Luka 14 - Zanniat Bible

Jesuh In Miurpa Cakruai I

¹ Vaikhat ah Sabbath nia ah Jesuh tu Farasi hotute lakai pakhat ai inn ah rong sim tuhin feh i; cen misenpui in phatak niu in hlir ngio i.

² Mi pakhat a kut le a ke a pormi miur heh Jesuh hnenah kawi ai,

³ Jesuh in Danthiam mite le Farasite khiah, “Kin Dan in Sabbath nia ah miur cakruai tuh kin hon maw hon lo i?” tiin zawt i.

⁴ Ikhalselai anite in zaikhai pong tlang lo i. Jesuh in miurpa heh fehpui ai a cakruai hnuaah hlat i.

⁵ Cen Jesuh in anite hnenah, “Ningmah lakai mi pakhat tu a fapa maw a kawlpaw maw Sabbath nia ah tikhur songah tlok pang selai Sabbath nia imanin suah loin maw um tlang tur i si?” tiin zawt i.

⁶ Hemi thu ah kamkhat bangkhai sawn ben tlang lo i.

Thinnemhnak Le Thinsauhnak

⁷ Rong sim hmunah mihrekkhat in tohhmun pha ber ril de khiah Jesuh in hmu manin he santehhnak heh anite veksen hnenah rel i:

⁸ “Mopuai ah ning sawm lekhaw tohnak pha ber cuh mah ih. Ningmah tahin mi upa sawn sawm khai i thai i;

⁹ ning pahnih ning sawmtu inntupa in na hnenah kawi in, ‘Na tohhmun pial tu,’ tiin na ti ai hmun niam ber ah na to leh fangin zak na thi tuh roh i.

¹⁰ Ciahnak tahin na sawm fangin hmun niam ber ah to tulai na sawmtu inntupa kawi tuhai, ‘I rual, tohnak pha deuh ah to tu,’ tiin na ti tuh i. Ciafangin a sawmmi mizapui hmaiah mithmai pha ngah tuh isi,” tiin ti i.

¹¹ Zaimantifangin mah veve thupuiruai mite tu nautaruai tuhai lungnem thinniam ai a umtute tu hmaizahhnak a ngahtu upa ah cang tuh i,” tiin ti i.

¹² Cen Jesuh in inntupa hnenah, “Thaifak ituseh zanfak ituseh, ai kawm tuhin mi na sawm fangin na rualpuite, na unaute, ihlahle na songkhatte le na innhnen miliante khiah sawm mah; zaimantifangin anite in nangmah heh na sawm ben tuh ve ai na thil bawnhnak khiah na rul ben leh tuh i.

¹³ Ikhalselai rong na do fangin rimsu farahte, mizete, kebai mite le mitcawte khiah sawm tu;

¹⁴ anite in na rul ben tuh lo manin hmuifu cotu tuh isi. Miphate thihhnak in a tho leh nia ah Pathian in na rul leh tuh i,” tiin ti i.

Rongdo Puai Santehhnak

¹⁵ Cia thu tu rong aihnak cabuai ai sawm ve mi pakhat in a za fangin Jesuh hnenah, “Pathian Ukhnak song rongdohnak puai ah a teltute tu ang tlang tuh ze i!” tiin ti i.

¹⁶ Jesuh in ciami pa hnenah, “Vaikhat ah mi pakhat um ai rongdohnak puai bawn ai mi tampui sawm i.

¹⁷ Rong ai can a khim fangin a sawm cia mite hnenah a hnenum hlat i. ‘Kawi tuhang ih, zaizongza a ralring ihang,’ tiin ti i.

¹⁸ Ikhalselai pakhat hnua pakhat ‘Man lo i ing,’ tiin puh tuh si tlang ṭen i. Pakhat pa in ‘Lo pakhat lai ai sik ta rih ngang ti i. I ngaithiam tu hram law,’ ti ve i.

¹⁹ Midang pakhat pa in, ‘Kawlpawcang kap nga lai ai tunah pha le pha lo cu tuh ing. I ngaithiam tu hram law,’ ti ve i.

²⁰ A dang pakhat pa in ‘Tunbai niu ah nu hoi ngelcel ai kawi ben tuh lo ing,’ ti lala i.

²¹ Hnenum pa tu let ai cia thute heh a bawipa hnenah rel sio i. A bawipa tu a thinraw ai a hnenum pa hnenah, “Rang ngai in khuasong lampui ah le inn karlak lampui ah feh tulai mifarah, mi harsa, kutze keze, mitcaw le kebai mite ko tu,’ tiin ruai i.

²² A rai hlanah hnenum pa tu ‘Bawipa, na thupehnak bangin bawn zo ing; ikhalselai umhnak tampui lawng lai i,’ tiin ti i.

²³ Ciamanin a bawipa in, ‘Khuakhat le khuakhat karlak lampui hmuahhmuah ah feh tulai i inn a dim hlanlo mi ko tu.

²⁴ Fiang ngai in na rel ing: I sawm cia mite songin aisu khai i zanfak dohnak tep maseh,’ ti i,” tiin rel i.

Hnuahluntu Imanin Harsahnak

²⁵ Vaikhat ah mi tampui in Jesuh hlun tlang betbo laiah amahte lamah Jesuh tu her ai,

²⁶ “Aisu khai ituseh i hnenah kawi ai a nu le pa, a nupui le fate, a unau le a farnute le amah veve khai kaimah tahin daih sawn deuh lekhaw i hnuahluntu cang thil tuh lo i.

²⁷ Aisu khai ituseh mah ai thinglamteh phur in i hnua i hlun lotu heh i hnuahluntu cang thil tuh lo i.

²⁸ “Ningmah lakah mi pakhatkhat in inn sangpui sa tum lekhaw hmasaber ah to rih in a inn sa ben thil tuhin tangka khimniu in a nai le nai lo khiah tuat sio ta ilo im?

²⁹ Ciatihin tuat ta sio hmasa hlah lekhaw a naper tuh a pan ngah hnuaah sa ben loin tang tuhai a hmutu hmuahhmuah in hnihsan tuh i.

³⁰ ‘Pan bawn cop napui ben thil lo i!’ ti tlang tuh i.

³¹ “Ralkap thawng hra a naitu kumpibawi pakhat in kumpibawi dang pakhat a ralkap thawng kul thawn amah tawng tuhin a kawitu heh tawng tum lekhaw a hmasaber ah to ta rih in ciami kumpibawi dang tawngthilhnak tuh thazang nai le nai lo ruat hmasa kul i.

³² Tawng benhnak thazang nai hlah lekhaw cia kumpibawi dang hnenah, lamhlapui ai a um laiah, remhnak bawn tuhin a palaite hlat tuh i.

³³ Ciabang thotho in ning khai ning naihnak hmuahhmuah zam hlah le i sikhaw kaimah ai hnuahluntu cang thil tuh lo i si,” tiin Jesuh in ti i.

Man Nai Lo Ci

³⁴ “Ci heh pha ngai i, ikhalselai a alhnak pai lekhaw alruai leh thilhnak um nawn lo i.

³⁵ Lailung ca santlai lo ai dawm ca tuhin rin hnempui nawn lo i. A lovang in lon tuh menma ihang. Hemi thu heh ngaihnak bil a naitu in za tu ih,” tiin Jesuh in ti i.