Jeremiah 42 - Zanniat Bible

Mipui In Jeremiah Sawngen Ruai I

¹ Cen ralkap hotute hmuahhmuah le Kareah ai fapa Johanan le Hoshaiah ai fapa Azariah le misenpui a lian a cik in i hnenah kawi ai,

² Anite in, “Kin ngenhnak heh kin bawn sah tu hram law. Bawipa kin Pathian hnenah kin caah sawngen tu hram law. A nungmi kin veksen caah saw kin ngen sah tu law. Tun hlan ahcen minung kin tam ngai i, ikhalselai tun tu nangmah in kin hmu bangin mi tlawmniu ian kin tang ihang.

³ Kin vak tuhhnak lampui le kin bawn tuhhnak thil kin hmuthilhnak tuhin Bawipa kin Pathian hnenah saw kin nget tu hram law,” tiin i ngen i.

⁴ Ciafangin kaimah in, “Pha i; ning ngenhnak bangin Bawipa kin Pathian hnenah sawngen tuh ing. A relhnak hmuahhmuah ning rel tuh salawn ing; zaikhai sup tuh lo ing,” ti ing.

⁵ Cen anite in, “Bawipa kin Pathian in kin caah thu na pehnak hlun kin nuam hlah lekhaw Bawipa tu kin ralcaitu i tu selai kin vumah thulingtu dik ngai le fel ngai i tu hram seh!

⁶ A hnenah sawnget tuhin na ngen manin kin daih ah ituseh, daih lo ah ituseh, Bawipa kin Pathian ai thu tu ngai tuh i ing. A thu ngai tlang le ingkhaw kin lampui tluang tuh i,” tiin ti i.

Bawipa In Jeremiah Ai Sawngenhnak Sawn I

⁷ Ni hra nia ah Bawipa ai ponkam tu kaimah hnenah hleng i.

⁸ Ciamanin Johanan le a hnenah a umtu ralkap hotute le misenpui heh ko ing.

⁹ Anite hnenah, “A hnenah ngen tuhin hlathnak Bawipa Israel ai Pathian in ning hnenah,

¹⁰ ‘Hemi ram songah um ning nuam lekhaw ning siatsuah tuh lo ing, ning tungding tuh sawn ing; ning phai tuh lo ing, kho ngai in ning bir tuh sawn ing. Ning vumah i hlengruaihnak hnawmcanhnak in thin i urruai zo i.

¹¹ Ciamanin Babylon kumpibawi tu kih nawn mah ih. Ning hnenah um tuhai a hathnak huham songin ning o tuh ing.

¹² Ninghio thinpemhnak naitu ing ai ciamanin ning vumah ninghiohnak nairuai tuhai ning khua le ning ramah ning letruai tuh i. Kaimah Bawipa in rel zo ing,” ti i.

^13-15 Ikhalselai ningmah Judah ramai a tangtute in Bawipa ning Pathian thu khiah el mah ilai he ram songah um khai aican lawk mah ih. Ning incen ‘I lo i, Egypt ramah feh tuhai um tuh sawn i ing. Egypt ram ahcen ral um tuh nawn lo i, raltawng tuh kohnak aw khai ling tuh nawn lo ai ril khai kin kam tuh nawn lo i,’ ti tuh lo i si. Ti le i sikhaw Cungnungber Bawipa, Israel ai Pathian in, ‘Egypt ramah feh in um tum tlang hrimhrim le i sikhaw,

¹⁶ ning kihhnak ralte in ning man tuh i. Ning lau zehnak rikamhnak in ning hlun tuhai Egypt ramah ning thi tuh i.

¹⁷ Egypt ramah feh in um a tum hrimhrimtute tu ral kut in maw, rian in maw, ihlahle urhnak in maw thi tuh sio tengteng i. Aisu khai nung tuh lo i. Amahte vumai a hleng tuhhnak hnawmralhnak in aisu khai luat tuh lo i,’ ti i.

¹⁸ “Bawipa, Israel ai Pathian in, ‘I thinrawhnak le i thintokhnak tu Jerusalem khua mite vumah i burh bangin Egypt ramah feh le i sikhaw ning vumah burh tuh ve ing. Midangte mithmuh ah tihikkul i tuh i si. Mi ai zohsuamhnak ah ning cang tuhai ning hming tu midang cukcamhnak ah hmang tuh i. Cen he ram heh hmu leh tuh nawn lo i si,’ ti i,” tiin rel ing.

¹⁹ Cia hnuaah hetihin rel bet ing, “Bawipa in Judah ramah a tangtu ningte tu Egypt ramah feh tuh loin ning rel zo i. Tunah ralringhnak ning pe ing.

²⁰ Feh le i sikhaw ning khelh ngai tuh i. Bawipa ning Pathian hnenah ning caah sawngen sah tuhin i ngen ai a thupehnak hmuahhmuah bawn tuhin thukham i si.

²¹ Mitua ah ning rel sio ing. Ikhalselai Bawipa kin Pathian ai i relruaihnak hmuahhmuah el sio fawn i si.

²² Ciamanin phatak niu in hih tu ih: Ning um hiam hmun ramah feh in ral in maw, rong loin maw, ihlahle urhnak in maw ning thi tuh i,” ti ing.