Johan 1 - Zanniat Bible

Nunhnak Thu

¹ A hampan ah Thu um i. Cia Thu tu Pathian thawn um ai Pathian i.

² A hampan in cia Thu tu Pathian thawn um zo i.

³ Amah songin Pathian in zaizongza semsuah i; semsuahhnak thil hmuahhmuah songah amah tel loin bawnhnak pakhat khai um lo i.

⁴ Cia thu tu nunhnak hampui i ai cia nunhnak in minung hnenah tleuhnak hlengruai i.

⁵ Tleuhnak tu khuathim songah tleu ai thimhnak in hmit ben awng lo i.

⁶ Pathian in a palai John hlat ai,

⁷ John tu mi hnenah ciami tleuhnak thu rel tuhin kawi i. A relhnak hmuahhmuah in ling tlang ai sanghnak nai thil tuhin kawi i.

⁸ Ani tu tleuhnak ilo i; tleuhnak thu rel tuhin a kawitu sawn i.

⁹ Cia tleuhnak tu tleuhnak taktak i. Cia tleuhnak tu laivum ah kawi ai mi zongzong a dettu i.

¹⁰ Cia Thu tu laivum ah um ai amah songin Pathian in laivum bawn napui laivum in ani tu ling lo i.

¹¹ A ram songah kawi napui a minungte in cosang lo i.

¹² Mi hrekkhat in cosang ai sang tlang i; ciamanin Pathian ai fate cangthilhnak thupe i.

¹³ Pathian ai fate a canghnak tu laivumdan, minung ai thi le sa in ilo i; Pathian amah rori heh amahte Pa i.

¹⁴ Cia Thu tu minung ah cang ai kin lakah um i; ninghiohnak le thutak in dim i. Kinmah in a songlawihnak hmu tlang ai a Pa in a fapa naihsun hnenah a pehnak songlawihnak i.

¹⁵ John in ciami pa ai thu tu hetihin rel i: “Ani tu i hnuaah kawi i; ikhalselai kaimah tahin lian sawn i, zaimantifangin ani tu i suak hlan in um zo i,’ tiin i relhnak khiah amah ai thu i,” tiin ti i.

¹⁶ A semkhim liang in a ninghiohnak thawn kinmah heh hmuifu kin pe zo ai a hmuifu pakhat hnua pakhat kin pe i.

¹⁷ Pathian ai Dan heh Moses hnenin pe i; ikhalselai ninghiohnak le thutak tu Jesuh Khrih hnenin hleng i.

¹⁸ Aisu inkhai Pathian tu hmu awng lo i. A Pa ai Fapa naihsun, a kang songah a cawimi, Pathian in larruai zo i.

Baptisma Petu John Relhnak Thu

¹⁹ Jerusalem ah Judah hotute in suangbawite hrekkhat le Levi mite heh John hnenah hlat tlang ai, “Nang tu aisu isi?” tiin zawt tlang i.

²⁰ John in amahte thu zawthnak pheh loin sawn ai, “Kai tu Messiah ilo ing,” tiin fiang ngai in mizapui zak in rel i.

²¹ Anite in, “Ihlahle aisu isi? Elijah isim?” tiin zawt tlang i. John in, “I lo ing,” ti i. Anite in, “Prophet isim?” ti tlang lala i. “I lo ing,” ti thotho i.

²² Anite in, “Cialekhaw aisu isi, kin rel tu. Na thusawnhnak heh kin hlattute hnenah rel leh kin kul i. Aisu ing, tiin ti dun isi?” tiin zawt tlang i.

²³ John in prophet Isaiah ai relciahnak khiah lang ai, “Kai tu ‘Bawipa ai lampui heh cangruai tu ih,’ tiin ramkhing ah a auhnak aw ing,” tiin ti i.

²⁴ Farasite ai hlatmi palaite in,

²⁵ John heh thu zawt nengno ai, “Messiah le na ilo ai Elijah le prophet le na ilo fang tu zaimanin baptisma pe isi?” tiin ti tlang i.

²⁶ John in, “Kai cenin tidap in baptisma pe ing, ikhalselai ning lakah ning ling lai lo mi pakhat um i.

²⁷ Ani tu i hnuaah a kawi lai i; ikhalselai kai tu a kedawl ri hawktu rin i tlak lo i,” tiin ti i.

²⁸ Hetih ai a zawt dun hmun heh John ai baptisma a pehnak Jordan Runpui in nisuah lamai umhnak Bethany khua ah i.

Pathian Tuufa

²⁹ A thangha ah Jesuh a hnenah a kawi laitak hmu i, “Laivum sualhnak a phurtu Pathian tuufa heh sik tu ih!

³⁰ ‘I khel lamin mi pakhat kawi i, ikhalselai kaimah tahin lian sawn i, zaimantifangin i te hlanah ani tu um cia zo i,’ tiin a thula i relhnak thliahthlo heh amah ihang.

³¹ Ani tu aisu tuh i, ti ling awng lo ing. Ikhalselai ani tu Israel mite ai linghnak tuhin tiin tidap thawn baptisma i pe hnelhno sanhnak i,” tiin ti i.

³² John in, “Rauhla tu vancung in khuro bangin zuktolh ai a vumah a khop khiah hmu ing.

³³ Amah peu ngaingai i ti khiah ling cuanglo ing, ikhalselai tidap in baptisma pe tuhin i hlattu Pathian in ‘Rauhla zuktolh tuhai mi pakhat vumah a khop khiah hmu tuh i si; ciami pa tu Rauhla Thianghlim in baptisma petu tuh i,’ tiin i rel i.

³⁴ Ciapa tu hmu ngah zo ing; Fiang ngai in ning rel ing: Ani tu Pathian Fapa i,” tiin a hmuhnak le a linghnak khiah rel i.

Jesuh Hnuahlunte Hmasaber Pawl

³⁵ A thangha ah John le a hnuahlunte pahnih tu ciata ah ding lehthio ai,

³⁶ Jesuh a kawi heh hmu tlang fangin, “Pathian tuufa heh sik tu ih,” tiin John in ti i.

³⁷ Ciatihin a tihnak tu a hnuahlunte pahnih in za ai Jesuh hnenah feh kawm ve i.

³⁸ Jesuh in a khel her ai ciamite in hlun khiah a hmu fangin, “Ziang si kawm i si?” tiin zawt i. Anite in, “Rabbi, akonah um isi?” tiin sawn kawm i. Rabbi tihnak tu zirhtu sayapa tica i.

³⁹ Jesuh in, “Kawitu ilai sik tu ih,” tiin ti i. Cia can heh zan lam nazi pali dung i. Feh tlang ai a umhnak heh hmu ai cia nia tu a hnenah zancam ta i.

⁴⁰ Ciamite pahnih lakah pakhat tu Simon Peter ai naupa Andrew i.

⁴¹ Cia sawngpah in a upa Simon heh si ai a hmu fangin, “Messiah hmu zo ing,” tiin ti i. Messiah tihnak tu Khrih tica i.

⁴² Cen Simon tu Jesuh hnenah fehpui i. Jesuh in a mah khiah sik ai, “Na hming tu John ai fapa Simon i; ikhalselai Cephas tiin na ko tuh ihang,” ti i. Cephas tihnak tu Peter tihnak thawn bang dun ai a sullam tu ‘Lungto,’ tica i.

Jesuh In Philip Le Nathanael Ko I

⁴³ A thangha fangin Jesuh tu Galilee ah feh tum i. Philip khiah hmu ai a hnenah, “I hlun tu,” tiin ti i.

⁴⁴ Philip tu Andrew le Peter umhnak Bethsaida khuami i.

⁴⁵ Philip in Nathanael tawk ai a hnenah, “Moses in Dan laibu songah a thula a nganhnak le prophette inkhai a thula nganhnak mipa heh tawk zo ing. Ani tu Joseph ai fapa Jesuh, Nazareth khuami i,” tiin ti i.

⁴⁶ Nathanael in, “Nazareth khua in thil pha suak thil ni tur im?” tiin ti i. Philip in, “Sik tu laibang!” tiin ti i.

⁴⁷ Jesuh in Nathanael a kawi heh hmu fangin, “Israel mi taktak heh sik tucuk ih! A thinlung ah zaikhai hrokhrawlhnak um lo i,” tiin ti i.

⁴⁸ Nathanael in, “Akontih in i ling isi? tiin zawt i. Jesuh in, “Philip in na ko hlan thaikung hniaah na to lai in na hmu zo ing,” tiin ti i.

⁴⁹ Nathanael in, “Sayapa, nang tu Pathian Fapa isi! Israel kumpibawi isi!” tiin ti i.

⁵⁰ Jesuh in, “Thaikung hniaah na to laiah na hmu zo ing tiin na ti manin i sang isim? Hemi tahin thil thupui tam ngai hmu tuhlai isi!” tiin ti i.

⁵¹ Cen a hnenah, “Thungai in na rel ing: vancung heh hong tuhai Mi Fapa vumah Pathian ai vancungmite tolh tuak le kai tuak hmu tlang tuh i si,” tiin ti i.