Jeremiah 7 - Zanniat Bible

Biakinn Songah Jeremiah In Thurel I

^1-3 Bawipa in Judah mite ai Pathian bia hmun Biakinn ai kotka ah i hlat i. Ciata ah a ding kongin Cungnungber Bawipa, Israel ai Pathian in thuthan tuhin i ruai i. Amahte hnenah, “Ning nuncan thleng tu ilai ning thil tidan khai ṭhin tu ih. Ciatihin he hmunah a raipui ning umruai tuh i.

⁴ ‘Kin him tuh pam i. Hemi tu Bawipa ai Biakinn i, Bawipa ai Biakinn i,’ tiin anite zawlhnak ponkam heh ngai nawn mahang ih!

⁵ “Ning nuncan thleng tu ilai ning thil tidan khai ṭhin tu ih. Pakhat le khat dikcanglairelhnak thawn pawlkom dun tu ih.

⁶ Ramdang mi, farah ngakṭah le hmaitongte khiah zohsuam mah ih. Hemi ram songah mawh nai lote ai thisan khiah suakruai nawn mah ih! Khuavang dang bia khai com tuhang ih. Zaimantifangin ciamite tu ning siatsuahtu tuh i.

⁷ Ning nuncan ṭhin le i sikhaw ning pu le ning pate hnenah i peciahnak he ram songah a zomzet in ning umruai tuh ing.

⁸ “Ruat tucuk ih! Zawlhnak ponkam ah ning sanghnak dah i si.

⁹ Ruko i si, mi rek i si, nupa sualhnak bawn i si, cukcam in thudonrel i si, Baal khuavang hnenah hibawlhnak sel ai ning ling awng lohnak khuavangte bia zel i si.

¹⁰ Hemi bangtluk thil i huahnakte heh bawn ai cia hnuaah i umhnak, i Biakinn songah kawi in, “Kin tu kin him nakhaw,” ti i si.

¹¹ I biakinn heh rukote relhhnak hmun vuah i sim? Ning thil bawnhnak hmu sio ing.

¹² Kaimah i biahnak tuhin i ril hmasaber Shiloh ah feh tu ilai i minung Israel mite sual manin ciami khua khiah ziang bangin bawn awng ing ti sik tu ih.

¹³ Sualhnak siar cawk lo bawn zo ai tun le tunin thu ning rel thliahthlo napui ngai ning nuam hrimhrim lo i. Ning ko fangin a sawn rin i sawn nuam lo i si.

¹⁴ Ciamanin Shiloh vumah i bawn bangin ning rinsanzehnak hemi i Biakinn vumah bawn tuh ve ing. Ning pupate le ningmah hnenah i peciahnak hemi hmunah heh Shiloh ai i bawnhnak cekci in bawn tuh ing.

¹⁵ Ning songkhat Israel mite i hnawt sek bangin ning khai i mithmuh lohnak hmunah ning hnawt tuh ve ing. Kaimah Bawipa in rel zo ing,” tiin ti i.

Thu Ngai Lo Judah Mite

¹⁶ Bawipa in, “Aw Jeremiah, hemite ca ahcen sawngen nuam mah; i hnenah au duh mah, zaikhai i ngen mah; na sawn tuh cuang lo ing.

¹⁷ Judah ram khuasong le Jerusalem lampuite ai a bawnhnak hmu lo isim?

¹⁸ Naupangte in thingfom i, upa pasalte in maisem ai nupangte in vancung kumpibawi nu tiin kohnak a khuavang ca sangheu bawn tuhin sangvut hmet i. Khuavang dangdang caah cabit zu suah ai i thin urruaihnak bawn i.

¹⁹ A urruai tu ngaingai tu kaimah ing maw? I lo i, amahte lala urruai dun ai amahte veve zakthihnak pe dun sawn i.

²⁰ Ciamanin Cungnungber Bawipa kaimah in i thinrawhnak khiah hemi Biakinn vumah burh tuh ing. Minung vumah le sumhnam vumah ituseh, thingkung le lo rong vumah ituseh burh tuh ing. I thinrawhnak tu aisu inkhai hmit thil lo mai bang i tuh i.

²¹ “Aw i minungte, hibawlhnak hrekkhat tu puleng vumah a ziam sek tianin tai i si; a hrek tu ningmah caah ai thil i. Ikhalselai kaimah Bawipa in i relciahnak tu a veksen in ai thil tuh i si ti ing.

²² Egypt ram an ning pu le ning pate i fehpui laitak ah maitai hibawlhnak le hibawlhnak dangdang bawn tuhin zai thu khai ning pe lo ing.

²³ Ikhalselai thukham pakhat pe ing: I thu ngai tu ih tiin thupe ing. I thu ngai le i sikhaw kaimah heh ning Pathian i tuhai ning tu i minung i tuh i si. Ciahlaiah i thupeciahnak bangin nung tu ilai ningmah caah zaizongza tluang tuh i tiin fel ngai in rel awng ing.

²⁴ Ikhalselai i thu hlun lo ai zaikhai siar lo i si. Ning thinlung siava le thinlung ruh ai daihhnak bangin zaizongza bawn sawn ai phathnak lam ben loin hnophnak lam ben i si.

²⁵ Egypt ram an ning pupate a suak awng nia ai panin tunnia tian catloin ning hnenah i cengfa prophette hlat ṭiode ing.

²⁶ Ikhalselai aisu inkhai i thu ngai lo ai zaikhai siar lo i si. Ning pupate tahin milungruh le mi ralcaitu cang sawn lehlam i si.

²⁷ “Ciamanin Jeremiah, he thu hmuahhmuah heh i minungte hnenah rel tuh napui aisu inkhai na ngai tuh lo i. Ko khalsilai na awi tuh lo i.

²⁸ Bawipa a Pathian thu a ngai lotu miphun a ihnak khiah rel tu. Nunthutiam cawhhnak khai amahte hnenah zaikhai ilo i. Rintlak ihnak tu amahte lakah nung nawn lo i. Ciami thula tu a rel khai rel nawn lo i,” tiin ti i.

Hinnom Phairawn Ah Sual I

²⁹ Aw Jerusalem mite, Mithi ngai in kap tu ih; Ning sam met tu ilai lon tu ih. Mithi phumhnak la tlang vumah sa tu ih; Zaimantifangin kaimah ning Bawipa thin i raw ai i minungte hnawl zo ing.

³⁰ Judah mite in thil sual bawn zo i. I hmuhhehhnak milimte i Biakinn songah dah ai i biakinn ningrimtiar zo i.

³¹ A fanu le fapate mai songah tai in hibawlhnak ai a selthilhnak tuhin Tophet tihnak puleng tu Hinnom phairawn ah tiang i. Hemi bawn tuhin i thupeciahnak ilo i; I thinlung inrin i ruat awnghnak ilo i.

³² Ciamanin can hleng tuhai Tophet ihlahle Hinnom phairawn ti nawn loin Mirekhnak phairawn ti leh tuh i. Ciata ah mithi phum tuh i, zaimantifangin hmundang ah mithi phumhnak um tuh lo i.

³³ Miluang tu vaniu le ramsate caah amahte rong i tuhai vaniu le ramsa a hnawttu aisu khai um tuh lo i.

³⁴ Hemi ram tu nelrawn ah cang tuh i. Judah ramai khuasong ah le Jerusalem lampui ah lungawi aipuanghnak thawmvang le mocang puai ai lungawi lasahnak awthawm khiah boruai tuh sek ing.