Kolose 4 - Zanniat Bible

¹ Bawite, ning salte heh a dik le a mawi in sik tu ih. Ningmah khai vancung ah Bawi ning nai ve khiah hai mah ih.

Zirhhnak

² Catloin sawngen tu ih; saw ning ngen fangin, Pathian hnenah anghnak thu rel kongin thinlung fimniu in ngen tu ih.

³ Ciatihin ning ngen fangin Khrih thuthup phuangthilhnak can pha Pathian hnenin ning ngah thil tuhin kin ca ahkhai ngen tu ve ih. Tun thawng songai i umhnak khai ciami thu i phuang manin i.

⁴ Ciamanin Khrih ai Thuthangpha i phuang fangin fiang ngai in i rel tuh hrimhrimhnak bangin phuang thil tuhin saw i nget tu ih.

⁵ Sang lotute lakah fimvar niu in tlangleng tu ilai can pha ning naihnak heh man nai roh in hmang tu ih.

⁶ Ning ponkam tu ngai nuam le a mawimi i tu selai, mi cangcang ai thuzawthnak heh felfai ngai in sawn ben tuhin zuam tu ih.

Hnuataber Hnuksathnak

⁷ Kin ithnak kin unau Taikhikas in i thula hmuahhmuah ning rel tuh i. Ani tu Bawipa ai naperhnak ah kin naperpui i ai rinsantlak ngai i.

⁸ Ciamanin ningmah tha petu tuhin le zaibang in um i ing ti ning reltu tuhin ning hnenah hlat ing.

⁹ Amah thawn hmunkhat ah Onesimas khai kawi ve i. Onesimas tu kin ithnak mi le kin rinsanmi kin unau, ning lakai songtel i. Heta ai thil a canghnak hmuahhmuah amah in ning rel tuh i.

¹⁰ Kaimah thawn thawngtlatu ve Aristarchus in hnuk ning sat i; Barnabas ai tupa Mark inkhai hnuk ning sat i; (Mark ning hnenah hleng lekhaw phatak niu in cosang tu ih, ti khiah thuthanhnak ngah zo i si).

¹¹ Justus ti inkhai kohnak Joshua inkhai hnuk ning sat i. Hemite pathum tu i naperpui Judah mi Khrih sangtute i ai Pathian ram hrangah i naperpui, i bawmtu ber pawl i.

¹² Epafras in hnuk ning sat i. Ani tu ning pawl songtel i ai Khrih Jesuh ruaihtu i. A thin taktak in ning caah sawngen ṭiode ai kho ngai in ning ding thil tuhin, Khristian lamah puitling ning cang thil tuhin, ning sanghnak thu ning lingfiang thil tuhin Pathian hnenah ngen de i.

¹³ Harsa ngai in ning caah ituseh, Loadisia le Hierapolis khua mite ca ahkhai ituseh, naper a perhnak tu pumpak rori in a lingpuitu ing.

¹⁴ Kin ithnak sibawi pa Luke le Demas inkhai hnuk ning sat i.

¹⁵ Laodisia ai a ummi kin unaute le Nimfa le a inn ai khawmtu Khristian khai hnuksat i ing; kin rel sah tu ih.

¹⁶ Hemi laikuat ning siar ben hnuaah Laodisia pawlpui inkhai siar tuh tengteng in tawlrel tu ih. Cen Laodisia ai kin unaute in kin laikuathnak ning kuat tuh salawn ai ning inkhai ciami heh siar tlang tu ve ih.

¹⁷ Cen Arkhipas hnenah, “Bawipa ai naper na thiahhnak per tuh rori in tum tu,” tiin rel tu ih.

¹⁸ Paul in hnuk ning sat i tihnak tu kaimah kut rori in i nganhnak i. I penhnak thir cikcin heh hai mah ih! Pathian ai ninghiohnak ning vumah um tu hram seh.