Luka 20 - Zanniat Bible

Jesuh Ai Thunaihnak Zawt I

¹ Nikhat ah Jesuh tu Biakinn songah thuzirh ai Thuthangpha a rel lakah suangbawi upate, Danthiam mite le khuasong upate a hnenah kawi tlang ai,

² “Kin rel tucuk law! Aisu thu in hebang heh bawn isi? Aisu in thu na pe i?” tiin zawt tlang i.

³ Jesuh in, “Thu ning zawt rih ve ngang. I rel tu ih.

⁴ John in baptisma pethilhnak thu a naihnak heh Pathian hnenin hleng maw, minung hnenin i?” tiin ti i.

⁵ Anite in pakhat le pakhat, “akontih in rel tuh ising? ‘Pathian hnenin ngah i,’ ti lesingkhaw ani in, ‘Cialekhaw zaimanin John heh sang lo i si?’ kin ti tuh i.

⁶ Ikhalselai ‘Minung hnenin ngah i,’ ti fawn lesingkhaw mizapui in lungto in kin sep tuh dekdo i, zaimantifangin John tu prophet i, tiin sang tlang sio lawnsi i,” tiin amahte veve el dun tlang i.

⁷ Ciamanin anite in, “Aisu hnenin ngah i, ti ling lo i ing,” tiin sawn tlang i.

⁸ Cen Jesuh in, “Kai inkhai aisu hnenin he thil bawnthilhnak ngah ing, ti ning rel tuh lo ing,” tiin sawn ve i.

Cabit Vuan Napertu Santehhnak

⁹ Cen Jesuh in he santehhnak heh misenpui hnenah rel i: “Vaikhat ah mi pakhat in cabit vuan nai ai midang hnenah man pe in a vuan a zawn hnuaah can raipui song khualtlawng i.

¹⁰ Cabit thai loih can a khim fangin vuan zawngtute hnenah a covo lang tuhin a sal pakhat hlat i. Ikhalselai vuan zawngtute in a sal pa heh a vit tlang hnuaah a kut lekin tlungruai i.

¹¹ Ciamanin a sal pakhat hlat lala i; ciami pa khai vuan zawngtute in vit ai zakthikul in a bawn tlang hnuaah a kut lekin tlungruai lala i.

¹² Cen a sal dang pakhat hlat lehthio i. Vuan a zawngtute in tuahmawh ai vuan pualam ah lon tlang i.

¹³ Cen cabit vuan naitu pa in, “I ithnak i fapa hlat tuh ing; ani ngawn upat tuh i,’ tiin ti i.

¹⁴ Ikhalselai vuan zawngtute in a fapa a hmu tlang fangin pakhat le pakhat, ‘Hemi pa heh vuan naitu ai fapa ngaingai i. Rek tuhai a co tuh hmuahhmuah kinmah ai cang tuh i!’ tiin ti dun i.

¹⁵ Ciamanin vuan pualam ah suah ai rek tlang i. “Ciatih imanin vuan zawngtute vumah vuan naitu in akontih in bawn ni tur?

¹⁶ Amah kawi tuhai ciamite a rek hnuaah vuan zawngtu dang hnenah a vuan zawn tuh i,” tiin ti i. Ciami heh misenpui in za fangin, “Ciatihin tu ti tuh hrimhrim lo i,” tiin ti tlang i.

¹⁷ Jesuh in phatak niu in sik ai amahte hnenah, “Ilekhaw, Lai Thianghlim songah ‘Inn satute in santlai lo tiin a hnawlhnak lungto heh a thupuimi lungto ah cang lehlam i,’ tiin nganhnak khiah a sullam ziang tica i?

¹⁸ Aisu khai cia lungto vumai a tloktu heh khoi tuh sek ai cia lungto in a tlaktu heh parh tuh sek i,” tiin ti i.

Ngunkhuai Pehnak Thu

¹⁹ Danthiam mite le suangbawi upate in ciata rori ah pom tum tlang i, zaimantifangin a vumai santehhnak heh amahte ti hrim in a relhnak i, ti khiah ling tlang i; ikhalselai mizapui khiah lau lawnsi i.

²⁰ Ciamanin a pomthilhnak tuhin can remcang si tlang i. Mi hrekkhat tu Jesuh cultu tuhin nawhthuh pe ai, “Mi pha ngai bangin um tu ih. Jesuh heh Rome acuzah ai thunaitu Mangki bawi hnenah kin hlen thil tuhin thu zawt tu ilai amah ai ponghnak lala heh thang ah hmang in a awk tuh zuam tuh i si,” tiin ti i.

²¹ Micultute in Jesuh tu, “Sayapa, na relhnak le na zirhhnak heh a dik i, tiin ling tlang i ing. Mi hlaihdan lo ai minung caah Pathian daihhnak thudik heh felniu in zirh isi ti na ling i ing.

²² Ciamanin thu pakhat kin rel tucuk law: Rome kumpibawi hnenah ngunkhuai pe heh kin Dan in hon maw, hon lo i?” tiin zawt tlang i.

²³ Jesuh in amahte leplehnak khiah ling sah ai anite hnenah,

²⁴ “Ngun tangka fangkhat i hmuh tucuk ih. A vumah aisu zuk le hming cuang i?” tiin zawt i. Anite in, “Rome kumpibawi zuk le hming,” tiin sawn tlang i.

²⁵ Ciamanin Jesuh in, “Ciatih ilekhaw Rome kumpibawi ai tu kumpibawi pe tu ih; Pathian ai tu Pathian pe tu ih,” tiin ti i.

²⁶ Ciatihin misenpui hmaiah pom tum napui akontih in khai pom thil tlang lo i; amahte thuzawt a sawnhnak za fangin lau ai dapthen in um tlang i.

Thihhnak In Tholehhnak Thu

²⁷ Cen Sadusi mi hrekkhat, minung heh thihhnak in tho leh um nawn lo i, a titute Jesuh hnenah kawi tlang ai,

²⁸ “Sayapa, Moses in hetihin dan ngan awng i: ‘Mi pakhat tu fate nai loin a nupui thi lekhaw a nau pakhatkhat in ciami nu heh hoi tuhai fate a naihnak heh a u mithi pa ai fate in ruat tuh i,’ tiin ti i.

²⁹ Vaikhat ah unau pasarih um tlang i. Upaber tu nupui nai napui fate nai loin thi i.

³⁰ Pahnihhnak pa in cia nu heh hoi ai fate nai loin thi ve i.

³¹ A pathumhnak pa inkhai hoi ai fate nai loin thi ve thotho i. Amahte unau pasarih in cia nu heh hoi napui fate nai loin thi tlang sek i.

³² A hnuataber fangin cia nu khai thi ve i.

³³ Ciatih imanin ciamite tho leh fangin cia nu heh aisu ber ai nupui ini tur? Anite pasarih in hoi tlang ṭen lawnsi!” tiin zawt i.

³⁴ Jesuh in anite hnenah, “Tun san minungte tu nupang le pasal hoi dun i.

³⁵ Ikhalselai thihhnak in thoruai leh tuhin ituseh, a hleng tuhlai san ah nung tuhin ituseh, a lut tlak mite tu cia can ah hoi dun tuh nawn lo ihang.

³⁶ Vancungmi tuh hang ai thi thil tuh lo i. Thihhnak in tho tlang zo manin anite tu Pathian ai fate i.

³⁷ Cen Moses in, a thi mite tu thoruai leh tuh i, ti fiang ngai in larruai i. Hamphung a kanghnak thula songah Bawipa tu ‘Abraham ai Pathian, Isaac ai Pathian, le Jacob ai Pathian,’ tiin ti i.

³⁸ Pathian tu a thimi ai Pathian ilo ai a nungmi ai Pathian i; zaimantifangin mi zongzong a hnenah a nungmi lek i,” tiin ti i.

³⁹ Danthiam hrekkhatte in, “Sayapa, na thu sawnhnak pha ngai i!” tiin ti tlang i.

⁴⁰ Ciatihin Jesuh tu thu zawt ngam tlang nawn lo i.

Messiah Thu Zawthnak

⁴¹ Jesuh in akontih in Messiah tu David ai tesinfa i, ti thil tuh i?

⁴² Zaimantifangin David amah rori in Saam labu songah, ‘Bawipa in i Bawipa hnenah, Na ralte hmuahhmuah na ke hniaah,

⁴³ Kefot tuhin i dah sek hlanlo I kiahhan lamah to tu,’ tiin ti i.

⁴⁴ David in ‘Bawipa,’ tiin ti lekhaw akontih in Messiah tu David ai tesinfa cang thil tuh i?” tiin ti i.

Danthiam Mite Ralring Pehnak

⁴⁵ Mi zongzong in a thurelhnak ngai lakah Jesuh in a hnuahlunte hnenah,

⁴⁶ “Danthiam mite heh ralring tu ih! Anite tu amahte angki fualpui thawn sukso vak uar tlang ai dawrtluan ah upathnak thawn mi ai hnuksat daih tlang i; synagogue le puai bawnhnak hmunah tohhmun pha ber ril tlang ṭiode i.

⁴⁷ Hmaitongte zohsuam ai a inn tianin sut i, ikhalselai mi hmaiah tu sau ngaingai in sawngen tlang lawnsi i! cawhhnak a tuar tlang tuhhnak tu luar cuang tuh i!” tiin ti i.