Jeremiah 37 - Zanniat Bible

Zedekiah in Jeremiah Hnenah Ngenhnak

¹ Babylon kumpibawi Nebuchadnezzar in Jehoiakim ai fapa Jehoiachin tumrul in Josiah ai fapa Zedekiah heh Judah kumpibawi tuhin bawn i.

² Ikhalselai Zedekiah in ituseh, a kuthnia tlangsuakte in ituseh, Bawipa in i hnenah a relhnak thu khiah ngai nuam lo i.

³ Kin miphun tumrul in Bawipa kin Pathian hnenah sawngen tuhin kumpibawi Zedekiah in Shelemiah ai fapa Jehukal le Maasaiah ai fapa suangbawi Zephaniah khiah kaimah hnenah hlat kawm i.

⁴ Cialai ahcen thawng ah i toh lai lo ai luat ngai in misenpui lakah leng thil ing.

⁵ Babylon ralkapte in Jerusalem kulh sio i; ikhalselai anite in Egypt kumpibawi Pharoah ai ralkapte tu Egypt ramri kan zo ti thu a za fangin Jerusalem an let sio i.

⁶ Cen Bawipa, Israel ai Pathian in,

⁷ Zedekiah rel tuhin hetihin i rel i, “Egypt ralkapte tu nangmah bawm tuhin a kawi laitak i. I napui amahte ramah let tuh i.

⁸ Babylon ralkapte tu kawi leh tuhai Jerusalem khuapui heh tawng tuh i, lang tuhai a ziam tianin tai tuh i.

⁹ Babylon mite kawi tuh nawn lo i tiin ruat in nangmah le nangmah zawl dun hnelhno mah; Kaimah Bawipa in ralringhnak na pe ing: kawi tuh tengteng i.

¹⁰ Babylon ralkap a veksen in nang in neh sio ai maliamtute ian tang ai amahte buk songah a hlim siohnak ita inkhai ciamite tu tho tuhai he khuapui khiah mai thawn a ziam tian tai tuh thotho ing,” tiin ti i.

Jeremiah Thawng Ah Toh I

¹¹ Egypt ralkapte kawi i ti a za fangin Babylon ralkapte tu Jerusalem an let i.

¹² Ciamanin kaimah khai songkhat thilri co tuh nai ve manin Benjamin ramah feh tuhin Jerusalem an suak ing.

¹³ Ikhalselai Benjamin Kotka i hleng fangin ciata ai kotka kiltu ralkapte hotu ralbawi, a hming Irijah tihnak, Shelemiah ai fapa, Hananiah ai fasuan in i kham ai, “Babylon mite hnenah tlan tum i lo isim?” tiin i zawt i.

¹⁴ “I lo i, tlan tum lo ing,” tiin sawn ing. Ikhalselai, Irijah in i relhnak khiah ngai lo i. I pom ai bawite hnenah i fehpui i.

¹⁵ I hmu fangin thinraw tlang ai i vit ai sungṭuan Jonathan inn ah, thawnginn tuhin bawnhnak inn songah i dah ai tawh i kalh i.

¹⁶ Lai hnia khan songah i dah ai ciata ah a raipui um ing.

¹⁷ Cia hnuaah kumpibawi Zedekiah in i ko ai a inn songah a thupniu in, “Bawipa hnenin zai thu hleng pa? tiin i zawt i. “Hleng i. Babylon kumpibawi kut ah pehnak tuar tuh isi,” tiin ti ing.

¹⁸ Cen kaimah in thuzawt tuh nai manin a hnenah, “Nangmah le na kuthnia tlangsuakte vumah ituseh, misenpui vumah ituseh, ziang sualhnak i nai manin thawng ah i toh i si?

¹⁹ Babylon kumpibawi in nangmah le he ram khiah ning tawng tuh i, tiin na reltu prophette tang akonah sio i?

²⁰ Tunah kumpibawi pa, na hnenah i ngenhnak bawn sah tuhin ninghio na ngen ing, i ngai sah tu hram law. Jonathan inn, thawnginn song ahcen i kuat leh hram malaw. I kuat leh lesikhaw ciata ah i thi tuh tengteng i,” tiin ti ing.

²¹ Ciamanin kumpibawi Zedekiah in kumpibawi inn kiltute umhnak khan songah i khum i. Ciata ah um ai khuapui songai sang a bo hlanlo, sangbawntu lampui tihnak in, nisiar in sang zawlkhat ngah ṭiode ing.