pahnih um i!” tiin ti tlang i. Ani in, “Cia hmuah in tawk zo i!” tiin ti i.

Olive Mual Vumah Jesuh Sawngen I

³⁹ Jesuh tu khuapui pualam ah suak ai a feh dehnak Olive Mual ah kai i; hnuahlunte khai kai tlang ve i.

⁴⁰ Cia mual a hleng fangin anite hnenah, “Sualsohnak songah lut tuh loin sawngen tu ih,” tiin ti i.

⁴¹ Cen lung sep ban dung a hlahnak hmunah feh ai a khuk caicin in sawngen i.

⁴² “I Pa, na thinkhim lekhaw he tuarhnak khuat heh i lang sah tu hram law. Ikhalselai kaimah ai daihhnak ilo in nangmah ai daihhnak bangin cang tuseh,” tiin ti i.

⁴³ Van in vancungmi lar ai tha pe i.

⁴⁴ A thincawl ze ai hehlaw tiin sawngen amam i; a khuahlan suakhnak tu thisan farhnak bangin laipua lakah far i.

⁴⁵ A sawngenhnak hmun in tho ai a hnuahlunte hnenah a let fangin mitmu tlang khiah hmu i; thinhar in a cawl tlang ze manin i.

⁴⁶ Anite hnenah, “Zaimanin mitmu tlang i si? Sualsohnak songah tlok tuh loin tho tu ilai sawngen tu ih,” tiin ti i.

Jesuh Pomhnak

⁴⁷ Jesuh a pong lakah hnuahlunte hlaihnih lakai pakhat Judas ai a hoihnak miburpui hleng tlang i. Jesuh thut tuhin Judas kawi i.

⁴⁸ Ikhalselai Jesuh in, “Judas, Mi Fapa heh thuthnak in zuar ihang sim?” tiin ti i.

⁴⁹ Jesuh hnenai a umtu hnuahlunte in ziang cang i ti khiah hmu fangin Jesuh heh, “Bawipa, kin ralvang hmang tuh ihang ing maw?” tiin zawt i.

⁵⁰ Cen amahte lakah pakhat in Suangbawi Sang ai sal pa khiah sat ai a kiahhan lam bil tawng suang i.

⁵¹ Ikhalselai Jesuh in, “Ca zo i!” ti ai amahte tuahmawhhnak mipa ai bil heh dai ai cakruai i.

⁵² Cen Jesuh in amah pom tuhin a hlengtu suangbawi upate le biakinn kiltu bawite le khua upate hnenah, “Kai heh damiah ing maw, ralvang le tumbelte thawn kawi tlang bang i si?

⁵³ Ni siar in ning hnenah Biakinn songah um napui aisu inkhai i pom lo i si! Ikhalselai he khuathim huham um lai can heh ning thil bawn can i,” tiin ti i.

Peter In Jesuh Pheh I

⁵⁴ Jesuh tu pom tlang ai Suangbawi Sang ai inn ah fehpui i; Cen Peter in a hla thah in hlun i.

⁵⁵ Tualvan laiteng ah maipual sep tlang ai mai aaitute hnenah Peter khai to ve i.

⁵⁶ Hnenum nu pakhat in, Peter mai hiangah a to khiah a hmu fangin hmaiton in sik ai, “Hemi pa heh Jesuh hnenah a teltu ve i,” tiin ti i.

⁵⁷ Ikhalselai Peter in, “Nupang nu, ciami pa tu aisu i, ti rin ling lo ing,” tiin ti i.

⁵⁸ Cammalak a rai hnuaah pakhat in hmu lehthio ai, “Nang khai tel ve isi,” tiin ti i. Inapui Peter in, “Mipa, kai tel lo ing,” tiin ti i,

⁵⁹ Cen nazi pakhat dung a rai hnuaah midang pakhat in, “Hemi pa heh Jesuh hnenah tel ve i, ti sang lo thilh lo i, zaimantifangin amah khai Galilee mi rori i,” tiin fiang ngai in ti i.

⁶⁰ Ikhalselai Peter in, “Aw mipa, ziang rel isi ti ning ling lo ing,” tiin ti thotho i. Ciatihin a pong laitak ah ar khuang i.

⁶¹ Bawipa khai her ai Peter heh phatak niu in sik i; cen Peter tu Bawipa in, “Tun zan ah ar khuang hlanah vel thum tian i pheh tuh isi,” a tihnak hih leh ruangro i.

⁶² Peter tu sumpua lamah suak ai lungsia in kap i.

Jesuh Zohsuam Ai Vit Tlang I

⁶³ Jesuh a kiltute in ani tu zohsuam ai vit tlang i.

⁶⁴ A hmai pon in tuam ai, “Aisu in na vit i? Rel tucuk! tiin ti tlang i.

⁶⁵ Cen nautathnak ponkam tampui khai pong tlang i.

Council Hmaiah Jesuh Hlenpui I

⁶⁶ Khuavar fangin upate, Suangbawi upate le Danthiam mite taikhawm in Jesuh heh Council hmaiah suahpui i.

⁶⁷ Anite in, “Messiah isim?” Kin rel tucuk!” tiin zawt tlang i. Jesuh in, “Ning rel inglai khai i sang tuh lo i si.

⁶⁸ Cen thu ning zawt inglai khai i sawn tuh lo i si.

⁶⁹ Ikhalselai tunai panin Mi Fapa tu Cungnungber Pathian ai kiahhan lamah toruai tuh ihang,” tiin ti i.

⁷⁰ Anite veksen in, “Ciatih ilekhaw Pathian Fapa isim?” tiin ti tlang i. Ani in, “Pathian Fapa ing ti khiah ningmah in rel zo i si!” tiin sawn i.

⁷¹ Cen anite in, “Thulingpuitu dang kin kul nawn lo i. Amah awkam rori za zo ising,” tiin ti tlang i.