Jeremiah 4 - Zanniat Bible

Sualsir Tuhin Kohnak

¹ Bawipa in, “Aw Israel mite, let ning nuam lekhaw i hnenah let tu ih. I ningdulhnak milim bia heh lon ai i hmaiah rintlak le kho ngai in um le i sikhaw,

² kaimah hming sal in cukcamhnak ning bawn fangin thudik le dikcanglairelhnak le dikfelhnak thawn bawn le i sikhaw ning caah pha tuh hlen i. Ciatihin miphun hmuahhmuah in amahte vumah hmuifu pe tuhin i ngen tuhai thang i phat tlang tuh i,” ti i.

³ Bawipa in Judah mi le Jerusalem mite hnenah, “laipua ning vai lai lohnak khiah vai tuhang ih, ning hlaici khiah hling lakah vorh mah ih.

⁴ Aw Judah mi le Jerusalem mite, Bawipa kaimah thawn thukham ning bawnhnak khiah khimruai in kaimah hmaiah vunhmur tanmi i tu ih; ciatihin kaimah caah thianghlim ngai in ap dun tu ih. Ciatihin bawn hlah le i sikhaw thil ning bawn sualhnak manin ning vumah i thinrawhnak mai bangin ko tuhai a hmitthaitu aisu khai um tuh lo i,” tiin ti i.

Judah Ca Raltawnghnak Hleng Tuh I

⁵ Hemi ram song khuahacang ah thirhlung tum tu ih, Cawm ngai le fiang ngai in tum tu ih. Judah mi le Jerusalem mite tu ving ai kulhhnak khuapui songah laileng tlang tuhin rel tu ih.

⁶ Zion fehhnak lampui hmuh tu ih; Himhnak hmunah tlan tu ih; Um phetpho mah ih! Bawipa in harsahnak hlengruai tuh i; Sak lam an a roh ngai in hnophnak hleng tuh i;

⁷ A relh hmun an chintit a kawi bangin, Ram tampui hnawmcantu tho zo i; Judah hnawmcan tuhin a kawi laitak i. Judah khuate tu khuarop ah cang tuh sio ai, aisu khai a songah um tuh lo i.

⁸ Ciamanin buri hnikpon sil tu ilai, Kap in au tu dekdo ih; Zaimantifangin Bawipa ai thinrawhnak tu Judah vuman thawn lai lo i.

⁹ Cen Bawipa in, “Cia nia ahcen kumpibawi le a kuthnia tlangsuakte ai ralphahnak bo tuh i. Suangbawite khuaruahhar tlang tuhai prophette khai mangbang in um tlang tuh i,” ti i.

¹⁰ Ciafangin kai in, “Aw Cungnungber Bawipa, Jerusalem mite heh a roh ngai in zawl ibang si! Daphnak um tuh i, tiin rel napui ralvang tu a hawng thawn nong dun ihang,” tiin ti ing.

¹¹ Jerusalem mite lamah nelrawn ai tlangram an khuahu a roh ngai in zuang tuh i ti relfianghnak can hleng zo i. Ciami khuahu tu mai bangin sa tuh ze i. Fanghi a hmuttu zilhli nem i tuh lo i.

¹² Bawipa ai thupehnak in a zuanghnak hlivua tu ciami tahin a hat deuh hlivua i tuh i. Ciami hli tu minungte vumah thukhanhnak i tuhai thu a petu heh Bawipa amah i tuh i.

Judah Ram Ralte In Kulh I

¹³ Sik tu ih, ralte khuanimpui bangin kawi tlang i. Amahte siphuhlengte tu simpai tahin hat deuh ai a siphuhte tu muvanlai tahin rang deuh i. Kin lampui pit i! Kin bo i!

¹⁴ Aw Jerusalem, thilsual na bawnhnak tepawl tu na thinlung in somciang tu sio lai ciatihin ohnak ngah tuh isi. Zaikom tian thilsual khiah na thinlung in ngaisung tuhlai isi?

¹⁵ Dan khua le Epharaim tlang vum ram an thuthang sia thantu tuhin a thuphurtute hleng i.

¹⁶ Ralte ram hlapui an hleng tuh i tiin miphunte le Jerusalem ralringhnak pe tuhin hleng i. Ralte in Judah khuate khiah auh tuhai,

¹⁷ mi in amahte lo a kil bangin Jerusalem khuapui kulh tuh sio i. Zaimantifangin a minungte in Bawipa ralcai ai raltho tlang i. Bawipa in rel zo i.

¹⁸ Aw Judah, na nundan le na thil bawnhnak in hemi thil poimawh heh na vumah hlengruai isi. Na sualhnak in hemi tuarhnak heh suakruai i. Faipui bangin na thinlung na dawt zo i.

Jeremiah A Lungsia I

¹⁹ Thin i ur i! I urhnak tuar ben lo ing! thin i ur i! lung i hlin dukdo i! Dapthen in um thil lo ing. Thirhlung tum thawm za ing! Raltawnghnak awthawm za ing.

²⁰ Hnophnak pakhat hnua pakhat hlun dun i; Ram pumpuhluk tu hnawmborh pumhnak ah cang i; Mangrin loin i ponhlamte tu hnawm sio i. Amahte ponzarte tu hnawm sek i.

²¹ Zaicam tian raltawnghnak thawm heh za tuhai, Thirhlung tum thawm za tuhlai ing?

²² Bawipa in, “I minungte tu mivoi ciang i; Kaimah i ling nawn lo i, Naupang voi niu bang i; Lingthiamhnak zaikhai nai tlang lo i. Thilsual bawn cenin thiam tlang ngai i, Ikhalselai thilpha cenin bawnsuak tlang lo i,” ti i.

Jeremiah in Hnawmralhnak Hmu Cia I

²³ Laivum sik ai zamhnak lio ramkhing le hnawmborh pumhnak i. Van i cuan fangin tleuhnak zaikhai um lo i.

²⁴ Tlangsangpui i hlir fangin hlin dumdo i; Mual cikniute khai hlin dekdo i.

²⁵ Minung aisu khai um nawn lo i; Vaniute khai zuang sek i.

²⁶ Rampha ngai tu nelrawn ah cang zo i. Amahte khuapui tu hnawmborh pumhnak ah cang zo sek i. Bawipa ai thinrawhnak manin.

²⁷ Bawipa in, “Laivum pumpuhluk tu ramkhing ah cang tuh i, Ikhalselai hnawmruai tuh sek lo ing,” ti i.

²⁸ Lailung in mithi ngai tuh i; Vante khai thim tuh sek i. Bawipa in rel zo ai a thinlung thleng tuh nawn lo i. A thu ruatcat zo ai, khel lamah let tuh nawn lo i.

²⁹ Siphuh vum to ralkap le conkiang ralkapte ai thawmvang a za fangin aisusu khai tlan tuh sio i. Mihrek tu tupui songah relh tlang tuh i, Midang tu lung liang lakah ben tlang tuh i. Khua hmuahhmuah in khing tuh sio ai minung aisu khai um tuh nawn lo i.

³⁰ Aw Jerusalem, na bo lawlaw i! Zaimanin hnikpon san in thuam dun isi? Zaimanin na sui le na ngun hlawnthil suah ai thuam dun heh isi! Zaimanin ning mit khai mawihnak si mat isi? A lovang in par isi! Na daihtu na tlangvalte in na hnawl zo ai, na rek tuh sawn i.

³¹ Nupang nau nai fangin authawm bang za ing; Fa upa ber nau nai kaphnak thawm bang i. Ciami tu Jerusalem a haihawh thil lo aihnak thawm i. A kut tung ai, “Kai tu i bo zo i, Kaimah rek tuhin kawi zo i,” tiin aihnak thawm i.