Job 4 - Zanniat Bible

Pondunhnak Hmasaber Eliphaz in hetihin ti i:

^1-2 Job, kaimah in pong ve inglai hua ngasim? Dapthen in um thil nawn lo ing.

³ Nangmah in mi tampui zirh zo isi. Ban thahat lo mite ban tha hatruai isi.

⁴ Mite a cawl in a bah a tlu thliahthlo fangin, Na pong kamkhat heh amahte ding lehhnak cang de i.

⁵ Tun nangmah ca harsahnak can a hleng ve fangin, lung na sia ai thinnau isi.

⁶ Pathian bia heh na muanghnak ilo im? Mi thiang na imanin umlamhnak zaital nai lo isim?

⁷ Phantakniu in ngaisung tucuk! Dikcang mite siatsuahhnak tawk tlang i, ti ling awng aw sim? Mawh nai lote pairalhnak tawk tlang i, ti ling awng aw sim?

⁸ Mi tampui in phatlohnak heh lo bangin vai ai, Hnophnak heh hlaici bangin cing i, ti khiah hmu zo ing. Phat lohnak le hnophnak heh rong bangin khawm ve thun i.

⁹ Anite vumah Pathian thinraw ai hlisia bangin siatsuah i.

¹⁰ Mihrokhrawl pawl tu chintit bangin huk dumdo i, Ikhalselai Pathian in vit sut ai, a kamte khai ek sek i.

¹¹ Dawp tuh le ai tuh nai lo chintit bangin thi tlang i, A fate tu piak sio i.

¹² Vaikhat tu i hnenah a thupniu in thu hleng i; Thuniu in hleng manin a za fangfang ing.

¹³ Mitmu thil lo ai a bawntu zan mangsia bang i.

¹⁴ Thinlau ai i thingsut i, I pumpuhluk in hlawng i.

¹⁵ Rauhla in i hmai hli bangin i hmut i, Mulpalaih i tho surso i.

¹⁶ Ciami rauhla tu i hmaiah a ding hmu ing; Sik ngelngo napui ziang i ti i hliah lo i. Cen a dap zirziar songin aw za ing.

¹⁷ “Pathian hmaiah midikcang um thil ngai peu nitur im? Semtu hmaiah minung aisu tal thianghlim thil nitur im?

¹⁸ Pathian in a palaite rin rinsan kel lo i. A vancungmite lakah rin khelhhnak hmu i.

¹⁹ Ciatih ilekhaw nawngbek ai bawnhnak minung heh, Laivut ai semsuahhnak, pelep bangin bai niu ai a vut ai rial thai minung heh rinsan tuhin um aw sim?

²⁰ Minung tu zing lamah nung i. Ikhalselai zan lam fangin aisu inkhai ling loin thi thai ziar i.

²¹ A naiciahnak hmuahhmuah lang sah sio i; Fimhnak hlawhsam cing in thi i.