Job 8 - Zanniat Bible

Bildad in hetihin ti i:

^1-2 Hlivua thawn a bang dun thulovang na ponghnak heh ben aw hang sim?

³ Pathian in thudik heh merh awng kel lo i; A dik lo khai bawn awng lo i.

⁴ Na fate Pathian vumah sual tlang manin, amahte sualhnak bangin cawhkuan pe i.

⁵ Ikhalselai tun tu Cungnungber Pathian ngen tu.

⁶ Na thiang ngaingai ai na fel taktak lekhaw, Pathian in na bawm tuhai na innsang tungding leh tuh i, lehsawng khai na pe tuh i.

⁷ Na sunghnak na lianhnakte tu zaikhai i tuh lo i, Pathian ai na pe tuhhnak thawn teh fangin.

⁸ Hlanlai ai fimhnak sik tucuk, Kin pupate ai linghnak thutak ruat tucuk.

⁹ Kin nunhnak heh a com ze ai kin linghnak zaikhai um lo i. Lailung vumah nihlim bangin lan ising.

¹⁰ Ikhalselai hlanlai mifimte in na zirh tlang tuseh, Amahte relhnak de heh ngai tucuk law.

¹¹ “Papairas tu ti um lo hmunah po kel lo i; Phaipeng tu a beh lo hmunah um awng kel lo i.

¹² A dawnniu lai ai a hmangtlak hlan ahkhai ti kang lekhaw vawi hmasaber i.

¹³ Pathian ling lotute tu ciatih bangin i. Amahte umlamhnak bo i, Pathian tel loin a nung hnua lamin!

¹⁴ Ri fangkhat, mom ri fangkhat khiah rinsan tlang i;

¹⁵ Mom ri fangkhat hngaihgam lekhaw ding thil tuh im? Ri fangkhat lep lekhaw ding leh thil tuh peu im?”

¹⁶ Mihrokhrawl pawl tu sun ni tlang ai hampa bangin po i, Vuan ai a po bial hampa bangin zai tlang i.

¹⁷ Zai bial ai lungto khai velh ai lungto umhnak hmuahhmuah ah zam i.

¹⁸ Ikhalselai phai tulai bo tuh sek i; Ciata ah a um khiah aisu inkhai ling tuh nawn lo i.

¹⁹ I, hrokhrawl mite ai anghnak tu ciatih bangin bo i; Midang kawi ai amahte umhnak lang sah sek i.

²⁰ Ikhalselai Pathian in mifel tu hnawl tuh lo i. Mihrokhrawl pawl ai ban khai hatruai tuh lo i.

²¹ Na mithmai ah anghnak cuang tuhai, na ka tu hnihnak in dim tuh i.

²² Ikhalselai na huatute tu zakthi tlang tuh i; Mihrokhrawl pawl ai innsang tu pairal tuh i.