Jeremiah 40 - Zanniat Bible

Gadaliah Hnenah Jeremiah Um I

¹ Babylon ralkapte hotu ralbawi Nebuzaradan in Ramah khua ah i luatruai hnuaah Bawipa ai ponkam tu kaimah hnenah hleng i. Judah mi le Jerusalem mite tu salpom mite i ai Babylon ram lamai a fehpui laiah kaimah khai pommi i ve manin thir cikcin thawn Ramah khua ah i hlenghnak ve i.

² Ralbawi pa in hmundang niu ah i fehpui ai, “Bawipa na Pathian in he ram vumah siatsuahhnak hlengruai tuh ing, tiin a tihnak tu,

³ tunah i rel cia bangin hleng ngaingai i. Na minungte sual ai Bawipa ai thu ngai nuam lo manin he bangin cang i.

⁴ Tunnia ah na zawngngel ai thir cikcin heh na hawk sah tuhai na hlat tuh ing. Kaimah thawn Babylon ah feh na nuam lekhaw feh thai isi; phatak niu in kil na khawl tuh ing. Feh na nuam hlah lekhaw nangmah thu i. Hemi ram pumpuhluk songah na daihdaih ril tulai nangmah a rem a pha na tihnak hmuncang ah feh thai isi,” tiin i ti i

⁵ Cen zaikhai pong loin i um fangin Nebuzaradan in, “Judah ram uktu ah Babylon kumpibawi in a bawnhnak Shaphan ai fasuan, Ahikam ai fapa Gedaliah hnenah let tu. Amah thawn misenpui lakah um tu; ihlahle na feh hiam hmunah feh tulai um tu,” i ti i. Cen lehsawng i sum ai sunsiah i ken hnuaah i hlat i.

⁶ Ciatihin Ahikam ai fapa Gedaliah hnenah feh ai Mizpah ah a hnenah um ing. Ciatihin ram songah a tangtu misenpui lakah um ing.

Judah Ram Uktu Gedaliah

⁷ Judah ralbawi hrekkhat le ralkapte hrekkhat tu remhnak bawn tlang lo i. Judah ram songah a hlumhnak, ralpom mi songah a tel lotu farah ber pawl siktu le hotu ah Babylon kumpibawi in Gedaliah dah i ti a ling fangin,

⁸ Nathaniah ai fapa Ishmael, Kareah ai fapa Johanan, Tanhumeth ai fapa Seraiah, Netophah in Ephai ai fapate le Maacah in Jezaniah tu Gedaliah hnenah Mizpah ah feh i.

⁹ Gedaliah in anite hnenah, “Babylon ralbawite hnenah remhnak bawn heh ning caah zaikhai thinlau tuh um lo i, tiin fel ngai in ning rel ing. Hemi ram songah um in Babylon kumpibawi ruaih tlang tu ilai ning caah zaizongza tluang tuh i.

¹⁰ Kaimah khai Mizpah ah um tuhai Babylon mite a kawi tlang fangin ning palai cang tuh ing, Cabit le thingthai le olive thaute khawm tu ilai phatak ngai in dah tu ih; cen ning langhnak khuate songah dap niu in um tu ih,” ti i.

¹¹ Cen Babylon kumpibawi in Israel mite hrekkhatte tu Judah ram songah umruai ai anite hotu tuhin Gedaliah ruai tlang i, ti khiah Moab ram, Ammon ram, Edom ram le ram dangdang ah a tlantu Israel mite in ling tlang i.

¹² Ciamanin amahte tlanhmun ram ṭen in tho tlang ai Judah ramah let tlang i. Gedaliah hnenah Mizpah ah kawi tlang ai ciata ah cabit le thingthai tampui khawm tlang diamdo i.

Gedaliah Rek I

¹³ Cia hnuaah Johanan le remhnak a bawn nuam lotu ralkap hotute Gedaliah hnenah Mizpah ah kawi ai,

¹⁴ A hnenah, “Ammon kumpibawi Baalis in nangmah rek tuhin Ishmael hlat i, ti ling lo isim?” tiin ti i. Ikhalselai Gedaliah in sang lo i.

¹⁵ Ciafangin Johanan in Gedaliah heh a thupniu in, “Ishmael khiah kaimah in rek tuhai a rektu aisu i ti ling thil tuh lo i. Nangmah rek tuhin zaimanin sik tuh menma i ing? Na rek ngaingai selai tang nangmah na bentu Judah mite heh khuahacang ah piak tlang tuh lala ai Judah ramai a tangtu misenpui ca ahcen thil poimawh ngaingai cang tuh i,” tiin ti i.

¹⁶ Ikhalselai Gedaliah in, “Zaikhai ti mah; Ishmael ai thula na relhnak heh thudik ilo i,” tiin ti i.