Job 9 - Zanniat Bible

Job in hetihin sawn i:

^1-2 I, ciamite tu i za sa ciang i. Ikhalselai akontih in minung in Pathian hmaiah tu midikcang i cang thil tuh i?

³ Zaitin Pathian tu a thu el thil tuh i? Aisu inkhai sawn thil tuh lohnak thu thawng khat khai ani in zawt thil hehin!

⁴ Pathian ai fimhnak tu a thuk ze i. A huham naihnak a kau ze i; aisu inkhai amah engsan in a hmaiah ding thil tuh lo i.

⁵ Tlangte thawnruai hluahhlo i, A thinraw in siatsuah sek i, Kin thawn i ti khai ling tlang lo i.

⁶ Pathian in hlinhlinruai ai, Laivum le a hamtohhnak khai hlin sek i.

⁷ Pathian in ni heh suak tuh loin kham thai i, Arsite khai zan ah tleu tuh loin dawn thai i.

⁸ Vanhangpui heh pon bangin a zar fangin Aisu inkhai bawm lo i. Tipui song rulhreng ai zangkhun a ke in a fonthaitu Amah lek i.

⁹ Pathian in van arsite: vartin, siruk, sifung cangthum, rawlṭhing le rambawm bawn i.

¹⁰ Thil thupui ngaingai a bawnhnak tepawl ling thil tuh awng lo ising; Ngaihsunurkul a bawnhnak tepawl khai siar cawk tuh awng lo ising.

¹¹ Pathian tu i hiang in i khel i, ikhalselai hmu thil lo ing. Vak betbo napui ling thil cuang lo ing.

¹² A daih hnakhnak mi lang i, aisu inkhai kham thil lo i. ‘Ziang bawn isi?’ ti ai thu zawt ngam tuh pawl khai ilo i.

¹³ Pathian thinrawhnak tu dap lo i, A ralte Tipui rulhreng Rahab le a bawmtute heh fon ai parh sek i.

¹⁴ Ciamanin Pathian khiah akontih in sawn thil tuh ing? Akontih in amah elthilhnak ponkam si thil tuh ing?

¹⁵ Mawh nai lo inapui ingkhaw ani tu sawn thil lo ing, ‘Ning i hio tu,’ tiin i thukhantu Pathian hnenah ngen lek heh i bawnthilhnak i.

¹⁶ Pong tuhhnak can i pe khalselai, I ponghnak i ngai tuh i ti sang thil lo ing

¹⁷ Thula zaikhai um loin, Kaimah nuai tuhin hlisia kuat i; I tuahmawhhnak tu pungzai amam i.

¹⁸ Haihawhhnak can rin i pe lo i, I vumai a bawnhnak hmuahhmuah in lung i siaruai amam i.

¹⁹ I thahathnak suah tuh ing maw? Pathian tlukin thahat aisu um ini? Dikcanghnak thu ah ti singlai, Aisu in zung ah hlenpui thil tuh i?

²⁰ Mawh nai lo rinsantlak inapui ingkhaw, I awkam in mawh i hluk i, Sawibang lo inapui ingkhaw i ponghnak hmuahhmuah in mawh i hluk i.

^21-22 Sualhnak zaikhai nai lo ing, Ikhalselai zaikhai dang nawn lo i. Nung i zuam lo ihang. I sual inkhai, i sual lo inkhai dang cuang lo i. Pathian in hnawm kin can tuh sek i.

²³ Mangrin loin mawh nai lomi a thi fangin Pathian in hnihsan i.

²⁴ Pathian in laivum heh mihrokhrawl kut ah pe i. Thukhantute ai mit heh pon in hup sio i. Ciamite tu Pathian in bawn lo i, ti le i sikhaw aisu in bawn i?

²⁵ I tikcucan tu phathnak um loin liam betbo i, Zualkotu tahin rang sawn i.

²⁶ I nunhnak nia tu lan betbo i, Papairas ai bawnhnak lawng bangin; Ar a dawptu mupui bangin rang ngai i.

²⁷ I tuarhnak tu hai lio in, lungawi aipuang in um tuh napui ingkhaw, I rimsuhnak tu kaimah hnawh tuhin let tuh zual i.

²⁸ Harsa i tuarhnak heh i kih i, Pathian in mawh i phurh ti ling ing.

²⁹ Pathian in mawh i phurh hnua ahcen, Zaimanin kang nuam tuh hnelhno ing.

³⁰ I sualhnak tu zaibang satpia inkhai sawpciang thil tuh lo i;

³¹ Pathian in ningdulkul kua songah i hla i; i hnikpon inrin zak i thipui i.

³² Pathian heh minung ita selai, sawn thil tuh dek ing; Kin thu rel tuhin zung ah feh tuhai kin thu relcat tuh i.

³³ Ikhalselai kin karlak ah palai um lo i; Pathian le kaimah karlak ah thukhanthaitu aisu khai um lo i.

³⁴ Pathian, i cawh nawn mah; na kihkulhnak in thin i lauruai maseh.

³⁵ Ciatihin kihhnak zaikhai um loin pong tuh ve ihang ing; Zaimantifangin i thinlung heh kaimah in ling ber ing.