Jeremiah 43 - Zanniat Bible

Egypt Ah Jeremiah Hlengpuihnak

¹ Bawipa a Pathian in amahte hnenah rel tuhin i ruaihnak hmuahhmuah misenpui hnenah rel sio ing.

² Ciafangin Hoshaiah ai fapa Azariah le Kareah ai fapa Johanan le mipuarte in, “Thudon isi. Bawipa kin Pathian in Egypt ram feh tuh loin le um tuh loin rel tuhin na hlat lo i.

³ Babylon mite in kin vumah thu nai ai kin rekthilhnak tuhin, ihlahle Babylon ah a fehpui thil tuhin Neriah ai fapa Baruch in thusia na forh i,” tiin kin ti i.

⁴ Ciatihin Judah ram songah um tuhin Bawipa ai thupehnak tu Johanan in ituseh, ralbawite in ituseh, mizapui in ituseh, aisu inkhai hlun nuam lo i.

⁵ Cen Johanan le ralbawite in Judah ramai a tangtute hmuahhmuah le amahte piakhnak ram an a lettute hmuahhmuah Egypt ramah fehpui i.

⁶ Pasal, nupang, naupang le kumpibawi fanute khai fehpui sio i. Gedaliah ai kilkhawl tuhin Babylon ralkap hotu ralbawi Nebuzaradan ai dahhnak hmuahhmuah le, Baruch le kaimah tianin kin hoi sio i.

⁷ Bawipa ai thupehnak tu ngai loin Egypt ram Tahpanhes khua tian feh i.

⁸ Ciata ah Bawipa in i hnenah,

⁹ “Lungto lian puipui lang tulai he khuapui song acuzah inn luthnak hmai ai lampui phahhnak hniaah phum tu; ciatihin na bawnhnak tu Israel mite hrekkhat in na hmu tlang tuseh.

¹⁰ Cungnungber Bawipa, Israel ai Pathian kaimah in i cengfa Babylon kumpibawi Nebuchadnezzar khiah he hmunah kawiruai tuhai ciami na phumhnak lung lian puipui vumah a kumpibawi tohkham dah tuhai a vumah kumpibawi ponhlam zar tuh i, ti thu rel tu.

¹¹ Nebuchadnezzar kawi tuhai Egypt tu neh tuh i. Urhnak in thi tuhin ruat cia mite tu urhnak in thi tuh ngaingai i; sal pom tuhin ruat cia mite tu salpomhnak tuar tuh ngaingai i; ral kut in thi tuhin ruat cia mite tu ral kut in thi tuh ngaingai i.

¹² Egypt ram khuavangte ai biakinnte khiah mai in tai tuh ing. Babylon kumpibawi in a khuavangte tu mai in tai tuh i, ihlahle phur tuh sio i. Tuukhal in a hnikpon vumai khahhu lang sio ai a ciangruai bangin Babylon kumpibawi in Egypt ram tu ciangruai tuhai nehtu a cang hnuaah Egypt ram an feh leh tuh i.

¹³ Egypt ram Heliopolis ai a zarhmi lungto birhnak pawl tu bal ai min tuh sio ai khuavang biakinnte tu mai in tai tuh sio i,” tiin ti ing.