Jeremiah 41 - Zanniat Bible

¹ Ciami kum hlasarih hla ah kumpibawi songkhatte, kumpibawi kuthnia ai tlangsuak upa ber lakah pakhat, Elishama ai tesinfa Nethaniah ai fapa Ishmael tu minung sawmkhat thawn Judah ram uktu Gedaliah tawk tuhin Mizpah ah feh tlang i. Amahte veksen in hmunkhat ah rong a ai tlang lakah,

² Ishmael le a minung sawmkhat tu amahte ralvang suah ai Gedaliah heh rek tlang i.

³ Gedaliah hnenai a umtu Israel mite le Babylon ralkap hrekkhat ciata ah a umtute khai Ishmael in rek berh i.

⁴ A thangha fangin, Gedaliah rek khiah aisu inkhai a ling hlanah,

⁵ Shechem, Shiloh le Samaria in minungte sawmriat hleng tlang i. Amahte khahmul met in hnikpon zik in amahte veve dawt dun at dun in Biakinn ah sangvut le rimhmui pe tuhin a kawitute i.

⁶ Ishmael in a kap kongin Mizpah an hmuak i. Anite hnen a hleng fangin, “Gedaliah tawk tuhin kawi tu ih,” tiin ti i.

⁷ Khuapui song a lut fangin Ishmael le a minungte in rek ai amahte luangte tu tikhur songah lon sek i.

⁸ Ikhalselai anite lakah minung sawmkhat in Ishmael hnenah, “Kin rek hram malaw; sangvut le fangnem le olive thau le khoitizu hampalak ah thuphnak nai i ing,” tiin ti i. Ciamanin rek loin zuah i.

⁹ Ishmael ai rekhnak ai luangte a lonhnak tikhur tu a lianpui i ai Israel kumpibawi Baasha in kumpibawi Asa a tawng laiah kumpibawi Asa in a cohnak tikhur i. Ishmael in ciami tikhur tu mithi luang in dimruai sio i.

¹⁰ Cen Babylon ralkapte hotu ralbawi Nebuzaradan in Gedaliah kilkhawl tuhin a dahhnak kumpibawi fenu le Mizpah khua ai misenpui khiah thawngtoh sio i. Ciamite tu Ishmael in sal tuhin pom ai Ammon ram lamah tlanpui i.

¹¹ Ishmael ai thilsual a bawnhnak tu Johanan le amah thawn a umtu ralkap hotu ralbawite in a za fangin,

¹² ralkap thawn hnawh ai Gibeon ai tili lianpui hiangah man i.

¹³ Ishmael ai sal tuhin a pom mite in Johanan le amah thawn a kawitu ralkapte a hmu fangin ang ngai i.

¹⁴ Let ai anite hnenah dawp i.

¹⁵ Ikhalselai Ishmael le a minungte pariat tu Johanan in pom ngah loin tlan sek ai Ammon ramah hleng i.

¹⁶ Cen Ishmael in Gedaliah a rek hnuaah Mizpah an sal tuhin a pommi ralkapte ituseh, nupang le naupangte ituseh, tilret sa pawl tianin Johanan le ralbawite in phatak ngai in sik i.

^17-18 Ikhalselai Babylon kumpibawi in Judah ram uktu tuhin a bawnhnak Gedaliah khiah Ishmael in a rek manin Babylon mi kihhnak amahte thinlung songah dim i. Ciamanin Babylon mi kih in Egypt ramah tlan i. Lam lakah Bethlehem khua hiangai Khimham ah com i.