Luka 2 - Zanniat Bible

Jesuh Tehnak

¹ Cia can ah Kumpimangbawi Augustus um ai a ukhnak Rome ram song hmuahhmuah ah mipum siar ai hming lang tuh sio in thupe i.

² Hemi mipum siarhnak hmasaber can ah Quirinius tu Syria ram uktu i.

³ Ciamanin aisusu khai mipum siar ai hmingkhum tuhin amahte ai suakhnak khua ṭen ah feh tlang i.

⁴ Joseph tu Galilee ram Nazareth khua in Kumpibawi David tehnak Judea ram Bethlehem khua ah feh i. Joseph tu David ai tesinfa imanin cia khua ah a fehhnak i.

⁵ Mipum siar hmingkhum tuhin hoi tuh thawlthan ai a ham cia Mary thawn feh kawm i. Mary tu naupai ai,

⁶ Bethlehem khua ah a um laitak ah nau nai can khim i.

⁷ A fa upa ber ah fapa in nai ai pon in tuam hnuaah kawlpaw kuang songah hlim i; zaimantifangin riahbuk ah akhan co lo i.

Tuukhalte Le Vancungmite

⁸ Cia ram songah tuukhalte hrekkhat tu zan ah tuute kil in um tlang awng i.

⁹ Bawipa ai vancungmi pakhat tu anite hnenah lar ai Bawipa ai songlawihnak tu anite vumah tleu i. Lau tlang ngai i;

¹⁰ ikhalselai vancungmi in, “Lau mah ih! Ning caah thuthangpha koih ing; ciami thuthangpha heh mi zongzong ca anghnak ngaingai i.

¹¹ Tun zan rori ah David khua songah Ning otu Bawi Khrih te zo i.

¹² Ciami hnikhnaihhnak ah hetih tuh i: nauniu tu pon in tuam tuhai kawlpaw kuang songah hlim in hmu tuh i si,” tiin ti i.

¹³ Camkhatniu in ciami vancungmi thawn hmunkhat ah van in vancungmi burpui zuktolh tlang ai Pathian thangphathnak la sa tlang i.

¹⁴ “A sang ber van ahkhai Pathian tu thangphat in um tuseh; A ithnak mi minungte umhnak laivum ah remhnak leng tuseh,” tiin ti tlang i.

¹⁵ Vancungmite tu van ah a let tlang leh fangin tuukhalte in, “Bethlehem khua ah feh in Bawipa ai relhnak sik ta ngasing,” tiin pakhat le pakhat ti dun i.

¹⁶ Ciatihin ngaihhlah ngai in feh tlang ai Mary le Joseph le kawlpaw kuang songah a hlimmi nauniu khiah hmu tlang i.

¹⁷ Tuukhalte in nauniu hmu tlang fangin vancungmi in cia nauniu thula a relhnak heh anite hnenah rel tlang i.

¹⁸ Tuukhalte ai relhnak thu a zatu hmuahhmuah in ngaihsunur tlang ngai i.

¹⁹ Mary in he thu hmuahhmuah phantak ngai in hih ngio ai ruat ngelngo i.

²⁰ Cen tuukhalte tu let tlang ai a hmuhnak le linghnakte manin Pathian thangphathnak la sa kongin tlung tlang i. Vancungmi ai a rel cia bangin khim sio i.

Jesuh Hming Bawn I

²¹ Zarh khat hnuaah nauniu tu a zarhtan can a khim fangin ‘Jesuh’ tiin a hming bawn i. Cia hming tu a nu in a pai hlan in vancungmi ai a relciahnak i.

Biakinn Ah Jesuh Fehpui I

²² Moses dan songai a umhnak bangin thiangruaihnak hrang bawn kulhnak tepawl khiah Joseph le Mary in bawn kawm tuh can hleng i. Ciamanin nauniu tu Bawipa hnenah ap tuhin Jerusalem ah fehpui i.

²³ Bawipa ai dan laibu songah, “Fapa upa ber hmuahhmuah heh Bawipa hnenah ap tuh i si,” tiin nganciahnak um i.

²⁴ Ciahlaiah Bawipa ai pehnak dan songai a umhnak bangin khuro khuah khat ihlahle laileng dawnniu pahnih thawn hibawlhnak sel tuhin fehpui kawm i.

²⁵ Cen Simeon tihnak pa pakhat tu Jerusalem khua ah um i. Ani tu mipha le Pathian kihzahtu i ai Israel mite hnemhnak ngah tuh khiah a iang ngiotu i. Rauhla Thianghlim a hnenah um ai,

²⁶ “Bawipa ai tiamhnak Messiah na hmu ngah hlan tu na thi tuh lo i,” tiin fiang ngai in phuang i.

²⁷ Rauhla hoihnak in Simeon tu Biakinn songah a feh fangin dan bangin amah caah bawn tuhin Jesuh heh a nu le a pa in Biakinn ah fehpui i.

²⁸ Simeon in nauniu tu a kang songah cawi ai Pathian thangphat i,

²⁹ “Bawipa, tunnia ah na thukhamhnak khimruai ai, Na sal pa tu dap niu in a nunhnak nia liamruai thil tuh ihang.

³⁰ Na ohnak tu i mit rori in hmu zo ing;

³¹ Mi zongzong mithmuh ah na paiciahnak ohnak khiah!

³² Ciami ohnak tu Gentile mite hnenah Na lampui larruaitu tleuhnak i ai, Na minung Israel mite hnenah songlawihnak hlengruaitu i,” tiin ti i.

³³ Simeon ai ponghnak tu nauniu nu le pa in za ai mangbang kawm ngai i.

³⁴ Ciafangin Simeon in hmuifu pe ai a nu Mary hnenah, “Hemi nauniu tu Israel mite lakah mi tampui tluhnak tuhin le tungding tuhin Pathian ai rilmi i. Ani tu mi tampui in engsanhnak le Pathian hnenai a hlenghnak hnikhnaihhnak thupui ngai i tuhai,

³⁵ ciatihin relsia tlang manin amahte thinlung songai thuthup naihnakte larruaitu ah cang tuh i. Cen nangmah khai ralvang sandir ai dawthnak bangin lungsia thinpemhnak in na thinlung na dawt tuh i,” tiin ti i.

³⁶ Anna tihnak nupang prophet pakhat um ai ani tu hmaitong i ai Asher hin Fanuel ai fanu i. Kum sarih song ian pasal nai ai,

³⁷ ani tu kum sawmriat le kum li i. Nisiar Biakinn ah um ai a sun a zan in Pathian bia ai rong ul in sawngen ṭiotu i.

³⁸ Cia laitak ah hleng ve ai Pathian thangphat i. Cen Pathian in Jerusalem luatruai tuh i, ti ai a iangtute hnenah nauniu thu heh rel dekdo i.

Nazareth Ah Jesuh Letpui I

³⁹ Joseph le Mary in Bawipa dan ai ruaihnak bangin bawn kulhnak tepawl a bawn ben kawm sio hnuaah Galilee ram Nazareth khua amahte inn ah tlung i.

⁴⁰ Nauniu tu khang betbo ai hat ngai ihang. Ani tu fimhnak in dim ai Pathian hmuifu a vumah um i.

Naupang Jesuh Tu Biakinn Songah

⁴¹ Jesuh ai nu le pa tu kumsiar Kansuak Puai ah Jerusalem ah feh de i.

⁴² Jesuh kum hlaihnih a khim fangin amahte dan bangin puai ah feh tlang i.

⁴³ Amahte puai ben fangin inn ah tlung i, ikhalselai naupang pa Jesuh tu Jerusalem ah tang ta i. A nu le a pa in ciami heh ling kawm lo;

⁴⁴ mizapui lakah tlung ve vuah bang tiin ruat kawm i. Sunnivui a vak tlang hnuaah amahte songkhat le rualpuite lakah si kawm i.

⁴⁵ Ikhalselai hmu thotho lo i; ciamanin amah si tuhin Jerusalem ah let kawm leh i.

⁴⁶ A nithumhnak fangin Biakinn songah hmu i. Judah mi zirhtu sayate tokhawm tlang ai amahte thu ngai kongin thu khai zawt hnelhno i.

⁴⁷ Thu a lingdan le fim ngai in thu a sawndan hmu fangin a zatute tu ngaihsunur tlang ngai i.

⁴⁸ A nu le a pa in ciata ah Jesuh a hmu fangin lau ngai in khuaruahhar kawm ngai ai a nu in, “I fapa, zaimanin he bangin bawn isi? Na pa thawn thincawl in na si kawm dekdo i ing!” tiin ti i.

⁴⁹ Jesuh in, “Zaimanin i si nuam hnelhno i si? I Pa ai inn ah um tuhhnak ing, ti ling kawm lo i sim?” tiin ti i.

⁵⁰ Ikhalselai ciatih ai thu a sawnhnak heh a sullam ling sah kawm lo i.

⁵¹ Cia hnuaah Jesuh tu a nu le pa thawn Nazareth ah let tlang ai, anite thu ngai in um i. A nu in he thula hmuahhmuah heh a thinlung ah fel ngai in hih ngiode i.

⁵² Jesuh tu taksa in ituseh, fimhnak in ituseh khang betbo ai, Pathian hmai le minung hmaiah mithmai pha ngah i.