Jeremiah 44 - Zanniat Bible

Egypt Ram Israel Mite Hnenah Pathian Thucahhnak

¹ Egypt ramsong Migdol khua, Tahpanhes khua, Memphis khua le Egypt ram hlang lamai a ummi Israel mite hmuahhmuah thu ah Bawipa in i hnenah, hetihin rel i.

² Cungnungber Bawipa, Israel ai Pathian in, “Jerusalem khuapui vumah le Judah ram khua hmuahhmuah vumah siatsuahhnak i hlengruaihnak tu ning mit rori in hmu zo i si. Tun inkhai hnawmborh pumhnak bang ilai ai minung aisu khai um lo i.

³ Zaimanin ciatihin cang i ti fangin thilsual bawn tlang ai thin i rawruai manin i. Ningmah in ituseh, ning pupate in ituseh, ning bia awng lohnak khuavang na ruaih ai khuavang dangdang hnenah hibawlhnak sel i si.

⁴ Ningmah hnenah catloin kaimah ruaihtu prophette hlat ai hebang thil i huadan heh bawn tuh loin ning rel i.

⁵ Ikhalselai anite thu tu ngai lo ai zaikhai siar sah lo i si. Thilsual ning bawnhnak khuavang dangdang hnenah hibawlhnak sel heh com lo i si.

⁶ Ciamanin i thinrawhnak le i thintokhnak tu Judah ramai khuate vumah le Jerusalem khuapui song lampui vumah burh ai mai in tai ing. Khuarop ah cang ai a kihkul hmunah cang i. Tunnia tian ciatihin um lai i.

⁷ “Ciamanin Cungnungber Bawipa, Israel ai Pathian kaimah in, zaimanin hebang thilsual heh ning vumah hlengruai nuam hnelhno i, tiin ning zawt ing. Siatsuahhnak khiah pasal, nupang, naupang le nausente vum tianin minung pakhat khai tang nawn lo tianin hlengruai ning nuam im?

⁸ Ning umhnak he Egypt ram songah khuavang dangdang hnenah hibawlhnak sel in le milimte bia in zaimanin thin i rawruai i si? Lailung vum mi zongzong ai zohsuam tuhin le ning hming heh mi cukcamhnak ah hmang tuhin ningmah veve siatsuah dun tuh sio tum i sim?

⁹ Judah ramai khuate songah le Jerusalem khuasong lampui vumai ning pupate le Judah kumpibawi le a nupuite le ningmah le ning nupuite ai thilpha lo ning bawn awnghnak heh a hai sek ihang i sim?

¹⁰ Cia bang inapui tunnia tianin thinlung nemhnak nai lai lo i si; Kaimah upathnak le kihzahhnak zaikhai nai lo ai ningmah le ning pupate hnenah i pehnak dante bangin nung ning nuam fawn lo i.

¹¹ “Ciamanin Cungnungber Bawipa kaimah, Israel ai Pathian in ning ral tuhai Judah ram tu hnawmruai tuh sio ing.

¹² A tangsun Judah mite, Egypt ramah feh ai um a tum ngelngo mite a veksen in pairal tuh sio i. Amahte veksen in a ham a cik in Egypt ramah ral kut in maw, rong loin maw, thi tuh sio i. Mi hmuh ah tihikkul tuh i si; zohsuamhnak ah ning cang tuhai amahte hming tu cukcamhnak le mi sawihnak ah hmang tuh i.

¹³ Jerusalem i cawh zo bangin Egypt ramai a um mite tu raltawng le rian tlung le urhnak in cawh tuh ing.

¹⁴ A tangsun Judah mite, Egypt ram a hlengtute tu minung pakhat khai a nungmi le a luatmi um tuh lo i. Let in amahte um hiamhnak Judah ramah aisu khai let thil tuh lo i. Raltlantu pahnih khat siarlo aisu khai let tuh lo i,” tiin ti i.

¹⁵ Cen pasalte, a nupuite ai khuavang dangdang hnenah hibawlhnak sel tlang ti a lingtute le ciata ai a dingtu nupang hmuahhmuah le Egypt ram hlang lamai a ummi Israel mite tian mi tampui a veksen in i hnenah kawi tlang ai,

¹⁶ “Bawipa hming in nangmah ai na kin relhnak thu hmuahhmuah ngai kin nuam lo i.

¹⁷ Bawn tuh i ing kin tihnak hmuahhmuah bawn tuh i ing. Kin khuazingnu Vancung kumpinu hnenah hibawlhnak sel tuhai kinmah le kin pupate in ituseh, kin kumpibawite le kin hotute in ituseh, Judah ram khuate le Jerusalem khua vumah a bawn awng zo bangin hibawlhnak ai cabitti tu a vumah burh tuh i ing. Ciatihin kin bawn laiah rong khai nai roh ai mi nainung i ing ai zai harsahnak khai tawk lo i ing.

¹⁸ Ikhalselai Vancung Kumpinu hnenah hibawlhnak kin sel nawn lo hnua le a hnenah selhnak cabitti burh nawn lo hnuaah tu zaizongza kin tlasam ai kin minungte tu ral kut in le rong loin thi diamdo i,” tiin i ti i.

¹⁹ Ciahlaiah nupangte in, “Vancung kumpinu hmuihmel cuang in sang em tlang ai a hnenah hibawl kin selhnak cabitti kin burh fangin kin pasalte tu kin bawnhnak vumah lunghmui ngaingai i,” tiin i ti i.

²⁰ Ciatih ai i sawntu pasalte le nupangte hnenah kaimah in,

²¹ “Nangmah le ning pupate in ituseh, ning kumpibawite le ning hotute in ituseh, mi senpui inkhai ituseh, Judah ram khua songah le Jerusalem khua lampui vumah thil ning bawnhnak hmuahhmuah Bawipa in ling lo ai a ling inrin a hai zo i tiin ruat i sim?

²² Tunnia tian ah ning ram tu hnawmborh pumhnak in um ai minung aisu khai um lo i. Tihikkul in cang ai ning thilsual bawnhnak le thilpha lo ning bawnhnak tu Bawipa in or thil nawn lo manin ning ram tu khing ruangro ai mi in cukcamhnak in hmang i.

²³ Bawipa ai thupehnak hlun lo ai khuavang dangdang hnenah hibawlhnak ning pe manin hebang hnawmcanhnak ning vumah hleng i,” tiin ti ing.

^24-25 Cungnungber Bawipa, Israel Pathian ai ponghnak tu Egypt ramai a ummi Judah mite hnenah rel ing. A tumce in nupangte hnenah rel ing: “Ningmah le ning nupuite in Vancung Kumpinu hnenah hibawlhnak cukcam in thukhamhnak bawn i si. A hnenah hibawlhnak sel tuhin le cabitti hibawlhnak a vumah burh tuhin thukhamhnak bawn ai ning thukhamhnak bangin bawn ngaingai i si. Pha i; ning thukhamhnak tu hlun tu ih. Cukcam ai ning thukhamhnak bangin bawn tu hlen ih.

²⁶ Ikhalselai kaimah Bawipa in Egypt ramai a ummi Israel mite ning hnenah, a thawmlian a hming in cukcam in thu i khamhnak heh ngai tu ih: kaimah hming sal in, ‘A nungmi Cungnungber Bawipa hming in thukham ing,’ tiin aisu inkhai ti nawn mah ih.

²⁷ I mithmuh ah nainung in um tuh nawn lo i si; siatsuahhnak mi ning cang tuh sawn i. Mi pakhat khai tang lo tianin ral kut in maw, rian tlung in maw, ning thi tuh sio i.

²⁸ Ikhalselai mi tlawmniu ian thi loin ning tang tuhai Egypt ram an Judah ramah let tuh i si. Ciafang ian in aisu ponghnak dik sawn i, kaimah ai ponghnak maw, ningmah ai ponghnak sawn, ti khiah a tangsun mi tlawmniu in ling leh tuh i.

²⁹ Hemi hmunah ning cawh tuhai ning vumah hnawmralhnak hlengruai tuh ing ti ai i thukhamhnak khim tuh i, ti larruaihnak tuhin kaimah Bawipa in hnikhnaihhnak ning pe tuh ing

³⁰ Judah kumpibawi Zedekiah tu amah rek a nuamtu a ral Babylon kumpibawi Nebuchadnezzar kut songah a pe bangin Egypt kumpibawi Hophra khiah a ral le amah rek a nuamtute ai kut ah pe tuh ing,” tiin ti i.