Jonah 3 - Zanniat Bible

¹ Bawipa ai ponkam tu Jonah hnenah hleng lehthio ai,

² “Tho tulai, a thawmlian ngai khuapui Nineveh ah feh tu; i relciahnak bangin i thu phuang tu,” tiin ti i.

³ Jonah in Bawipa thu hlun ai Nineveh khua ah feh i. Nineveh tu khua lianpui i ai khuasong tu ni thum song vak kul i.

⁴ Ni khat song vak ai Nineveh khua ah thurel i: “Ni sawmli hnuaah Nineveh khuapui heh bo tuh i,” tiin tlangau dekdo i.

⁵ Ciafangin Nineveh khua mite in Pathian sang i. Nautaber in upa ber tian buri hnikpon sil ai rong ul tlang i.

⁶ Ciami thu khiah Nineveh kumpibawi in a ling fangin a kumpibawi tohkham in tho ai a bawi hnikpon a hawk hnuaah buri hnikpon sil ai vutkuang lakah to i.

⁷ Cen Nineveh khua songah thuthan ai, “Nineveh kumpibawi le a tlangsuakte ai thuthanhnak tu: Minung ituseh, sumhnam ituseh, kawlpaw ituseh, tuu ituseh zaikhai ai tuh lo i si; rong ai mah ilai ti khai ding tuh lo i si.

⁸ Minung ituseh, ramsa ituseh, ning veksen in buri hnikpon sil tu ilai ning aw naih tawp in Pathian ko tu ih. Aisusu khai amah thilsual bawnhnak le a hnawmhnak hlum tuseh.

⁹ Kin pairal tuh sek loin Pathian in a thin sup leh ai a thinrawhnak dapruai leh khai i thai i,” tiin i.

¹⁰ Ciatihin amahte bawnhnak le amahte nundan pha lo pawl a hlumhnak khiah Pathian in a hmu fangin a thin sup leh ai amahte vumah hlengruai tuhin a siatsuah tumhnak khiah hlengruai leh lo i.