Luka 16 - Zanniat Bible

Thil Kilkhawltu Hrokhrawl

¹ Jesuh in a hnuahlunte hnenah, “Vaikhat ah milian ngai pakhat um ai a thilri kilkhawltu tuhin hlawhfa pakhat nai i. Ciami a hlawhfa pa in na tangka vaih lak sek i, tiin a bawipa heh rel tlang i.

² Ciamanin a hnenah ko ai ‘Na thu i zahnak heh akontih i? I thilri na kilhnak cazin a khimniu in i pe tu; zaimantifangin i thilri kilkhawltu na cang thil tuh nawn lo i,’ tiin ti i.

³ Ciafangin a hlawhfa pa in ‘I bawipa in i naṭuan in i hnawt tum i! Ziang bawn ni tur ing, Lo vai tuh le ben ngat lo ing; mi thil ngen ai um tuh le zak i thi lawnsi i.

⁴ Ikhalselai thil pakhat bawn tuh ling ing! I naṭuan bo fangin amahte inn ah i umruai siangtu rualpui pha nai kul tuh ing,’ tiin a thinlung in ruat i.

⁵ Ciamanin a bawipa hnenah laiba a naitu hmuahhmuah ko khawm i. Pakhat pa tu ‘Na bawipa zaizah ba isi?’ tiin zawt i.

⁶ Ani in, ‘Olive thau pung zakhat,’ tiin sawn i. Thilri kilkhawltu pa in ‘Hemi heh na cazin i tuh i: to tulai pung sawmnga tiin ngan tu,’ tiin ti i.

⁷ Cen a dang pakhat pa tu, ‘Nang tang zaizah ba isi?’ tiin zawt i. Ani in, ‘Sangvut dip thawng khat,’ tiin sawn i. Thilri kilkhawltu pa in, ‘Hemi heh na cazin i tuh i: dip za riat tiin ngan tu,’ tiin ti i.

⁸ Hemi mihrokhrawl thilri kilkhawltu pa heh ciatih bangin fimvar ngai in thil a bawnthiam manin a bawipa in porh roh i, zaimantifangin he laivum mite tu amahte ai thil tawlrelhnak ahcen tleuhnak songah a umtute tahin fimvar sawn i,” tiin ti i.

⁹ Cen Jesuh in, “Ciatih imanin hetihin ning rel ing: Laivum ai sumsaw hmang in rualpui bawn tu ih, zaimantifangin laivum thilri a bo fangin kumzangza a khomi inn ah ning lutruai tuh i.

¹⁰ Thil cikniu ai rinsantlak mi tu thil lianpui ahkhai rinsantlak tuh i; thil cikniu thu ah sangtlak lomi tu thil lianpui thu ahkhai sangtlak tuh lo i.

¹¹ Laivum thilri ning tawlrelhnak ah rin rinsantlak hlah le i sikhaw akontih in lianhnak taktak heh ning hnenah ning pe thil tuh i?

¹² Cen midang thilri vumah rin rinsantlak hlah le i sikhaw ningmah ai co tuhhnak ngaingai heh aisu in ning pe nuam tuh i?

¹³ Mi pakhat tu bawite pahnih ai sal cang thil lo i. Pakhat hua tuhai pakhat daih tuh i; Pakhat hnenah rinsantlak in nung tuhai pakhat tu nautat tuh i. Pathian le sumsaw tu ruaih khat tuh lo i si,” tiin ti i.

Jesuh Ai Ponghnakte

¹⁴ Cia thute tu Farasite in za fangin tangka daih pawl imanin Jesuh heh hnihsan tlang i.

¹⁵ Jesuh in anite hnenah, “Mizapui hmaiah tu midik ber bangin larruai i si; ikhalselai Pathian in ning thinlung ling sio i. Zaimantifangin minung in man nai ngai ai ning ruathnak tu Pathian hmaiah zaikhai ilo i.

¹⁶ Moses ai Dan le prophet ai lainganhnak tepawl tu baptisma petu John san tian ca ian i. Ciahnua tu Pathian Ukhnak Thuthangpha heh phuang ai aisusu khai khengkhebel in lut tum tlang i.

¹⁷ Ikhalselai Dan songai cafang cik ber pai tahin van le laipua pai sek bai sawn i.

¹⁸ “Aisu khai a nupui ma in nupui dang a hoitu heh kangkawm sualhnak bawn i; cen mi mahnak nu a hoitu heh kangkawm sualhnak bawn ve i,” tiin ti i.

Milianpa Le Lazarus Thu

¹⁹ “Vaikhat ah milian ngai pakhat um ai hnikpon mankhung in thuam dun ai nisiar rong urur ai in nunnuam roh in nung i.

²⁰ Lazarus tihnak mifarah ngai pakhat um ve ai a pumpalah in hmaihma in dim i.

²¹ Milianpa ai cabuai in a tlokhnak rong theh khul tuhin milianpa ai dawngkham ah fehpui de i. Uicote kawi ai a hmaihma liak de i.

²² Mifarah pa tu thi ai vancung ai rong aihnak puai ah Abraham hiangah to tuhin vancungmite in fehpui i. Milianpa tu thi ve ai phum tlang i;

²³ cen Hell songah tlok ai harsa ngai in tuar i. Cia kongin vum lam cuan ai lamhlapui ah Abraham le Lazarus khiah hmu i.

²⁴ Cen au ai, ‘I pa Abraham, ning i hio tu hram law. Lazarus heh ruai tulai a kutzung khiah ti songah nim selai i lai dapruai tuhin ti i far tuseh; zaimantifangin he mai songah a tuar i har ze i!’ tiin ti i.

²⁵ Ikhalselai Abraham in, “I fapa, ruat tucuk! Na nun songah thil pha hmuahhmuah ngah zo sio ai Lazarus tu thil hnawm ian co i. Ikhalselai tunah ani tu heta ah nunnuam in um ai nang tu harsahnak tuar isi!

²⁶ Ciahlaiah kin lakah horkuam thukpui um ai ciamanin heta in na hnenah a kawi nuamtu aisu khai kawi thil lo ai na umhnak in kin umhnak karlak ah a kawi nuamtu um inkhai kawi thil lo i,’ ti i.

²⁷ Ciafangin milian pa in ‘Ciatih ilekhaw, aw i pa Abraham, i pa ai inn ah Lazarus heh hlat tu hram law.

²⁸ Ciata ah unau panga nai ing. Lazarus feh tu selai anite tal tu heta tuarhnak hmunah hleng tuh loin ralringhnak pe tuseh, tiin ninghio ngen ing,’ ti i.

²⁹ Abraham in, ‘Na unaute ralringhnak petu tuhin Moses le prophette um i. Anite relhnak ngai tuseh,’ ti i.

³⁰ Milianpa in, ‘I pa Abraham, ciatih ian tu tawk lo i. Mi pakhat thihhnak in tho ai amahte hnenah hleng lekhaw a nun sualhnak in thin thleng tlang tuh i,’ tiin ti i.

³¹ Ikhalselai Abraham in, ‘Moses le prophette ai thu ngai nuam hlah lekhaw mi pakhat thihhnak in tho khalselai ngai nuam tuh cuanglo i,’ ti i,” tiin Jesuh in rel i.